1Ke mang ea lumelang
seo re se bolelang?
Tsoho la Morena
le bonahalitsoe ho mang?
2Mohlanka oa Morena
o metse pel'a hae joaloka lehlomela,
joaloka motso o melang
mobung o omeletseng.
O n'a hloka sebōpeho
kapa bokhabane ba ho re hohela,
ha re mo talima
bōpeho sa hae se sa re khahle.
3O ile a nyelisoa,
a furalloa ke batho,
ea e-ba motho oa mahlomola,
ea tsebang mahlōkō.
A tšoana le eo batho
ba tšabang le ho mo talima;
o ile a nyelisoa,
ra se ke ra mo natsa.
4Ruri o ipelesitse mahlōkō a rōna,
maloetsi a rōna
le 'ona a inkela 'ona,
empa rōna ra hopola
e le ea otloang, ea shapuoang,
le ho hlōkōfatsoa ke Molimo.
5O il'a hlajoa
ka baka la litšito tsa rōna,
a tetetsoa
ka baka la libe tsa rōna,
kotlo e re tlisetsang khotso
ea mo oela holimo,
ra folisoa ke maqeba a hae.
6Rōna bohle
re tšoana le linku tsa malahleha,
motho ka mong
o iketse ka tselana ea hae,
Morena o 'melesitse makhopo
a rōna bohle.
7O il'a tlatlapuoa,
a ikokobetsa ha a hlōkōfatsoa,
empa ha ho letho
leo a il'a le bua;
a qhōjoa sa konyana
ha e isoa tlhabong,
'me joalokaha nku e sa lle
ha e kutoa,
le eena ha ho letho
leo a il'a le bua.
8A khannoa ka likhoka,
a ahlōloa ntle ho toka,
ba lelōko la hae
ba se ke ba mo natsa.
A tlosoa har'a ba phelang
ba fatše lena,
a bolaoa ka baka la makhopo
a chaba sa ka.
9O n'a hopoletsoe
ho epeloa mabitleng a ba khopo,
le hoja
a ne a e-s'o ka a etsa phoso,
le leshano le e-s'o tsoe
molomong oa hae;
empa ha a s'a shoele
a epeloa bitleng la morui.
10Ho ratile Morena
hore a tetetsoe, a hlōkōfatsoe,
bophelo ba hae e be nyehelo
e tlosang sebe;
kahoo o tla bona litlōhōlō tsa hae,
matsatsi a bophelo ba hae a lelefale,
thato ea Morena
e atlehisoe ke letsoho la hae.
11Ha moea oa hae
o s'o hlōkōfalitsoe,
o tla bona tholoana
tsa ho hlōkōfatsoa ha hae.
Mohlanka oa ka ea lokileng
o tla lokafatsa,
a lokafatse ba bangata
ka tsebo ea hae,
a be a jare le makhopo a bona.
12Kahoo o tla ba le seabo
har'a ba baholo,
khapo eona
a e arolelane le linatla,
hobane bophelo ba hae
o il'a bo tella lefu,
a ba a balelloa le baetsalibe.
o il'a itjarisa libe,
libe tsa ba bangata,
'me baetsalibe a ba rapella.
