LIPESALEMA 12

₂Re pholose Morena,

batšepuoa ba felile;

botšepehi ha bo sa le eo

ho bana ba batho.

₃Batho ba bolellana mashano,

maleme a bona a monate,

empa ke bo-teme-peli.

₄Morena a ke a felise bohle,

bohle ba maleme a monate,

le bohle ba melomo e ikakasang,

₅e leng batho ba reng:

“Re tla hlōla ka maleme a rōna;

re tseba ho ipuella,

ke mang ea ka re busang?”

₆Morena o re:

“Ka baka la ho tujoa ha bahlōphehi,

le la ho lumaela ha mafutsana,

joale ke kena lipakeng;

ke tla ba fa pholoho

eo ba e hloretseng.”

₇Lipolelo tsa Morena

ke lipolelo tse hloekileng,

li ka silefera

e qhibilisitsoeng sebōping,

silefera e hloekisitsoeng hasupa.

₈Ke uena Morena, ea re lebelang,

ea re sireletsang kamehla

molōkong ona,

₉ho ba khopo ba tletseng hohle,

ha bosōrō bo tōtile

har'a bana ba batho.