Lefu la Judase Makabea
1Ha Demeteriose a utloa hore Nikanore 'moho le bahlabani ba hae ba shoetse ntoeng, a boela a romela Bakidese le Alekimose naheng ea Juda khetlo la bobeli, 'moho le bahlabani ba theko e ka ho le letona. 2Ba tsamaea ka tsela e lebang Gilgale, ba lara kapele ho Mesalothe, haufi le Arebela; ba hapa motse oa Mesalothe, ba ba ba bolaea batho ba bangata. 3Khoeling ea pele ea selemo sa lekholo le mashome a mahlano a metso e 'meli, ba lara kapele ho Jerusalema. 4Eaba ba tloha moo, ba ea Berea ka bahlabani ba likete li mashome a mabeli le ba likete li peli ba bapalami. 5Nakong eo, Judase o ne a larile Elasa, 'me a e-na le mokhethoa oa bahlabani ba likete li tharo. 6Ha bao ba bona mphihali eo ea ba lireng, ba keneloa ke tšabo, 'me ba bangata ba thoba liahelong ho fihlela ho setse banna ba ka bang makholo a robeli feela. 7Judase a elelloa hore bahlabani ba hae boholo ba iketse, empa ntoa eona e se e le haufi; a nyahama pelo, hobane ho ne ho se ho se mokhoa oa ho ba bokella hape. 8A khathala matla haholo, empa a re ho ba setseng: “A re emeng ka maoto, re futuheleng lira tsa rona. A re itekeleng ho li loantša.”
9Empa bona ba mo eletsa, ba re: “Re tla sitoa ho etsa letho, haese ho pholosa bophelo ba rona ha joale. Re tla khutla kamorao ho ba futuhela re se re e-na le bana babo rona; ha joale rea fokola.” 10Eaba Judase o re: “Hase ntho eo nka bang ka e etsa ea ho baleha batho bana. Haeba nako ea rona ea ho shoa e fihlile, a re shoeleng bana babo rona ka sebete, 'me tlotla ea rona e tle e hloke letheba.”
11Joale mabotho a lira a tloha liahelong, ho ea thulana le Bajuda. Bapalami ba ne ba arotsoe lihlopha tse peli, ba betsang majoe ka matjeketjane le ba liqha ba eteletse mabotho pele, bahale bona ba le moleng o kapele ho bohle. 12Bakidese o ne a le thekong e ka ho le letona. Mphi ea atamela ka lihlopha tse peli, literompeta li ntse li lla: bahlabani ba Judase le bona ba letsa literompeta. 13Lefatše la reketla ke melumo ea mabotho; ntoa ea kupa ho tloha hoseng ho fihlela mantsiboea.
14Judase a elelloa hore Bakidese le karolo e matla ea mabotho a hae ba ka thekong e ka ho le letona. Joale a ea teng le banna bohle ba libete, 15'me ba fenya theko e ka ho le letona, ba phalalisa lira ho ea fihla thabeng ea Ashedode. 16Ha ba ka thekong e ka ho le letšehali ba bona hore ba theko e ka ho le letona ba se ba fentsoe, ba hlaha Judase le ba nang le eena ka morao, ba ba hata lirethe. 17Ntoa ea e-ba mahlo a matšo, hoo ho ileng ha shoa ba bangata ka mahlakoreng a mabeli. 18Judase le eena a bolaoa, 'me ba setseng ba baleha. 19Jonathane le Simone ba nka ngoan'abo bona Judase, ba ea mo pata lebitleng la bo-ntat'a bona motseng oa Modine. 20Sechaba sohle sa Iseraele sa mo sarelloa, sa mo llela haholo; 'me sa ba bofifing ka matsatsi a mangata. 21Batho ba re: “Senatla se oele joang, sona seo e neng e le mopholosi oa Iseraele?”
22Tse ling tseo Judase a ileng a li etsa, tsa lintoa, bonatla le boholo ba hae, ha lia ngoloa, hobane li ne li le ngata haholo.
Jonathane o nka setulo sa Judase
23Ka morao ho lefu la Judase, ba khopo ba boela ba hlaha liqoleng tsohle tsa Iseraele, 'me baetsi bohle ba bobe ba qala ho hlahisa lihlooho. 24Matsatsing ao ha ikakhela tlala ea sekoboto, 'me boholo ba sechaba ba sala batho bao morao. 25Bakidese a khetha bakoenehi ho busa naha. 26Ba tsoma, ba ba ba tsomisisa metsoalle ea Judase, ba e tlisa ho Bakidese, ea ileng a ba fa kotlo a ntse a ba soma. 27Joale Iseraele eohle ea e-ba mosarelong o moholo, oo e neng e e-s'o be ho oona ho tloha haesale baporofeta ba se ba sa hlahe sechabeng.
28Metsoalle eohle ea Judase ea phutheha, 'me ea re ho Jonathane: 29“Haesale Judase, ngoan'eno, a hlokahala, ha ho e-s'o hlahe motho ea kang eena ho re etella pele ho loantša lira tsa rona, Bakidese le ba bang ba hloileng sechaba sa habo rona. 30Joale he, kajeno re u khethile hore u nke sebaka sa hae, u be morena le moetapele oa rona ho re loanela lintoa tsa rona.” 31Tsatsing leo Jonathane a lumela ho ba moetapele, a ba a nka setulo sa Judase, ngoan'abo.
Matšolo a Jonathane
32Bakidese ha a utloa tsena, a leka ho bolaea Jonathane. 33Empa Jonathane le Simone, ngoan'abo, le bohle ba neng ba mo latela, ba utloa morero ona, 'me ba balehela lefeelleng la Tekooa, ba lara haufi le letša la Asefare. 34Bakidese a tsebisoa litaba tsena e bile e le ka letsatsi la Sabatha, 'me a tšela noka ea Jorodane le mphi eohle ea hae. 35Jonathane a romela ngoan'abo, eo e neng e le moeta-pele oa letšoele la ba sa loaneng, ho ea kopa Banabathea, metsoalle ea hae, ho ba bolokela thepa eohle ea bona e ngata. 36Empa bara ba Jambori, ba motse oa Medaba, ba hlasela Johanne, ba mo tšoara le tsohle tseo a neng a e-na le tsona 'me ba ikela le tsona. 37Ka morao ho tsena Jonathane le ngoan'abo Simone ba tlaleheloa hore bara ba Jambori ba entse mokete o moholo oa lechato, 'me ba tla felehetsa monyaluoa, e leng morali oa e mong oa mahosana a maholo a Kanana, ba tloha le eena motseng oa Nadabatha ka mokoloko o moholo. 38Ba hopola ho phetetsa mali a ngoan'abo bona Johanne, 'me ba nyolohela mosikong oa thaba, ba ipata teng. 39Eare ha ba re mahlo tloha, ba be ba se ba bona ho hlaha mokolokohali o ebeselang ke thepa, o tlatsang lerata; monyali, le metsoalle ea hae le bana babo ba e-tla ho khahlametsa monyaluoa, ba tsamaea ka meropa le liletsa le lihlomo tse ngata. 40Joale ba ropoha moo ba neng ba ba laletse teng, ba ba khorohela, ba ba bolaea. Ba bangata ba hlabuoa, ba shoela hona moo, ha ba bang ba ile ba balehela thabeng; eaba ba hapa thepa eohle ea bona. 41Mokete oa lechato oa fetoha bofifi, le 'mino koli ea malla. 42Ha ba se ba phetelitse mali a ngoan'abo bona ka ho tlala, ba ipoella mekhoabong ea Jorodane.
43Bakidese ha a utloa tsena, a tla le mphi e kholo mabopong a Jorodane, e le ka letsatsi la Sabatha. 44Joale Jonathane a re ho ba nang le eena: “A re emeng ka maoto, re hle re loanele bophelo ba rona; hobane kajeno litaba li mpe ho feta pele. 45Bonang, ntoa ea rona e ka pele, e ka morao; ka nq'ena ke metsi a Jorodane, ka nq'ane ke mekhoabo le meru: ha ho mokhoa oo re ka phonyohang ka oona. 46Ka hona, hoeletsang leholimong joale, hore le pholosoe liatleng tsa lira tsa rona.”
47Joale ntoa ea qaleha; Jonathane a nanabetsa letsoho la hae, a re o hlaba Bakidese, empa eo a qoba ka ho checha ka santhao. 48Jonathane le batho ba hae ba ikakhela nokeng ea Jorodane, ba sesetsa mose oane; empa sera ha sea ka sa tšela ho ba lelekisa. 49Tsatsing leo ho ile ha e-shoa banna ba ka etsang sekete ba mphi ea Bakidese.
50Bakidese a khutlela Jerusalema. A haha metse e sirelelitsoeng naheng ea Judea: qhobosheane ea Jeriko, ea Emmause, ea Bete-Horone, ea Bethele, ea Timanathe, ea Parathone le ea Tefone, e le metse e nang le marako a phahameng a tšireletso, likhoro le mekoallo ea tsona. 51A siea mabotho a balebeli libakeng tsena ho hlekefetsa Iseraele. 52A haheletsa le metse ea Bete-Sure le Gesere le Qhobosheane e Jerusalema, 'me a siea mabotho le meliko e tletseng lijo hona teng. 53A tšoara bara ba marena a tikoloho eo, a ba koalla ka chankaneng Qhobosheaneng e Jerusalema.
54Selemong sa lekholo le mashome a mahlano a metso e meraro, khoeling ea bobeli, Alekimose a laela hore ho qhaqholloe lerako le arolang lepatlelo le kahare la Sehalalelo. Ka tsela ena o ne a senya mosebetsi oa baporofeta. 55Empa o ne a sa qalile feela ho qhaqholla, ha a tla keneloa ke lefu, 'me mosebetsi oa hae o emisoe. O ile a fetoha semumu, a shoa litho hoo a neng a se a sitoa ho bua letho leha e le ho fana ka litaelo ka tlung ea hae. 56Eaba Alekimose o shoa ka eona nako eo, har'a mahloko a hlollang. 57Ha Bakidese a bona hore Alekimose o shoele, a khutlela ho khosi, 'me naha ea Juda ea ka ea ba le khotso lilengoana tse peli.
58Joale bohle ba khopo ba ithera, ba re: “Lea bona, Jonathane le batho ba hae ba iphelela ka khotso ka ntle ho letsoalo. Joale re tla lata Bakidese, hore a tle a ba tšoare bohle ka bosiu bo le bong.” 59Ba ea ho eena 'me ba mo nea keletso eo. 60Bakidese a tla le mphi e kholo, 'me ka lekunutu a 'na a nyenyeletsa ka mangolo metsoalle ea hae eohle e naheng ea Judea, hore e mo tšoarele Jonathane le batho ba hae; empa metsoalle ena ea hloloa ho etsa joalo, hobane leqheka lena le ne le se le senotsoe. 61Athe har'a baahi ba naha ena ba neng ba nkha lefotha bolotsaneng bona, ho ile ha tšoaroa ba ka bang mashome a mahlano, 'me ba bolaoa 62Jonathane le Simone le batho ba bona ba fallela Betebasi e lefeelleng; ba tsosa tse neng li helelitsoe motseng oo, ba ba ba o sireletsa. 63Ha Bakidese a elelloa taba ena, a phutha mabotho a hae kaofela, a ba a romela molaetsa ho bathusi ba hae ba Judea. 64A tla ho lara ka pele ho Betebasi, a hlasela motse oo matsatsi a mangata, 'me a etsa le mechini ea ntoa. 65Jonathane a siea Simone, ngoan'abo, motseng; eena a tsoa le banna ba seng bakae. 66A hlola Odomera le bana babo, 'moho le bara ba Fasirone, litenteng tsa bona. Batho bana le bona ba kena ntoeng 'me ba nyolohela Betebasi le mabotho a Jonathane. 67Simone le eena 'moho le batho ba hae ba tsoa motseng, ba chesa mechini ea lira ea ntoa; 68ba futuhela Bakidese 'me ba mo fenya. Ba mo utloisa bohloko, hobane merero ea hae le matšolo a hae li ile tsa nyopa. 69A halefela bakoenehi ba ileng ba mo eletsa ho tla Juda, a ba a bolaea ba bangata ba bona.
Joale Bakidese a rera ho ipoella ha habo. 70Ha Jonathane a utloa tsena a romela molaetsa ho Bakidese oa hore ba etse khotso, a be a mo lokollele Bajuda ba litlamong. 71A lumela, 'me a phethisa seo Jonathane a se kopileng; a ba a mo hlapanyetsa hore, ha a ntse a phela, ha a sa tla hlola a leka ho mo etsa hampe. 72A mo khutlisetsa batšoaruoa bao a neng a ile a ba hapa naheng ea Juda nakong e fetileng. Joale a tsamaea a khutlela ha habo a se ke a hlola a hata naheng ea Bajuda. 73Iseraele sabole ea khaotsa ho hlaba batho. Jonathane a aha Mikemase; a qala ho ahlola batho le ho felisa ba khopo naheng ea Iseraele.
