1Bohle ba leng tlas'a joko ea bokhoba ba ke ba nke beng ba bona e le ba lokeloang ke hlompho eohle, esere lebitso la Molimo le thuto ea hae tsa nyefoloa. 2Makhoba ao beng ba 'ona e leng balumeli a se ke a ba nyelisa, hobane e le bana babo 'ona; a mpe a ba sebeletse hantle le ho feta, hobane ba fumanang molemo oa tšebeletso ea 'ona ke ba lumelang, bao a ba ratang.
Thuto ea bohata le maruo a 'nete
U rute, 'me u khothaletse tsena. 3Haeba e mong a ruta lisele, a sa lumellane le lipolelo tsa 'nete tsa Morena oa rōna Jesu Kreste, le thuto ea bolumeli, 4ke moikakasi ea hlokang tsebo, ea mpang a chesehela ho phea khang le ho ngangisana ka mantsoe, 'me hona ho tsoala mōna, liphapang, linyefolo, lipelaellano tse mpe, 5liqabang tse sa feleng tsa batho ba senyehileng likelello, ba hlokang 'nete, ba lekanyang hore borapeli ke mokhoa oa ho ithuisa.
6E, borapeli ke leruo le leholo ho ea khotsofaletseng seo a nang le sona. 7Ha rea ka ra tla le letho lefatšeng, ka mokhoa o joalo ha re ka ke ra nka letho ho lona ha re tloha. 8Ha re e-na le lijo le liaparo, re li khotsofalle. 9Ha e le ba ikemiselitseng ho rua, ba oela lerabeng la moleko, le litakatsong tse ngata tsa bothoto, tse kotsi, tse tetebeletsang batho tšenyehong le timelong. 10Mohloli oa bokhopo bohle ke ho rata chelete; ka ho e chachehela, ba bang ba khelohile tumelo, ba ikapesa ka masoabi a mangata.
Ntoa e ntle, ea tumelo
11Uena motho oa Molimo, baleha tsena, u habe ho loka, borapeli, tumelo, lerato, tiisetso, mosa. 12Loana ntoa e ntle ea tumelo; ikhapele bophelo bo sa feleng, boo u bo bitselitsoeng, joalokaha u entse boipolelo bo botle pel'a lipaki tse ngata. 13Mahlong a Molimo, eena ea phelisang tsohle, le mahlong a Kreste Jesu, ea ileng a etsa bopaki ba 'nete kapele ho Pontiuse Pilato, ke u laela hore 14u bōlōke molao u se na letheba leha e le koli, ho fihlela Morena oa rōna Jesu Kreste a iponahatsa. 15Ka nako ea teng o tla bonahatsoa ke ea lehlohonolo, ea matla a inotši, Khosi ea likhosi, le Morena oa marena, 16eena a inotši ea sa shoeng, ea ahileng leseling le ke keng la atameloa, eo ho seng motho ea kileng a 'mona, kapa ea ka 'monang. Hlompho le matla a sa feleng e ke e be tsa hae. A ho be joalo!
17Laela barui ba tsa lefatše lena hore ba se ke ba ikhōhōmōsa, ba tšepa maruo a felang, ba mpe ba tšepe Molimo ea re fang tsohle ka bongata hore re li thabele. 18Ba etse tse lokileng, ba rue mesebetsi e metle, ba fane ka matsoho a mabeli, ba arolelane le ba bang. 19Kahoo ba tla ipōkellela letlotlo le letle la kamoso, ba tle ba fumane bophelo ba 'nete.
20Timothea, ak'u bōlōke se beiloeng paballong ea hao. U qobe lipuo tse sa hlompheng, tsa lefeela, le likhanyetsano tsa hoo ho thoeng ke bohlalefi. 21Ba bang ba reng ba na le bona ba khelohile tumelo.
Mohau o ke o be le lōna.
