Ho kula le ho fola ha khosi Hesekiea
1Mehleng eo Hesekiea a kulela lefu. Eaba moporofeta Esaea, mora oa Amose, o fihla ho eena, o re: “Morena o bua tjena: ‘Lokisa tsa lelapa la hao, hobane u tla shoa; u ke ke ua hlola u phela.’ ”
2Joale Hesekiea a retelehela leboteng, a rapela Morena, a re: 3“Oho, Morena, kea u kōpa: Ak'u hopole kamoo ke u sebelelitseng kateng ka botšepehi, le ka pelo e se nang mano, 'me ka etsa tse lokileng mahlong a hao.” Eaba Hesekiea o lla habohlōkō.
4Lentsoe la Morena la fihla ho Esaea, la re: 5“E-ea, u bolelle Hesekiea, u re: ‘Morena Molimo oa ntat'ao-moholo Davida, o bua tjena: Ke utloile thapelo ea hao, 'me ke bone meokho ea hao. Ke tla eketsa litšiu tsa hao ka lilemo tse leshome le metso e mehlano. 6Uena le ba motse ona, ke tla le namolela matsohong a khosi ea Asiria. Motse ona ke tla o sireletsa.
7“ ‘Pontšo ea hore Morena o tla phethisa seo a se buileng ke ena: 8Moriti oa letsatsi o holim'a letlapa le supang nako, le entsoeng ke Akase, ke tla o chechisetsa morao ka mehato e leshome.’ ” Eaba moriti o chechella morao ka mehato e leshome eo o neng o se o e tsamaile.
9Eare hoba Hesekiea, khosi ea Juda, a fole, a ngola sefela sena, a re:
10“Ke ne ke itse:
Ke tla falla ke sa le mocha,
ke theohele khorong
ea Qalo ea Bafu,
hobane ke amohiloe
lemo tsa bophelo ba ka,
tse sa setseng.”
11Ka ba ka re:
“Ha ke sa tla bona Morena
fatšeng la ba phelang,
le motho ha ke sa tla 'mona
har'a baahi ba lefatše.
12Leaho la ka le qhaqholotsoe,
le tlositsoe ho 'na,
le qhaqholotsoe
joaloka motebo oa molisana.
Tšiu tsa ka li khaotsoe
sa selohi se khaola likhoele,
khoele tse lohang lesela,
tsa ba tsa khaoloa
joalokaha tšoēlē e khaoloa.
Ka linako tsohle
ke ne ke re o tla ntimetsa.
13Ka sesa bosiu
ke ntse ke lla ke bohlōkō,
joalokaha eka tau e nthoba masapo,
ka linako tsohle
ke ne ke re o tla ntimetsa.
14Ka lla sa lefokotsane
kapa sa mohololi,
ka kuruetsa sa leebana-khōroana.
Mahlo a ka a khathetse
ke ho lelalela holimo,
Morena, ke litlallong,
tloo, u tl'o nthusa.”
15Empa joale ke tla re'ng?
O buile ho 'na,
sena se entsoe ka eena,
ke tla ikokobetsa ka lemo tsohle
ha ke ntse ke phela,
le hoja pelo ea ka eona e le bohloko.
16“Morena, batho ba phela
har'a tse joalo,
moea oa ka le oona
o matlafatsoa ke tsona;
ak'u mpuseletse bophelo,
ke tle ke phele.
17Bohloko ba pelo ea ka
bo fetohile pholoho,
rato la hao
le mphemisitse lemena la timelo,
u furaletse libe tsohle tsa ka.
18Qalo ea Bafu e ke ke ea u rorisa,
lefu le ke ke la u binela pina,
ba theohelang lebitleng
ha ba ka ke ba u tšepa.
19Ke ea phelang, ea phelang feela,
ea ka u rorisang joaloka 'na.
Ntat'a bana o ba ruta
tsa botšepehi ba hao.
20Morena ke eena ea tla mpholosa;
ka matsatsi 'ohle
a ho phela ha rōna,
re tla 'minela ka liletsa
tse nang le likhoèlè,
re 'minele
re le ka Tempeleng ea hae.”
21Eaba Esaea o re: “Tlisang polokoana ea mangangajane a feiee, le e tlamelle holim'a lethōpa, 'me o tla fola.”
22Hesekiea a botsa, a re: “Pontšo ea hore ke tla nyolohela Tempeleng ea Morena e tla ba efe?”
