Hananiea, moporofeta oa bohata
1Ka khoeli ea bohlano ea selemo sa bone sa ho qaleha ha puso ea Sedekiea, khosi ea Juda, ka sona selemo seo, Hananiea, mora oa moporofeta Asure, ea neng a e-tsoa Gibeone, a bua ho 'na re le ka Tempeleng ea Morena, moo ho leng teng baprista le sechaba sohle, a re: 2“Morena oa mabōtho, Molimo oa Iseraele, o bua tjena, o re: ‘Ke robile joko ea khosi ea Babilona! 3Ho e-s'o fete lilemo tse peli, thepa eohle ea Tempele ea Morena, eo Nebukadenesare, khosi ea Babilona, a neng a e nke mona, a e isa Babilona, ke tla e khutlisetsa hape sebakeng sena. 4Le Koniea, mora oa Jehoeakime, khosi ea Juda, ke tla mo khutlisetsa mona hape, hammoho le bathōpuoa bohle ba Juda ba neng ba isoe Babilona, hobane ke tla roba joko ea khosi ea Babilona,’ ” ho rialo Morena.
5Joale moporofeta Jeremia, moo baprista le sechaba sohle se neng se eme ka Tempeleng ea Morena se ntseng se le teng, a araba moporofeta Hananiea. 6Moporofeta Jeremia a re: “A ho be joalo! Morena a ke a etse joalo! Morena a phethahatse mantsoe a hao, ao u a porofetileng; a ke a khutlise thepa ea Tempele ea Morena, le bohle ba ileng ba thōpuoa, ba khutle Babilona, ba tle koano. 7Leha ho le joalo, mamela lentsoe lena leo ke le buang litsebeng tsa hao, le litsebeng tsa sechaba sena sohle. 8Ho tloha mehleng ea khale baporofeta ba bileng teng pele ho 'na le pele ho uena, ba 'nile ba porofetela linaha tse ngata le mebuso e matla, ba porofeta ntoa le koluoa le lefu la seoa. 9Ha mantsoe a moporofeta ea porofetang khotso a phethahala, ho tla tsejoa hore moporofeta eo o ne a fela a rōnngoe ke Morena.”
10Joale moporofeta Hananiea a nka joko e neng e le molaleng oa moporofeta Jeremia, a e roba. 11Hananiea a bua moo sechaba sohle se ntseng se le teng, a re: “Morena o bua tjena: ‘Ho e-s'o fete lilemo tse peli, joko ea Nebukadenesare, khosi ea Babilona, e melaleng ea lichaba tsohle, ke tla e roba ka oona mokhoa ona.’ ” Eaba moporofeta Jeremia oa itsamaela.
12Hoba moporofeta Hananiea a robe joko e neng e le molaleng oa moporofeta Jeremia, lentsoe la Morena la fihla ho Jeremia, la re: 13“Tsamaea u e'o bolella Hananiea, u re: ‘Morena o bua tjena: U robile joko ea lehong, empa bakeng sa eona ba tla fumana joko ea tšepe. 14Morena oa mabōtho, Molimo oa Iseraele, o bua tjena: Ke beile joko ea tšepe holim'a melala ea lichaba tsena tsohle, hore li tle li sebeletse Nebukadenesare, khosi ea Babilona. Li tla mo sebeletsa, 'me ke bile ke mo neile le liphoofolo tsa naha.’ ”
15Joale moporofeta Jeremia a re ho moporofeta Hananiea: “Mamela mona, uena Hananiea! Morena ha a ea u rōma, empa uena u etsa hore sechaba sena se tšepe leshano! 16Ka baka lena, Morena o bua tjena: ‘Ke tla u felisa lefatšeng mona! Ka sona selemo sena u tla shoa, hobane u rutile sechaba ho koenehela Morena!’ ”
17Eaba Hananiea o shoa ka khoeli ea bosupa ea sona selemo seo.
