Litoro tsa Josefa
1Jakobo a aha naheng eo ntat'ae a neng a jakile ho eona, naheng ea Kanana.
2Tsena ke litaba tsa lelapa la Jakobo.
Josefa ha a e-na le lilemo tse leshome le metso e supileng o ne a lisa mehlape le bana babo. Moshanyana enoa o ne a e-na le bara ba Bileha le Silepa, basali ba ntat'ae, 'me Josefa a bolella ntat'ae litaba tsa bona tse mpe.
3Iseraele o ne a rata Josefa ho feta bana ba hae bohle, hobane e ne e le ngoana eo a mo fumanetseng boqhekung ba hae, 'me a mo etsetsa seaparo se selelele, se fihlang matsohong le maotong. 4Ha bana babo ba bona hore ntat'a bona o mo rata ho feta bana babo kaofela, ba mo hloea, ba se ke ba 'muisa ka khotso.
5Eaba Josefa o lora toro, 'me ha a e phetela bana babo, ba mo hloea ka ho fetisa. 6A re ho bona: “Utloang toro eo ke e lorileng: 7Re ne re tlama lihlopha tšimong, 'me ka bona sehlopha sa ka se tsoha, se ema tsoèè! Ka bona lihlopha tsa lōna li ema, li se pota-pota, 'me li se khumamela.”
8Bana babo ba re ho eena: “Na ruri u tla re busa? Kapa na ruri u tla rena holim'a rōna?” Ba tsoela pele ho mo hloea haholo, ka baka la litoro tseo tsa hae, le ka baka la lipolelo tseo tsa hae.
9A boela a lora toro e 'ngoe, 'me a e phetela bana babo, a re: “Mamelang, ke lorile toro e 'ngoe hape: letsatsi, le khoeli, le linaleli tse leshome le motso o mong li ne li nkhumamela.”
10Empa eare ha a phetela ntat'ae le bana babo toro eo, ntat'ae a mo omanya, a re ho eena: “Ke toro 'ngoe ee, eo u e lorileng? Na ruri 'na, le 'm'ao, le bana beno, re tla u khumamela?” 11Bana babo ba mo hōnōhela, empa ntat'ae eena a 'na a nahana polelo eo.
Josefa oa rekisoa
12Eaba bana babo ba ea Shekeme ho ea alosa mohlape oa ntat'a bona. 13Iseraele a re ho Josefa: “Ha ke re bana beno ba aloselitse Shekeme? Tloo, ke u rōme ho bona.”
Josefa a re ho eena: “E, ho lokile.”
14Eaba Iseraele o re ho eena: “Ak'u ee, u e'o bona hore na bana beno ba ntse ba phela hantle, le mohlape na, 'me u khutle u tl'o mpolella.” Ha a mo rōma ba ne ba le khohlong ea Heborone. Josefa a tsamaea, a ea fihla Shekeme.
15Monna e mong a mo fumana a ntse a lelera har'a naha, 'me monna eo a 'motsa, a re: “U batla'ng?”
16Josefa a re: “Ke batla bana beso; ak'u mpolelle hle, moo ba aloselitseng teng.”
17Monna eo a re: “Ba se ba tlohile; ke ile ka ba utloa ba re: ‘A re eeng Dotane.’ ”
Eaba Josefa o latela bana babo, 'me a ba fumana Dotane. 18Ba 'mona a sa le hōle, 'me eare a e-s'o atamele ho bona ba rera ho 'molaea.
19Ba buisana, ba re: “Ralitoro ke eo a e-tla. 20Tloong joale, re 'molaeeng, re mo akheleng ka ho le leng la malumela. Re tla re sebatana se mo jele, 'me re tla bona hore na litoro tsa hae li tla fella kae.”
21Empa ha Rubene a utloa hona, a mo namolela matsohong a bona, a re: “A re se keng ra 'molaea.” 22A boela a re: “Se tšolleng mali; mo akheleng ka lelumeleng lena le lehoatateng, empa le se ke la mo isa matsoho.” E ne e le hore a tle a mo namolele matsohong a bona, a mo khutlisetse ho ntat'ae.
23Eare ha Josefa a fihla ho bana babo, ba mo hlobolisa seaparo sa hae se fihlang matsohong le maotong, seo a neng a se apere; 24ba mo nka, ba mo akhela ka lelumeleng. Lelumela lena le ne le se na letho, le se na metsi.
25Joale ba lula fatše, ba e-ja. Eare ha ba phahamisa mahlo ba bona mokoloko oa Baishemaele ba tsoang Gileade, ba le leetong, ba ea Egepeta, likamele tsa bona li belesitsoe boroku, le litlolo, le 'mira.
26Eaba Juda o re ho bana baho: “Re tla boelloa ke eng, ha re bolaea ngoan'abo rōna, 'me re pata mali a hae? 27Tloong, re mo rekiseng ho Baishemaele, 'me re se ke ra mo isa matsoho, hobane ke ngoan'abo rōna, ke nama ea rōna.” Bana babo ba lumela.
28Eare ha bahoebi ba Midiane ba feta, ba hula Josefa, 'me ba mo ntša ka lelumeleng, ba mo rekisa ho Baishemaele ka silefera e kang boima ba likeramo tse makholo a mabeli le mashome a mararo, 'me bao ba ea le eena Egepeta.
29Ha Rubene a khutlela lelumeleng, 'me a bona hore Josefa ha a eo ka lelumeleng, a hahōla liaparo tsa hae, 30a khutlela ho bana babo, a re: “Moshanyana ha a eo; ekaba ke tla leba kae?”
31Joale ba nka seaparo sa Josefa, ba bolaea potsanyane, ba ina seaparo seo maling. 32Ba rōmela seaparo seo se fihlang matsohong le maotong, sa isoa ho ntat'a bona, 'me ba re: “Re fumane ntho ena; ak'u bone hore na ke seaparo sa mora oa hao, kapa che.”
33Iseraele a se tseba, 'me a re: “Ke seaparo sa mora oa ka! Sebatana se mo jele; ruri Josefa o tsekolotsoe ke sebatana!”
34Jakobo a hahōla liaparo tsa hae, a itlama letheka ke lesela le mahoashe, a llela mora ona hae ka matsatsi a mangata. 35Bara ba hae bohle, le barali ba hae bohle, ba ema ka maoto ho mo tšelisa, empa a se ke a tšeliseha, a mpa a re: “Ke tla theohela Qalong ea Bafu, ho mora oa ka, ke ntse ke lla.” Kahoo ntat'ae a mo llela.
36Bamidiane ba rekisa Josefa Egepeta, ho Potifaro, tōna ea Faro le mookameli oa balebeli.
