1Eaba Gorgiase o inkela ba litaaso ba likete li hlano le bapalami ba sekete ba khethehileng, 'me mphi ena ea tloha bosiu. 2Morero oa bona e ne e le ho khorohela mphi ea Bajuda le ho ba tsometsa; masupatsela a bona e ne e le baahi ba Qhobosheane ea Jerusalema. 3Taba tsena tsa fihla litsebeng tsa Judase; joale eena le bahlabani ba hae ba tloha ho ea hlasela mabotho a khosi a neng a le Emmause, 4ha bahlabani ba makhotla a eona ba ne ntse ba qhalane hole le liahelo. 5Gorgiase ha a fihla bosiu liahelong tsa Judase, a fumana ho se motho. A qala ho ba tsoma bohle lithabeng, hobane o ne a re: “Batho bana ba re balehile.”
6Ha bosiu bo e-sa, Judase a bonoa thoteng le bahlabani ba hae ba kete li tharo, ba neng ba sa aparela ntoa, le lisabole ba se na tsona, kamoo ho hlokahalang kateng. 7Ba bona liahelo tsa balichaba li teteane, li sirelelitsoe; ba bona le bapalami ba li pota-potileng, e le batho ba koetliselitsoeng ntoa. 8Judase a re ho batho ba hae: “Le se ke la tšaba bongata boo ba bona; leha ba ka le hlasela, le se tšohe. 9Le hopole tsela eo bo-ntat'a lona ba ileng ba pholosoa ka eona Leoatleng le Lefubelu, ha Faro le mabotho a hae ba ba lelekisa. 10Joale, a re ke re hoeletseng leholimong, Molimo a tle a re hauhele, a hopole selekane sa hae le bo-ntat'a rona, 'me e be eena ea fenyang mphi ena ka pele ho lifahleho tsa rona; 11lichaba tsohle li tle li tsebe hore o teng ea lopollang 'me ea pholosang Iseraele.” 12Balichaba ha ba re mahlo tloha, ba bona Bajuda ba tla ho ba loantša. 13Le bona ba tsoa liahelong ba kena ntoeng. Ba nang le Judase ba letsa literompeta, 14ba futuha, 'me balichaba ba fenngoa, ba tlala-tlala le lithota. 15Ba siiloeng palehong ba rathoa ka lisabole. Ba ba phalalisa ho ea fihla Gesere, le ho ea fihla lithoteng tsa Idumea, Ashedode le Jamnia, 'me ba bolaeloa bahlabani ba kete li tharo.
16Judase le mabotho a hae ba ba khutlela. 17A re ho batho ba hae: “Le se ke la khalla khapo joale, hobane re sa le ntoeng. 18Gorgiase le mabotho a hae ba ntse ba le lithabeng mona, haufi le rona. Ha joale, a re tieeng matla, re loantšeng lira, re li futuhele, re tla bonang taba tsa khapo ka morao ho se kotsi.” 19Eitse Judase a sa ntse a bua mantsoe ana, sehlopha sa lihloela sa be se se se ropoha thabeng. 20Tsa bona hore mabotho a habo tsona a se a hlotsoe, 'me le liahelo tsa 'ona li se li hotelitsoe; ho qoba ha mosi ho ne ho li pakela tse etsahetseng. 21Ha lira li bona tsena, tsa keneloa ke tšabo, le ke ho bona Judase thoteng a ntse a itokisetsa ho futuha, 22'me tsa baleha kaofela ho leba naheng ea Bafilesita. 23Joale Judase a khutla ho tla bokella khapo e liahelong tsa tsona. Ba fumana khauta le silefera e ngata, masela a bohlokoa a 'mala o moputsoa le o perese, esita le maruo a mang a mangata. 24Ha ba khutlela hae, ba rorisa 'me ba leboha Molimo ea leholimong, ba re: “Morena o molemo; mohau oa hae ke oa kamehla eohle.” 25Tsatsing leo Baiseraele ba pholosoa ka mokhoa o moholo.
Ho hloloa Lisiase
26Balichaba ba ileng ba phonyoha ba potlaka ho ea bolella Lisiase tsohle tse etsahetseng. 27Ha Lisiase a utloa tsena, a makala haholo, a ba a khathala matla, hobane lintho li sa ka tsa hlahela Iseraele joalokaha a ne a hopotse, esitana le kamoo khosi e neng e laetse kateng. 28Eare selemong se hlahlamang seo, a bokella ba litaaso ba likete tse mashome a tšeletseng, ba khethehileng, 'moho le bapalami ba likete li hlano, a itokisetsa ho loantša Bajuda. 29Ba kena Idumea 'me ba lara Bete-Sure. Judase a ba futuhela a e-na le bahlabani ba likete li leshome. 30Ha a bona kamoo mabotho a Lisiase e kang a matla kateng, Judase a rapela, a re: “U bokoe, uena Mopholosi oa Iseraele ea ileng a fenya bohale ba seqhobane ka letsoho la mohlanka oa hao Davida, ua ba ua neelana ka liahelo tsa Bafilesita matsohong a Jonathane, mora oa Saule, le ho mojari oa lihlomo tsa hae! 31Ka mokhoa o tšoanang, ak'u atametse mabotho ana liatleng tsa sechaba sa hao sa Iseraele, ba tle ba hlajoe ke lihlong ka mphi ea bona le bapalami ba eona. 32Ak'u ba kenyetse tšabo, e le hore matla a bona ao ba a tšepileng a tepelle, ba thothometsoe ke ho bona timelo ea bona. 33Ba lahle fatše ka sabole ea batho ba u ratang, 'me bohle ba tsebang Lebitso la hao ba ke ba fumane monyetla oa ho u tlotlisa ka lithoko tsa bona.”
34Joale ba futuhelena, 'me ntoeng ena ha bolaoa bahlabani ba mabotho a Lisiase ba ka etsang likete tse hlano. 35Eare ha Lisiase a hlokomela hore batho ba hae ba baleha, le hore batho ba Judase joale ba ikutloa ba le sebete hoo ba loanelang ho phela kapa ho shoa senna, a leba Antiokia, 'me a thaotha bahlabani hore a boele a ee Judea ka bongata bo fetang ba pele.
Tlhoekiso ea Tempele
36Eaba Judase le bana babo ba re: “Bonang, lira tsa rona joale li fentsoe; a re nyoloheleng Jerusalema, re hloekise le ho khakola Qalo e halalelang.” 37Mabotho kaofela a khobokana, a nyolohela thabeng ea Sione. 38Ba fumana Sehalalelo se se na motho, aletare e silafalitsoe, mamati a chesitsoe lore, mapatlelong ho metse lihlahla, li entse moru eka thabeng, le matlo a baprista a helelitsoe. 39Ba hahola liaparo tsa bona, ba lla seboko, ba tlola molora lihloohong tsa bona, 40'me ba oela fatše ka lifahleho. Ba letsa literompeta tsa mokhosi 'me ba hoeletsa leholimong.
41Joale Judase a khetha banna ba tla ea ho loantša ba neng ba setse ba lisitse Qhobosheane, ha bona ba ntse ba hloekisa Qalo e halalelang. 42A khetha har'a baprista batho ba se nang koli, ba chesehellang Molao. 43Ba hloekisa Qalo e halalelang, ba theta majoe a silafalitsoeng, ba a thetela sebakeng se sa hloekang. 44Ba nt'o buisana ka hore na joale ba tla etsa joang ka aletare ea mahlabelo a licheso e neng e silafalitsoe; 45'me ba fihlela qeto e nepahetseng ea hore e qhaqholloe, esere mohlomong ea e-ba sekhobo ho bona, hobane balichaba ba ne ba e tlontlolotse. Ba e heletsa. 46Ba bea majoe a eona kae-kae thabeng ea Tempele, sebakeng se a lokelang, ho fihlela ho hlaha moporofeta ea ka eletsang hore na ho etsuoe eng ka 'ona. 47Joale ba nka majoe a sa betloang, ho latela Molao, 'me ba haha aletare e ncha e tšoanang le ea khale. 48Ba haha Tempele bocha 'me ba hlohonolofatsa tse ka hare ho eona le mapatlelo a eona. 49Ba etsa thepa e ncha, 'me ba kenya ka Tempeleng seluloana sa mabone, aletare ea mokubetso le tafole. 50Ba chesa mokubetso holim'a aletare, ba hotetsa mabone a seluloaneng, a ileng a khanya ka Tempeleng. 51Ba bea linkhoa tsa bohobe holim'a tafole, ba fanyeha masira a Tempele, ba phetha mesebetsi eohle eo ba neng ba hopotse ho e etsa.
52Ba tsoha ka meso mohla letsatsi la mashome a mabeli a metso e mehlano la khoeli ea borobong, e leng khoeli ea Kiseleve, selemong sa lekholo le mashome a mane a metso e robeli, 53'me ba nyehela sehlabelo, ho ea ka Molao, holim'a aletare e ncha ea mahlabelo a licheso eo ba e hahileng. 54Ka ho ea ka nako le ka ho ea ka letsatsi leo balichaba ba ileng ba silafatsa aletare ka lona, ka letsatsi lona leo aletare ea khakoloa bocha ka lifela, ka likatara, ka liharepa le ka meropa. 55Batho bohle ba itiha fatše ka lifahleho, ba khumamela Molimo 'me ba boka Ea maholimong ea ba fileng katleho.
56Ba qeta matsatsi a robeli ba ntse ba ketekela khakolo ea aletare; ba nyehela mahlabelo a licheso ka thabo, le mahlabelo a pholoho le a teboho. 57Ba khabisa sefahleho sa Tempele ka mefapahlooho ea khauta le ka lithejana; ba nchafatsa liheke le matlo a baprista, ba li kenyetsa mamati. 58Joale ea e-ba thabo e kholo har'a batho, 'me ha felisoa sekhobo se bakiloeng ke balichaba. 59Judase, le bana babo le phutheho eohle ea Iseraele, ba rera hore, selemo le selemo, matsatsi ao a robeli a khakolo ea aletare a bolokoe e le a mokete, nakong ea 'ona, ho tloha letsatsing la mashome a mabeli a metso e mehlano la khoeli ea Kiseleve; e be thabo le monyaka.
60Ka nako eo ba haha holim'a thaba ea Sione marako a phahameng le litora tse tenya ho pota thaba, esere balichaba ba tla e hatakela ka maoto, joalokaha ba se ba ile ba etsa pele. 61Judase a bea lebotho moo ho e sireletsa. A ba a tiisa, ho e sireletsa, Bete-Sure, e le hore sechaba se be le qhobosheane e bapileng le Idumea.
