Selekane le Baroma
1Joale Judase a utloa setumo sa Baroma, sa hore ke bahlabani ba shahlileng, le hore ba amohela ka liatla tse peli bohle ba etsang selekane le bona; ba ikemiselitse ho etsa setsoalle le bohle ba tlang ho bona; 'me ruri e ne e le bahlabani ba shahlileng. 2Judase a bolelloa tsa lintoa tsa Baroma le liketso tsa bona tsa bonatla naheng ea Bagalata, le kamoo ba ba hlotseng kateng, ba bileng ba ba tlama ho ntša lekhetho. 3A tsebisoa hape tsohle tseo ba li entseng naheng ea Sepania, ho hapa merafo ea silefera le ea khauta ea teng; 4le kamoo ba ikhapetseng tsamaiso ea naha eo eohle ka baka la bohlale ba bona le mamello ea bona, le hoja lefatše leo le ne le le hole hakaalo le lehae la bona; le kamoo ba hlotseng le likhosi tse neng li ba futuhela li hlaha lipheletsong tsa lefatše, ba li fenya 'me ba li fekisa hampe. Likhosi tse ling le tsona li ne li ba ntšetsa lekhetho la selemo le selemo. 5Le teng, Filipi le Pereseuse, khosi ea Bakitime, le ba bang ba ileng ba leka ho ba loantša, Baroma ba ba fenya ntoeng 'me ba ba hlola. 6Ba fenya le Antiokose e Moholo, khosi ea Asia, ea neng a ile a ba futuhela ka litlou tse lekholo le mashome a mabeli, ka bapalami le likariki le mphi e kholohali. 7Ba mo tšoara a ntse a phela, 'me ba mo tlama, eena le bahlahlami ba hae, ho ntša lekhetho le boima, ba fane ka batho bao e tla ba batšoaruoa ba Baroma, ba be ba neelane ka litereke tse ntlehali tsa naha ea bona; 8tse kang tsa India, Media le Lidia. Tsena, ha Antiokose a se a li amohiloe, ba li neela khosi Eumenese.
9Bagerike ba rera ho ba ripitla; 10empa Baroma ba tseba morero oo, 'me ba romela mabotho a fokolang le molaoli a le mong ho ba hlasela. Ba bolaea Bagerike ba bangata ntoeng; ba hapa basali ba bona le bana 'moho le thepa ea bona, ba inkela naha ea bona, 'me ba heletsa liqhobosheane tsa bona; ba ba etsa makhoba ho fihlela joale. 11Ha e le mebuso eohle e meng, le lihleke-hleke tse ileng tsa leka ho setlela, ba li ripitla, ba ba ba etsa baahi ba tsona makhoba. 12Empa ho metsoalle ea bona le ho bohle ba ba tšepileng, ba bolokile setsoalle sa bona. Ba bobisitse likhosi tse hole le tse haufi; 'me bohle ba utloang botumo ba bona ba keneloa ke tšabo. 13Bao Baroma ba ratang ho ba thusa, le ho ba etsa marena, ba rena. Le teng ba theola batho boreneng, ha ba rata. Boemo ba bona bo phahame haholo. 14Leha ho le joalo, ha ho le ea mong oa bona ea kileng a ithoesa mofapahlooho kapa hona ho apara seaparo se perese ho khantša matla a hae. 15Ba hlomile lekhotla la baeletsi, 'me letsatsi le leng le le leng banna ba makholo a mararo le mashome a mabeli ba phutheha ho rerisana, 'me ba sa khaotse ho hlophisa litaba tse amang sechaba. 16Ba khetha motho a le mong ka selemo ho ba busa le ho tsamaisa naha eohle. Bohle ba mamela motho eo a le mong, 'me ho se ea mo honohelang kapa a ba mona ka eena.
17Joale Judase a khetha Eupolemose, mora oa Johanne, mora oa Akose, le Jasone, mora oa Eleasare; a ba romela Roma ho ea hloma setsoalle le selekane le Baroma. 18Le teng o ne a tšepile hore Baroma ba tla tlosa joko eo Baiseraele ba e jereng, hobane ba tla bona hore Bagerike ba hlile ba ba fetotse makhoba. 19Ba ea Roma, leetong le lelelele, ba kena ka tlung ea Lekhotla, ba bua joana: 20“Judase Makabea, le bana babo 'moho le sechaba sa Bajuda, ba re romme ho lona ho tla thea selekane le khotso le lona, e le hore re hlahe lenaneng la balekane le metsoalle ea lona.”
21Kopo ena ea amoheleha ho Baroma; 22'me hona ke kopi ea lengolo leo ba ileng ba le ngola holim'a matlapa a lethose, ho le romela Jerusalema, hore e tle e be ho Bajuda khopotso ea khotso le selekane:
23“Eka tsohle li ka atlehela Baroma le sechaba sa Bajuda, leoatleng le mobung, kamehla eohle, 'me eka sabole le sera li ka feta hole le bona! 24Haeba ntoa e ka lebana le Roma pele, kapa le e 'ngoe ea litho tsa selekane, kae kapa kae moo Roma e busang teng, 25sechaba sa Bajuda se tla kena ntoeng ka pelo eohle, ho thusa ho ea kamoo litaba li ba hlokang kateng. 26Ho ba futuhileng ho ke ke ha fanoa ka lijo, lihlomo, chelete kapa likepe, kamoo Roma e seng e rerile kateng; 'me ba tla boloka boitlamo ba bona ba sa lebelle moputso. 27Ka tsela e tšoanang, haeba ntoa e ka oela sechaba sa Bajuda, Baroma ba tla kena ntoeng ka pelo tsohle tsa bona, ho thusa ho ea kamoo litaba li ba hlokang kateng. 28Ho ba hlasetseng ho ke ke ha fanoa ka lijo, lihlomo, chelete kapa likepe, kamoo Roma e seng e rerile kateng; 'me ba tla boloka boitlamo bona ho se thetso.
29“Tsena ke litumellano tseo Baroma ba li entseng le sechaba sa Bajuda. 30Haeba, ka mora' litumellano tsena, litho tsa selekane li ka rata ho hlomathisa kapa ho fokotsa letho, li tla etsa joalo ka bolokolohi, 'me sehlomathiso sefe kapa sefe kapa phokotso efe kapa efe, eo litho li ka e etsang, e tla nkuoa e le molao.
31“Hape, ho latela liphoso tseo khosi Demeteriose a ntseng a li etsa ho bona, re se re mo ngoletse joana: ‘Ke ka baka la'ng u imelitseng metsoalle ea rona ea Bajuda, balekane ba rona, ka joko ea hao? 32Joale u tsebe hore, ha ba ka boela ba u qosa hape ho rona, re tla sireletsa litokelo tsa bona, re u loantše leoatleng le mobung’.”
