Morena o tla lopolla Jerusalema
1Tsoha! Tsoha!
U matlafale uena Sione!
Uena Jerusalema,
motse o halalelang,
apara aparo tsa hao,
aparo tse majabajaba,
maqai le ba sesila
ba ke ke ba hlola ba kena,
ba kena ho uena.
2Hlōhlōra lerōle le ho uena,
uena Jerusalema,
u eme, u lule teroneng,
uena Jerusalema.
Khaola mahlaahlela
a molaleng oa hao,
uena morali oa Sione,
u leng mothōpuoa.
3Morena o bua tjena:
“Le ile la rekisoa
ntle ho chelete,
le tla be le lopolloe
ntle ho chelete.”
4Morena Molimo o bua tjena:
“Chaba sa ka se ile sa ea Egepeta
ho jaka teng,
hamorao Baasiria ba se tuba
ntle ho mabaka!”
5Morena o re:
“Ebe joale moo ke bona'ng?
Chaba sa ka se thōpiloe
ntle ho lebaka,
babusi ba sona baa soma,”
ho rialo Morena.
“Bitso la ka le nyefoloa kamehla.
6Kahoo chaba sa ka
se tla tseba lebitso la ka,
mohlang oo se tsebe
hore ke 'na ea buang.
E, efela ke 'na ea buang.”
7A matle hakaakang maoto
a ba tsamaeang holim'a lithaba,
bona ba tlisang molaetsa o molemo,
ba phatlalatsang taba tsa khotso
ba tlisang molaetsa o molemo,
ba phatlalatsang taba tsa topollo,
ba reng ho Sione:
“Molimo oa hao oa busa!”
8Mamelang,
bōhōli tsa lōna lia hōoeletsa,
li hōoeletsa hammoho ka thabo,
hobane ka mahlo a tsona lia bona,
li bona ha Morena a khutlela Sione.
9Binang, pina tsa thabo
le li bine le le 'moho,
binang lōna masupi a Jerusalema,
hobane Morena o tšelisitse,
a tšelisa sechaba sa hae,
Morena o lopolotse Jerusalema.
10Morena o bontšitse tsoho la hae
le halalelang,
a le bontša moo chaba tsohle
li ntseng li bona,
pheletso tsohle tsa lefatše
li tla bona,
li bone ho pholosa
ha Molimo oa rōna.
11Tsamaeang! Tsamaeang
le tlohe mona!
Le se ame letho le silafetseng!
Tsoang Babilona le itlhoekise,
lōna ba nkang lijana tsa Morena.
12Ha le na ho tsoa le potlakile
kapa le baleha,
hobane Morena
o tla le etella pele,
Molimo oa Iseraele
o tla le sireletsa serao.
Mohlanka ea hlōkōfatsoang
13Bonang, mohlanka oa ka
o tla atleha,
o tla tlōtloa, a thōhōletsoe,
a phahamisetsoe tulong tse holimo.
14Batho ba bangata
ba ne ba mo makaletse,
tšobotsi ea hae e n'e senyehile
ho feta ea bohle,
sebōpeho sa hae
se sa tšoane le sa batho.
15Empa chaba tse ngata
li tla mo makalla,
khosi li fetohe limumu
kapele ho eena,
hobane li tla be li bona,
seo li e-s'ong ho se bolelloe,
seo li e-s'ong ho se utloe,
li tla se utloisisa.
