Litšoanelo ho ba bang
1U se ke ua kharumela motho e moholo ho uena, empa u ipiletse ho eena joaloka hoja ke ntat'ao. Talima ba bacha e le baena ba hao, 2basali ba hōlileng u ba talime e le bo-'m'ao, basali ba bacha e le likhaitseli tsa hao, ka bohloeki bohle.
3Hlompha bahlolohali ba se nang le moneketsela. 4Empa ha mohlolohali a e-na le bana kapa litlōhōlō, e be bona ba qalang ho ithuta ho phetha litšoanelo lapeng labo bona, le ho buseletsa batsoali lithuso tsa bona. Hona ho khahlisa Molimo. 5Athe mohlolohali ea se nang le moneketsela, ea setseng a 'notsi, o tšepile Molimo feela, o tiisetsa ho mo kōpa le ho mo rapela bosiu le motšeare. 6Empa mohlolohali ea iphelelang menyakeng, o shoele a ntse a tsamaea. 7Ba laele tsena, e le hore ba tle ba hloke koli. 8Haeba motho a sa baballe ba habo, haholo-holo ba phelang lapeng la hae, o lahlile tumelo, 'me o mobe le ho feta eo e seng molumeli.
9Lenaneng la bahlolohali ho se ngoloe ea katlas'a lilemo tse mashome a tšeletseng, le hona e be ea ileng a nyaloa hanngoe feela. 10Hape e be ea pakoang ke mesebetsi ea hae e metle, e kang ho hōlisa bana hantle, ho amohela baeti, ho hlatsoa balumeli maoto, ho thusa ba tsietsing, esita le ho 'na a etsa mesebetsi eohle e molemo.
11Bahlolohali ba sa leng bacha bona u ba hane, hobane ha litakatso tsa bona li ba furallisa Kreste, ba tla rata ho nyaloa hape. 12Ha ba ka etsa joalo, ba tla lokeloa ke kahlōlo, kaha ba lahlile boitlamo ba bona ba pele. 13Hape ba ka itloaetsa ho se sebetse letho le ho chalaka le malapa; e seng feela ho se sebetse letho, empa ho shoahla le ho itšunyaka hohle litabeng tsa ba bang, le ho bua tse sa lokelang. 14Ka hona nka rata ha bahlolohali ba sa leng bacha, ba ka nyaloa hape, e le hore ba be le bana, ba tsamaise malapa a bona hantle, ba tle ba se ke ba fa mohanyetsi monyetla oa ho ba bua hampe. 15Bahlolohali ba bang ba se ba ile ba lahleha ka ho sala Satane morao.
16Ha ho e-na le molumeli oa mosali ea amanang le bahlolohali, a ba thuse, kereke e tle e se ke ea imetsoa, 'me e tsebe ho thusa bahlolohali ba se nang le moneketsela.
17Baholo ba busang kereke hantle ba lokela ho fuoa moputso oa hlompho e kholo, haholo-holo ba sebetsang ka thata ho phatlalatsa lentsoe le ho ruta. 18Mangolo a re: “E pōlang ha e tlangoe molomo.” Hape a re: “Ea sebetsang o lokeloa ke moputso oa hae.” 19Se amohele qōso e qōsang moholo, haese ka bopaki ba batho ba babeli kapa ba bararo. 20Ba entseng sebe u ba khalemele mahlong a bohle, e le hore ba bang bohle ba tle ba tšabe.
21Ka Molimo, le ka Kreste Jesu, le ka mangeloi a khethiloeng, ke ipiletsa ho uena, ke re: Tsena u li bōlōke u se na leeme, u sa ee ka tšobotsi.
22U se ke ua potlakela ho bea mang kapa mang matsoho; u se ke ua ba le kabelo libeng tsa ba bang, 'me u ipōlōke u hloekile.
23Khaotsa ho noa metsi feela, u mpe u noe le veinenyana ka baka la mala a hao, le ka baka la ho kula hangata.
24Libe tsa batho ba bang li pepeneneng, li ba etella pele ho ea kahlōlong; athe tsa ba bang li hlahela hamorao. 25Ka mokhoa o joalo le mesebetsi e metle e pepeneneng; athe le e seng joalo e ke ke ea 'na ea pateha.
