ESAEA 39

₁Ka eona nako eo, Merodake-Baladane, mora oa Baladane, khosi ea Babilona, a rōmela mangolo le limpho ho Hesekiea, hobane o ne a ile a utloela tsa ho kula ha hae le ho fola ha hae. ₂Hesekiea a thabela litaba tsa maqosa, 'me a a bontša matlotlo a ntlo ea hae. A a bontša silefera le khauta le linōko le litlolo tsa bohlokoa, le ntlo ea hae ea lihlomo le tsohle tse ka matlōleng a hae. Ha hoa ka ha e-ba le letho le ka tlung ea hae, le 'musong oa hae, leo Hesekiea a sa kang a a bontša lona.

₃Eaba moporofeta Esaea o fihla ho khosi Hesekiea, o re ho eena: “Banna baa ba itse'ng? Ba itse ba tsoa kae?”

Hesekiea a araba, a re: “Ba tlile ho 'na ba e-tsoa naheng e hōle, Babilona.”

₄Moporofeta Esaea a re: “Ba bone eng ka tlung ea hao?”

Hesekiea a araba, a re: “Ba bone tsohle tse ka tlung ea ka. Ha ho letho ka matlōleng a ka leo ke sa ba bontšang lona.”

₅Eaba Esaea o re ho Hesekiea: “Mamela lentsoe la Morena ea matla 'ohle: ₆‘Mehla ea tla eo ka eona tsohle tse ka tlung ea hao, le tsohle tseo bontat'ao ba li bolokileng ho fihlela joale, li tla isoa Babilona. Ha ho letho le tla sala,’ ho rialo Morena. ₇Ba bang ba bara ba hao, ba tla tsoaloa ke uena, ba tla thōpuoa, e e'o ba bahlanka ka tlung ea khosi ea Babilona.”

₈Eaba Hesekiea o re ho Esaea: “Lentsoe la Morena, leo u le boletseng, le lokile.” Ka pelong ea hae o ne a re: “Mehleng ea ka re tla phela ka khotso, re sireletsehile.”