Boholo ba Molimo le bofokoli ba motho
1Thapelo ea Moshe, mohlanka oa Molimo.
Morena, u bile setšabelo sa rōna
melōkong eohle.
2Lithaba li e-s'o be teng,
le lefatše, le tsohle-tsohle
li e-s'o hlahe,
haesale u le Molimo
ea se nang bofelo.
3U khutlisetsa motho lerōleng,
u re: “Khutlang, bana ba batho.”
4Mahlong a hao lilemo tse sekete
li ka letsatsi la maobane
le seng le fetile,
li ka nakoana ea bosiu.
5U felisa batho hang-hang,
e be e ke ke toro,
ba ka joang bo melang hoseng.
6Hoseng boa mela, bo palese;
mantsiboea boa pona, bo omelle.
7Re felisoa ke khalefo ea hao,
re thōthōmetsoa ke bohale ba hao.
8Makhopo a rōna ua a bona,
libe tsa rōna tse patehileng
ua li bea pontšeng ea hao.
9Litšiu tsa rōna tsohle
lia khutsutala,
li khutsufatsoa ke bohale ba hao,
lilemo tsa rōna
li feta joaloka mofehelo.
10Litšiu tsa ho phela ha rōna
ke lilemo tse mashome a supileng;
ha re phela hantle,
li mashome a robeli.
Empa bongata ba tsona
ke ba litsietsi le mahlomola;
li feta kapele, ebe re ile.
11Ke mang ea ka tsebang
matla a bohale ba hao,
le ho tšabeha ha khalefo ea hao?
12Kahoo re rute
ho bala litšiu tsa rōna,
pelo tsa rōna li tle li hlalefe.
13Ak'u boele u re hopole, Morena!
U tla lieha ho fihlela neng?
Qenehela bahlanka ba hao.
E sa le hoseng,
14re sitse ka mohau oa hao,
re tle re u etsetse litlatse,
re thabe ka matsatsi 'ohle.
15Ak'u re thabise
ka matsatsi a lekanang
le ao u re hlōkōfalitseng ka 'ona,
le ka lilemo tse lekanang
le tseo re bileng malimabe,
ra ba malimabe ka tsona.
16Ak'u bonahatse mosebetsi oa hao
ho bahlanka ba hao,
le khanya ea hao
ho bana ba bona.
17Morena Molimo oa rōna
a ke a be mosa ho rōna,
a atlehise mosebetsi
oa matsoho a rōna,
e, a atlehise mosebetsi
oa matsoho a rōna.
