Molimo oa 'nete o mong feela
1U se ke ua re nea tlōtla, Morena,
u se ke ua e nea rōna,
u mpe u e nee lebitso la hao,
ka baka la mohau oa hao
le botšepehi ba hao.
2Ke'ng ha balichaba ba ka re:
“O kae Molimo oa bona?”
3Molimo oa rōna o maholimong,
o etsa tsohle tse mo khahlang.
4Melimo ea bona
ke ea silefera le ea khauta,
ke mosebetsi oa matsoho a batho.
5E na le melomo, empa ha e bue;
e na le mahlo, empa ha e bone.
6E na le litsebe, empa ha e utloe;
e na le linko, empa ha e fōfōnele.
7E na le matsoho, empa ha e tšoare;
e na le maoto, empa ha e tsamaee;
ha ho molumo
o tsoang qoqothong tsa eona.
8Ba e etsang
ba ke ba tšoane le eona,
ba be joalo bohle ba e tšepang.
9Lōna ba ntlo ea Iseraele,
tšepang Morena:
Ke eena thuso le thèbè ea lōna.
10Lōna ba ntlo ea Arone,
tšepang Morena:
Ke eena thuso le thèbè ea lōna.
11Lōna ba tšabang Morena,
tšepang Morena:
Ke eena thuso le thèbè ea lōna.
12Morena o nts'a re hopotse,
o tla re hlohonolofatsa;
a hlohonolofatse
ba ntlo ea Iseraele,
a hlohonolofatse
ba ntlo ea Arone,
13a hlohonolofatse bohle,
bohle ba tšabang Morena,
ba banyenyane 'moho le ba baholo.
14Morena a ke a le ngatafatse,
lōna le bana ba lōna.
15Morena a ke a le hlohonolofatse,
eena ea entseng maholimo
a etsa le lefatše.
16Maholimo ke maholimo a Morena,
lefatše lona
o le neile bana ba batho.
17Hase bafu ba ka rorisang Morena,
leha e le ba theohetseng lebitleng.
18Empa ke rōna ba phelang
ba ka bokang Morena,
ho tloha joale le kamehla eohle.
Haleluja!
