Juda e tla sebeletsa Nebukadenesare
1Tšimolohong ea puso ea Jehoeakime, mora oa Josiea, khosi ea Juda, lentsoe la Morena la fihla ho Jeremia, la re: 2Morena o bua tjena ho 'na: “Iketsetse marapo le lijoko, u li tlamelle molaleng oa hao. 3Ebe u rōmela molaetsa ho khosi ea Edomo, le ho khosi ea Moabe, le ho khosi ea Baamone, le ho khosi ea Tire, le ho khosi ea Sidone; u o rōmele ka maqōsa a tlileng Jerusalema ho Sedekiea, khosi ea Juda. 4U laele maqōsa ao hore a tle a re ho beng ba 'ona: ‘Morena oa mabōtho, Molimo oa Iseraele, o bua tjena: Bolellang beng ba lōna, le re: 5Ka matla a ka, le ka letsoho la ka le otlolohileng, ke 'na ea entseng lefatše, le motho, le liphoofolo tse teng lefatšeng, 'me tsena tsohle ke li nea eo ke fumanang ho lokela ho mo nea tsona. 6Joale linaha tsena tsohle ke le neile mohlanka oa ka, Nebukadenesare, khosi ea Babilona; ke bile ke mo neile le liphoofolo tsohle tsa naha hore li mo sebeletse. 7Lichaba tsohle li tla mo sebeletsa, li sebeletse le mora oa hae le setlōhōlō sa hae, ho fihlela nako e baletsoeng naha ea hae e fihla, ebe joale lichaba tse ngata, le likhosi tse matla, li mo sebelisa kamoo li ratang kateng.
8“ ‘Empa haeba 'muso kapa sechaba se hana ho sebeletsa Nebukadenesare, khosi ea Babilona, se hana ho liha melala ea sona tlas'a joko ea khosi ea Babilona, sechaba seo ke tla se bolaea ka sabole, le ka sekoboto, le ka lefu la seoa, ho fihlela ke se timetsa ka letsoho la Nebukadenesare,’ ho rialo Morena. 9‘Ka baka leo, lōna le se ke la mamela baporofeta ba lōna, kapa linōhe tsa lōna, kapa mathuela a lōna, kapa baupi ba lōna, kapa baloi ba lōna, ba reng ho lōna: Le ke ke la sebeletsa khosi ea Babilona. 10Ba le porofetela leshano, hore le tle le isoe hōle le naha ea lōna, 'na ke tle ke le leleke, ebe lea timela. 11Empa sechaba se tla liha molala oa sona tlas'a joko ea khosi ea Babilona, se e sebeletse, sona ke tla se tlohela se 'ne se be naheng ea sona, se e leme, se phele ho eona,’ ho rialo Morena.”
12Le ho Sedekiea, khosi ea Juda, ka bua 'ona mantsoe ana 'ohle, ka re: “Lihang melala ea lōna tlas'a joko ea khosi ea Babilona, le e sebeletse, le tle le phele. 13Ke ka baka la'ng ha uena le sechaba sa hao le rata ho bolaoa ka sabole, le ke sekoboto, le ke lefu la seoa, joalokaha Morena a boletse malebana le sechaba se sa tl'o sebeletsa khosi ea Babilona? 14Ka baka leo, le se ke la mamela mantsoe a baporofeta ba reng ho lōna: ‘Le ke ke la sebeletsa khosi ea Babilona,’ hobane ba le porofetela leshano. 15Baporofeta bao ha kea ba rōma, ho rialo Morena, empa ba porofeta leshano ka lebitso la ka, hore ke tle ke le leleke, 'me lōna le baporofeta bao le tle le shoe.”
16Le ho baprista le sechaba sohle ka bua, ka re: “Morena o re: Le se ke la mamela mantsoe a baporofeta ba lōna, ba le porofetelang, ba re: ‘Bonang, haufinyane thepa ea Tempele ea Morena e tla khutlisoa Babilona,’ hobane ba le porofetela leshano. 17Le se ke la ba mamela; le sebeletse khosi ea Babilona, le tle le phele. Ke ka baka la'ng ha le rata hore motse oo o tle o fetohe lesupi? 18Empa haeba e le baporofeta, 'me eba mantsoe a bona ke a Morena, a ba ke ba rapele Morena oa mabōtho hona joale, hore thepa e setseng ka Tempeleng ea Morena, le ka tlung ea khosi ea Juda le Jerusalema, e se ke ea isoa Babilona.
19“Morena oa mabōtho o bua tjena malebana le litšiea le tanka eo baprista ba tollang ka ho eona le litšehetso le thepa e setseng motseng ona, 20eo Nebukadenesare, khosi ea Babilona, a sa kang a e nka ha a ne a thōpa Koniea, mora oa Jehoeakime, khosi ea Juda, a mo thōpa Jerusalema, a mo isa Babilona, le mahosana 'ohle a Juda le Jerusalema; 21e, Morena oa mabōtho, Molimo oa Iseraele, o bua tjena malebana le thepa e setseng ka Tempeleng ea Morena, le ka tlung ea khosi ea Juda le Jerusalema: 22‘E tla nkoa, e isoe Babilona, 'me e tla ba moo ho fihlela letsatsi leo ke tla e lata ka lona,’ ho rialo Morena, ‘'me mohlang oo ke tla nyoloha le eona, ke e khutlisetse sebakeng sena.’ ”
