1 TIMOTHEA 2

₁Pele ho tsohle, ke khothaletsa hore likōpo, lithapelo, lithapello le liteboho li etsetsoe batho bohle, ₂le likhosi le bohle ba hlomphehang, e le hore re tle re phele bophelo ba boiketlo le ba khotso ka borapeli le ka boitlhompho. ₃Hona ho hotle, 'me ho khahlisa Molimo, Mopholosi oa rōna, ₄ea ratang hore batho bohle ba pholohe, 'me ba tsebe 'nete. ₅Molimo o mong, le 'moelanyi pakeng tsa Molimo le batho o mong, e leng Kreste Jesu eo e leng motho, ₆ea ikentseng tefello ea bohle. Bopaki ba hona bo ile ba bonahala ka nako ea teng. ₇Ke ka baka lena ke khethetsoeng ho ba sebōhōli le moapostola, le moruti oa balichaba ea rutang tumelo le 'nete; ke bua 'nete, e seng leshano.

₈Ke lakatsa hore libakeng tsohle banna ba rapele, ba phahamise matsoho a se nang molato, ho se khalefo kapa ngangisano.

₉Ka mokhoa o joalo, liaparo tsa basali e be tse lokelang. Ba ikhabise ka tšoanelo le ka boitlhompho, e seng ka ho fora moriri, kapa ka mekhabiso ea khauta, kapa ka mabenyane a bohlokoa, kapa ka liaparo tse theko e boima. ₁₀Ba ikhabise ka liketso tse lokileng, tse tšoanelang basali ba ipolelang hore ba hlompha Molimo.

₁₁Mosali a mamele thuto a khutsitse, ka boikokobetso bohle. ₁₂Ha ke lumelle mosali ho ruta kapa ho laola monna, empa o lokela ho khutsa, ₁₃hobane Adama o ile a bōptjoa pele, ea nt'o ba Eva. ₁₄Hase Adama ea ileng a thetsoa, ke mosali ea ileng a thetsoa, 'me a tlōla molao. ₁₅Empa basali ba tla pholosoa ka ho beleha bana, ha feela ba tiisetsa tumelong, le leratong, le khalalelong, 'me ba itlhompha.