LIPESALEMA 116

₁Ke rata Morena,

hobane o utloile thapeli ea ka,

₂a ntšekehela tsebe,

mohla ke neng ke ipiletsa ho eena.

₃Marapo a lefu a ne a ntlamile,

maraba a Qalo ea Bafu

a ntšoasitse,

ka ba matsoalong le masoabing.

₄Eaba ke rapela lebitso la Morena,

ka rapela, ka re: “Oho, Morena,

ak'u pholose bophelo ba ka.”

₅Morena o mosa, o lokile,

Molimo oa rōna

o na le kutloelo-bohlōkō.

₆Morena o baballa ba hlokang mano,

a na a mpholosa ha ke ne ke fokola.

₇Moea oa ka,

ak'u boele u khatholohe,

hoba Morena

o u etselitse tse molemo.

₈O mpholositse lefung,

a ntlhakola meokho,

a mphemisa ho khoptjoa;

₉ke tla tsamaea

pontšeng ea Morena,

lefatšeng la ba phelang.

₁₀Ke ne ke ntse ke tšepile, ha ke re:

“Ke tšoenyehile haholo.”

₁₁Pherekanong ea ka ka ba ka re:

“Ha ho motho ea tšepahalang!”

₁₂Ke tla buseletsa Morena ka'ng,

bakeng sa melemo eohle

eo a nketselitseng eona?

₁₃Ke tla nyehela ka mohope,

hobane ke pholositsoe,

'me ke rapele lebitso la Morena.

₁₄Ke tla phetha likano tsa ka,

ke li phethe ho Morena,

pontšeng ea sechaba sohle sa hae.

₁₅Lefu la batšepuoa ba hae

ke ntho ea bohlokoa

mahlong a Morena.

₁₆Ruri, Morena,

ke mohlanka oa hao,

mora oa lekhabunyane la hao;

u tlamolotse litlamo tsa ka.

₁₇Ke tla u nyehella

ka sehlabelo sa teboho,

'me ke rapele lebitso la Morena.

₁₈Ke tla phetha likano tsa ka,

ke li phethe ho Morena,

pontšeng ea sechaba sohle sa hae,

₁₉mabaleng a ntlo ea Morena,

bohareng ba hao,

uena Jerusalema.

Haleluja!