Ntoa le lichaba tsa baahisani
1Ha etsahala hore lichaba tse ba potileng, li utloe hore aletare e hahiloe bocha le Sehalalelo se tsositsoe, 'me se tšoana hantle le sa pele. Eaba balichaba bana ba halefa haholo. 2Ba rera ho felisa ba moloko oa Jakobo ba ahileng le bona, 'me ba qala ho bolaea le ho timetsa ba bang har'a sechaba. 3Joale Judase a loantša bana ba Esau naheng ea Idumea, le ea Akerabatene, hobane ba ne ba patetse Iseraele. A ba futuhela ka matla, a ba ripitla 'me a hapa thepa ea bona. 4Eaba o hopola bokhopo ba bana ba Baeana, ba neng ba iphetotse kotsi le tšitiso ho batho ka ho ba lalla litseleng. 5A ba thibella litoreng tsa bona, a lara pel'a tsona, a ikemisetsa ho ba timetsa ho hang, a ba cheseletsa bohle ka litoreng tsa bona. 6Joale a fetela ho bana ba Amone, moo teng a ileng a teana le mphi e matla, e nang le batho ba bangata, bao molaoli oa bona e neng e le Timothea. 7A loana lintoa tse ngata le bona, 'me a hla a ba fenya ha a thulana le bona, a ba hlola ho hang. 8A hapa motse oa Jasere le metse e mathoko ho oona, a nt'o khutlela Judea.
9Balichaba ba Gileade ba khobokana ho loantša bana ba Iseraele ba neng ba ahile le bona, e le hore ba ba felise; empa bao ba balehela qhobosheaneng ea Dathema. 10Ha ba le moo, ba romela molaetsa ho Judase le bana babo o reng: “Balichaba ba re potileng ba khobokane ho re loantša, e le hore ba re felise. 11Ba ntse ba itokisetsa ho hlasela qhobosheane eo re tšabetseng ho eona. Timothea ke molaoli oa bona. 12Potlakang ho tla re ntša liatleng tsa bona, hobane ba bangata ba rona ba se ba bolailoe. 13Bana babo rona ba neng ba ahile naheng ea Tobiase ba bolailoe kaofela ha bona; basali ba bona le bana ba hapiloe, thepa eohle ea bona e nkiloe. Sebakeng seo ho bolailoe banna ba ka bang sekete.”
14Eare ho sa ntse ho baloa lengolo lena, ha be ho se ho hlaha a mang maqosa a tsoang Galelea, liaparo tsa 'ona li harasoane; a beha molaetsa ka ho re: 15“Ba Potolemaise, ba Tire le ba Sidone ba khobokane ho re loantša, 'me Galelea eohle e tletse balichaba ba tlil'o re metsa.” 16Eare Judase le sechaba ha ba utloa mantsoe ana, ba epa seboka se seholo ho rera se ka etsoang ho thusa bana babo bona ba tsietsing, ba seng ba futuhetsoe ke lira. 17Eaba Judase o re ho Simone, ngoan'abo: “Ak'u ikhethele banna, le ee le bona Galelea ho ea pholosa bana babo lona; 'na le ngoan'eso Jonathane re tla ea naheng ea Gileade.” 18Joale a siea Josefa, mora oa Sakaria, le Asariase, ho ba balaoli ba sechaba, 'moho le mabotho a setseng naheng ea Judea, ho e sireletsa. 19A laela ka ho re: “Salang le okametse sechaba sena; feela le se ke la loana le balichaba pele re khutla.” 20Simone a neoa bahlabani ba kete li tharo ho ea Galelea; Judase eena a neoa ba kete li robeli ho ea Gileade.
21Joale Simone a kena Galelea, a loana ntoa tse ngata le balichaba, a ba fenya moo a teanang le bona teng, 22'me a ba lelekisa ho ea fihla likhorong tsa Potolemaise. Ha shoa balichaba ba ka bang likete li tharo; eaba o hapa thepa ea bona. 23A khutla le Bajuda bohle ba neng ba le Galelea le Arebata, 'moho le basali ba bona le bana, le tsohle tseo ba neng ba e-na le tsona, 'me a ba isa Judea har'a thabo e kholo.
24Judase Makabea le ngoan'abo Jonathane ba nt'o tšela Jorodane; ba qeta matsatsi a mararo ba ntse ba haola har'a lehoatata. 25Ba kopana le Banabathea, ba ileng ba ba amohela ka khotso, 'me ba ba qoqela tsohle tse etsahetseng ho Bajuda ba Gileade. 26Ba ba bolella hore ba bangata ba bona ba qabelletsoe metseng e meholo 'me e sirelelitsoeng, e leng Bosera, le Besere haufi le Alema, le Kasefo, le Makede le Karanaime; 27le hore ba bang hape ba qabelletsoe metseng e meng ea Gileade; 'me e ka lira li ntse li itokisetsa ho futuhela liqhobosheane tsena letsatsing le hlahlamang, ho li hapa, le ho timetsa Bajuda bohle ka letsatsi le le leng.
28Joale Judase le mabotho a hae ba potlaka ba khutla, ba nka tsela ea lehoatata e eang Bosera. Ba hapa motse oo, ba bolaea motho e mong le e mong e motona ka sabole. Ba nka thepa eohle, ba ba ba chesa motse. 29Ba tloha moo le bosiu, ba tsamaea ho ea fihla qhobosheaneng ea Dathema. 30Eare ha bosiu bo qala ho sa, ha ba re mahlo tloha, ba bona batho ba bongata bo hlollang ba nkile lileri le mechini ea ntoa ho hapa qhobosheane, ba se ba futuha. 31Judase a elelloa hore ntoa e se e qalile. Mokhosi oa eona oa tlola ka har'a motse, oa hlaba holimo, e le molumo oa literompeta le mehoo ea batho. 32A re ho bahlabani ba hae: “Loanelang bana babo lona kajeno!” 33A ba arola lihlopha tse tharo 'me a ba laela ho futuhela lira ba li hlahile kamorao. Ba letsa literompeta, ba rapela ka lentsoe le phefa. 34Ba mphi ea Timothea ba bona hore ke Makabea, eaba ba baleha ke ho mo tšaba. A ba ripitla; tsatsing leo har'a bona ha bolaoa banna ba ka bang likete tse robeli.
35Judase a leba Alema, a futuhela motse oo, a ba a o hapa; a bolaea motho e mong le e mong e motona moo, a hapa thepa ea oona, a ba a o chesa. 36A tloha moo 'me a ea hlasela Kasepo, le Makede, le Besere le metse eohle e meng ea Gileade.
37Empa ka mora' mona Timothea a boela a bokella mphi e 'ngoe hape, 'me a lara mose oane ho noka, haufi le motse oa Rafone. 38Judase a romela lihloela liahelong tsa lira. Tsa khutla ho mo tlalehela ka ho re: “Balichaba bohle ba re potileng ba tlatsane le Timothea ho etsa mphi e kholohali; 39ba bile ba hirile le Maarabia ho tla ba thusa, 'me ba larile mose oane ho noka, ba itokiselitse ho tla u futuhela.” Judase a hla a ba khahlametsa ka ntoa le eena.
40Ha Judase le mphi ea hae ba atamela noka, Timothea a re ho balaoli ba mabotho a hae: “Haeba Judase a ka tšela noka pele ho rona, ha re sa tla tseba ho mo thiba, hobane o tla re imela ka matla. 41Empa ha a ka tšaba ho tšela, 'me a lara ka mose oane, re tla tšela 'me ke rona ba tla mo imela.” 42Joale eare ha Judase a atamela lebopo la noka, a laela hore bao e leng Litsebi tsa Molao sechabeng ba eme hona lebopong, 'me a ba nea litaelo a re: “Le se ke la lumella motho le ea mong ho lara moo; empa bohle ba itukubetse ntoeng.” 43Ha tšela eena Judase pele, 'me batho bohle ba hae ba mo latela; eaba ba fenya balichaba bana kaofela, hoo ba ileng ba lahla lihlomo tsa bona 'me ba balehela tempeleng ea Karanaime. 44Bajuda ba hapa motse oo, ba ba ba chesa tempele ea teng 'moho le bohle ba neng ba le ka har'a eona. Baahi ba Karanaime ba fekisoa 'me ba sitoa ho thiba Judase.
45Judase a bokella Baiseraele bohle ba neng ba le naheng ea Gileade, ho tloha ka ba banyenyane ho isa le ho ba baholo, le basali ba bona le bana, e le letšoelehali, ba e-na le thepa ea bona, a ba isa naheng ea Juda. 46Ba fihla motseng oa Eferone. Ona e ne e le motse o moholo, o neng o le tseleng ea bona, o sirelelitsoe ka thata. Ho ne ho se na kamoo ba ka o potang ka ho le letona kapa ka ho le letšehali kateng; mokhoa feela e ne e le ho o phunyeletsa ka lehare. 47Batho ba motse oo ba ikoalla ka ho oona, ba katisa le likhoro ka majoe. 48Judase a ba romella molaetsa oa khotso, a re: “Re kopa ho feta har'a naha ea lona ho khutlela naheng ea rona. Ha ho ea tla le etsa hampe, re tla iphetela feela ka maoto.” Empa ba hana ho ba bulela.
49Joale Judase a laela hore ho phatlalatsoe liahelong tsebiso ea hore mohlabani e mong le e mong a eme e le malala-a-laotsoe moo a ntseng a le hona teng. 50Bahlabani ba mphi ea hae ba etsa joalo. Eaba ba futuhela motse letsatsi leo lohle le bosiu ba lona, ho fihlela motse o ineela ho Judase. 51A laela hore motho e mong le e mong e motona a bolaoe ka sabole. Batho ba hae ba ripitla motse oo, ba ba ba hapa thepa ea oona. Ba feta har'a motse ba tsamaea holim'a litopo tsa ba bolailoeng. 52Joale ba tšela Jorodane, ba fihla lehoatateng le leholo mabapi le Bete-Sheane. 53Leetong leo Judase o ne a tsamaea a phutha mesalla e khathetseng, a khothatsa bohle, ho fihlela ba kene naheng ea Juda. 54Ba nyolohela thabeng ea Sione ka thabo le nyakallo ba nyehela ka mahlabelo a licheso, hobane ho ne ho se le ea mong oa bona ea shoeleng, ba ikhutletse ka khotso.
55Matsatsing ao ka 'ona Judase le Jonathane ba neng ba ntse ba le naheng ea Gileade, 'me Simone, ngoan'abo bona, a le Galelea a hlasela Potolemaise, 56Josefa, mora oa Sakaria, le Asariase, balaoli ba mabotho, ba utloa ka liketso tsa bonatla tsa ba habo bona, le lintoa tse ngata tseo ba li hlotseng. 57Ba re: “Le rona, a re ke re ipatlele botumo, re loantše balichaba ba re pota-potileng!” 58Ba laela mabotho a bona ho ea hlasela Jamnia. 59Empa Gorgiase le mabotho a hae ba tsoa motseng ho ba khahlametsa ka ntoa le bona. 60Josefa le Asariase ba fekisoa, 'me ba lelekisoa ho isa meeling ea Judea. Letsatsing leo ha bolaoa banna ba ka bang likete tse peli ba sechaba sa Iseraele. 61Sechaba sa hloloa hampe, hobane balaoli ba sona ha baa ka ba mamela Judase le bana babo, ka khopolo ea hore le bona ba ka 'na ba loana joaloka linatla. 62Empa e ne e se ba leloko la banna ba abetsoeng ho pholosa Iseraele. 63Mohale Judase le bana babo ba tuma haholo har'a sechaba sa Iseraele le har'a balichaba bohle ba neng ba utloa ha ho buuoa ka bona. 64Batho ba ba bokanela ho ba lebohela.
65Joale Judase le bana babo ba futuhela bana ba Esau naheng e ka nq'a boroa. Ba hapa Heborone le metse e ka thoko, ba heletsa liqhobosheane tsa eona 'me ba chesa litora tse e potileng. 66A tloha moo, a leba naheng ea Bafilesita, a tsoa le ka la Marisa. 67Tsatsing leo baprista ba bang, ba neng ba rata ho iketsa linatla ka ho ea loana ka booatla, ba shoela ntoeng. 68Joale Judase a leba Ashedode, naheng ea Bafilesita; a heletsa lialetare tsa bona, a chesa litšoantšo tsa melimo ea bona, a hapa thepa ea metse ea bona; a nt'o boela naheng ea Judea.
