TŠIMOLOHO 36

₁Lena ke lelōko la Esau, e leng Edomo.

₂Esau o ile a nyala basali ba Bakanana: Ke Ada, morali oa Elona oa Mohete; Oholebama, morali oa Ana, mora oa Sibone oa Mohife; ₃le Basemate, morali oa Ishemaele, khaitseli ea Nebajote.

₄Ada a tsoalla Esau Elefase; Basemate a tsoala Reuele, ₅'me Oholebama a tsoala Jeushe, le Jalame, le Kora. Bana ke bara ba Esau ba tsoaletsoeng naheng ea Kanana.

₆Joale Esau a nka basali ba hae, le bara ba hae, le barali ba hae, le bohle ba lelapa la hae; le likhomo tsa hae, le liphoofolo tsa hae kaofela, le maruo 'ohle ao a a fumaneng naheng ea Kanana; a ea naheng ea Seire, hōle le ngoan'abo Jakobo. ₇Maruo a bona a ne a le mangata hoo ba neng ba ke ke ba aha 'moho; naha eo ba neng ba jakile ho eona e ne e ke ke ea hlola e ba phelisa, ka baka la mehlape ea bona. ₈Eaba Esau o aha lithabeng tsa Seire. Esau ke Edomo.

₉Lena ke lelōko la Esau, eo e leng ntat'a Baedomo ba phelang lithabeng tsa Seire.

₁₀Ana ke mabitso a bara ba Esau: Elefase, mora oa Ada, mosali oa Esau; Reuele, mora oa Basemate, mosali oa Esau.

₁₁Bara ba Elefase e ne e le Temana, le Omare, le Sefo, le Gatame, le Kenase. ₁₂Timina e ne e le mosali oa lefielo oa Elefase, mora oa Esau, 'me eo a tsoalla Elefase Amaleke. Bana ke bara ba Ada, mosali oa Esau.

₁₃Bara ba Reuele ke bana: Nahate, le Sera, le Shamma, le Misa. Bana ke bara ba Basemate, mosali oa Esau.

₁₄Bana ke bara ba Oholebama, morali oa Ana, mora oa Sibone, mosali oa Esau. O ile a tsoalla Esau Jeushe, le Jalame, le Kora.

₁₅Ana ke mahosana a bara ba Esau.

Bara ba Elefase, letsibolo la Esau, ke bo-khosana Temana, le Omare, le Sefo, le Kenase, ₁₆le Kora, le Gatame, le Amaleke. Ana ke mahosana a tsoetsoeng ke Elefase, naheng ea Edomo; ke bara ba Ada.

₁₇Bana ke bara ba Reuele, mora oa Esau: bo-khosana Nahate, le Sera, le Shamma, le Misa. Ana ke mahosana a tsoetsoeng ke Reuele, naheng ea Edomo. Ke bara ba Basemate, mosali oa Esau.

₁₈Bana ke bara ba Oholebama, mosali oa Esau: Bo-khosana Jeushe, le Jalame, le Kora. Ana ke mahosana a tsoetsoeng ke Oholebama, morali oa Ana, mosali oa Esau.

₁₉Bana ke bara ba Esau, eo e leng Edomo, 'me ana ke mahosana a bona.

₂₀Bana ke bara ba Seire oa Mohore, bao e leng baahi ba naha: Lotane, le Shobale, le Sibone, le Ana; ₂₁le Dishone, le Esere, le Dishane; ana ke mahosana a Bahore, bara ba Seire oa naha ea Edomo.

₂₂Bara ba Lotane e ne e le Hori le Memame, 'me khaitseli ea Lotane e ne e le Timina.

₂₃Bana ke bara ba Shobale: Alefane, le Manahate, le Ebale, le Shefi, le Oname.

₂₄Bana ke bara ba Sibone: Aea le Ana. Enoa ke Ana eane oa ho fumana seliba sa metsi a chesang, lehoatateng, ha a ntse a alositse litonki tsa ntat'ae Sibone.

₂₅Bana ke bara ba Ana: Dishone, le Oholebama, morali oa ana.

₂₆Bana ke bara ba Dishone: Hemedane, le Eshebane, le Jiterane, le Kerane.

₂₇Bana ke bara ba Esere: Bilehane, le Saafane, le Akane.

₂₈Bara ba Dishane ke Use le Arane.

₂₉Ana ke mahosana a Bahore: bo-khosana Lotane, le Shobale, le Sibone, le Ana, ₃₀le Dishone, le Esere, le Dishane. Ana ke mahosana a Bahore, ho ea ka merabe ea 'ona, naheng ea Seire.

₃₁Tsena ke likhosi tse busitseng naheng ea Edomo, ho e-s'o be le khosi e busang Baiseraele.

₃₂Bela, mora oa Beore, a na a busa Edomo, 'me lebitso la motse oa hae e ne e le Dinehaba. ₃₃Bela a shoa, 'me Jobaba, mora oa Sera oa Bosera, a busa bakeng sa hae. ₃₄Jobaba a shoa, 'me Hushame oa naheng ea Batemana, a busa bakeng sa hae. ₃₅Hushame a shoa, 'me Hadade, mora oa Bedade, ea neng a hlōle Bamidiane naheng ea Moabe, a busa bakeng sa hae. Lebitso la motse oa hae e ne e le Afite. ₃₆Hadade a shoa, 'me Samela oa Masereka a busa bakeng sa hae. ₃₇Samela a shoa, 'me Shaule oa Rehobote e lebōpong la Euferatese, a busa bakeng sa hae. ₃₈Shaule a shoa, 'me Baale-Hanane, mora oa Akabore, a busa bakeng sa hae. ₃₉Baale-Hanane, mora oa Akabore, a shoa, Hadare a busa bakeng sa hae, 'me lebitso la motse oa hae e le Pau. Lebitso la mosali oa hae e ne e le Mehetabela, morali oa Materede, morali oa Me-Sahabe.

₄₀Ana ke mabitso a mahosana a tsoetsoeng ke Esau, ho ea ka malapa a 'ona, le ka libaka tseo a ahileng ho tsona, le ka mabitso a 'ona: bo-khosana Timina, le Alefa, le Jetete, ₄₁le Oholebama, le Ela, le Pinone, ₄₂le Kenase, le Temana, le Mebisare, ₄₃le Magedeele, le Irame. Ana ke mahosana a Edomo, ke ho re Esau, ntat'a Baedomo, ho ea ka libaka tseo a ahileng ho tsona, naheng eo e leng ea 'ona.