Litšepiso tsa Molimo ho Davida
1Pesalema ea Etane oa Moesera, e nang le thuto.
2Ke tla bina tsa mohau oa Morena,
ke li bine kamehla,
ka molomo oa ka ke tla tsebisa
melōko eohle botšepehi ba hao;
3hobane u itse:
“Mohau oa ka
o hlola kamehla eohle,
botšepehi ba ka
bo theiloe maholimong.
4“Ke entse selekane
le mokhethoa oa ka,
ke hlapanyelitse Davida,
mohlanka oa ka, ka re:
5‘Ke tla etsa hore lelōko la hao
le hlole kamehla eohle,
ke tiise terone ea hao
melōkong eohle.’ ”
6Morena, maholimo aa boka,
a boka limakatso tsa hao,
a bolela botšepehi ba hao
phuthehong ea bahalaleli.
7Ke mang, maholimong,
ea ka lekanngoang le Morena?
Ke mang ea tšoanang le Morena,
har'a bara ba Molimo?
8Phuthehong ea bahalaleli
Molimo o tšajoa haholo,
o hlomphuoa haholo
ke bohle ba mo teetseng hare.
9Morena, Molimo oa mabōtho,
ke mang ea kang uena?
Morena, uena ea matla,
botšepehi ba hao ke kobo ea hao.
10Ke uena
ea busang leoatle le befileng,
ke uena
ea khutsisang maqhubu a bilohang.
11Ke uena
ea qhemelitseng Rahaba,
ua mo qhemetsa joaloka setōpō,
ka tsoho la hao le matla
u qhalakantse lira tsa hao.
12Maholimo ke a hao,
le lefatše ke la hao;
lefatše le tsohle tse ho lona
ke uena ea li theileng.
13Leboea le boroa
ke uena ea li hlolileng,
Tabore le Heremone
li etsetsa lebitso la hao litlatse.
14U sefea, letsoho la hao le matla;
letsoho la hao le letona le phahame.
15Ho loka le toka
ke mothèo oa terone ea hao,
mohau le botšepehi
li u eteletse pele.
16Ho lehlohonolo sechaba
se tsebang ho etsa mehoo ea thabo,
se tsamaeang khanyeng
ea sefahleho sa hao, Morena,
17se thabelang lebitso la hao kamehla,
se phahamisoang
ka baka la ho loka ha hao.
18Ke uena matla
ao se ithorisang ka 'ona,
u re tsosa molota
ka ho rata ha hao.
19Thebe ea rōna ke ea Morena,
khosi ea rōna
ke ea Ea Halalelang oa Iseraele.
20Ua na ua bua le batšepuoa ba hao,
ua bua le bona ka pono, ua re:
“Ke thusitse mohale,
ka phahamisa ea khethiloeng,
ea khethiloeng har'a sechaba.
21Ke fumane Davida,
mohlanka oa ka,
ka mo tlotsa
ka ole ea ka e halalelang.
22Seatla sa ka se tla mo tšehetsa,
letsoho la ka le mo matlafatse.
23Ha ho sera se tla mo tsometsa,
le ea khopo a ke ke a mo hlōla.
24Ba mo loantšang
ke tla ba ripitla mahlong a hae,
ke fenye ba mo hloileng.
25Botšepehi ba ka le mohau oa ka
li tla ba le eena,
ka lebitso la ka o tla tsoha molota.
26Ke tla namisa 'muso oa hae
ho ea fihla Leoatleng,
le puso ea hae ho ea fihla linōkeng.
27O tla re ho 'na: ‘U ntate,
uena Molimo oa ka,
lefika le mpholosang.’
28'Na ke tla mo etsa letsibolo,
a phahamele likhosi tsohle,
khosi tsa lefatše.
29Ke tla mo hauhela kamehla,
selekane sa rōna le eena
e tla ba se tiileng.
30Ke tla etsa hore lelōko la hae
le hlole kamehla eohle,
le terone ea hae e be teng
ha maholimo a ntse a le teng.
31“Haeba bara ba hae
ba furalla Molao oa ka,
ba sa latele likahlōlo tsa ka;
32ha ba tlōla litaelo tsa ka,
ba sa bōlōke melao ea ka;
33ke tla ba khalemella litlōlo tsa bona,
ke ba khalemelle tsona ka thupa,
le melato ea bona ka phafa.
34Feela nke ke ka mo amoha Davida,
ka mo amoha mohau oa ka,
ka koeneha botšepehing ba ka.
35Nke ke ka koenehela selekane sa ka;
seo ke se buileng
nke ke ka se fetohela.
36Ke hlapantse hanngoe feela
ka lebitso la ka le halalelang:
Ha nka ke ka thetsa Davida.
37Lelōko la hae le tla hlola kamehla,
terone ea hae e be teng
ha letsatsi le ntse le le pel'a ka;
38e hlole kamehla joaloka khoeli,
paki eo e tšepahalang
e maholimong.”
39Leha ho le joalo,
u halefetse motlotsuoa oa hao,
ua mo lahla, ua mo nyelisa.
40U hlakotse selekane sa hao
le mohlanka oa hao,
ua silafatsa mofapahlooho oa hae,
ua o silafatsa lerōleng.
41U lihile metero eohle ea hae,
metse ea hae e hahelelitsoeng
oa e fetola masupi.
42Bo-mofeta-ka-tsela bohle
Ba mo hapetse tsa hae,
a fetoha sesomo
ho bao a ahisaneng le bona.
43U matlafalitse matsoho
a ba mo loantšang,
ua thabisa lira tsohle tsa hae.
44U thithibantse bohale
ba sabole ea hae,
ua se ke ua mo tšehetsa ntoeng.
45U mo amohile lere la puso,
ua lihela terone ea hae fatše.
46U khutsufalitse matsatsi,
matsatsi a bocha ba hae,
ua etsa hore a apareloe ke lihlong.
47Morena, u tla ipata ho fihlela neng?
Khalefo ea hao
e tla tuka, e tuke joaloka mollo
ho fihlela neng?
48Morena, ak'u hopole
bokhutšoanyane ba bophelo,
hopola hore batho bohle
u ba bōpetse lefeela.
49Na motho o teng ea ka phelang,
'me a se ke a shoa,
ea ka itopollang
matleng a Qalo ea Bafu?
50Morena, o kae mohau oa hao,
mohau oa hao oa pele,
oo ka botšepehi ba hao
u o hlapanyelitseng Davida?
51Ak'u hopole ho hlapaoloa
ha bahlanka ba hao, Morena!
Ke jere linyeliso tse ngata
tsa lichaba ka sefubeng sa ka.
52Morena, lira tsa hao li re hlapaotse,
li setse motlotsuoa oa hao morao
li ntse li mo hlapaola.
53Ho bokoe Morena kamehla eohle!
Amen. Amen.
