1 TIMOTHEA 1

₁'Na Paulosi, moapostola oa Kreste Jesu, ka taelo ea Molimo Mopholosi oa rōna, le ea Jesu Kreste, tšepo ea rōna, ₂ke lumelisa Timothea, ngoan'aka oa sebele tumelong, ke re: Mohau, lereko le khotso ea Molimo Ntate le ea Kreste Jesu, Morena oa rōna, li ke li be le uena.

₃Joalokaha ke se ke ile ka u khothaletsa ha ke e-ea Masedonia, u 'ne u lule Efese, u tle u laele ba bang hore ba se ke ba ruta thuto esele. ₄Ba se ke ba natsa litšōmo le litaba tse sa feleng tsa melōko ea baholo-holo. Tse joalo ke tse bakang likhang, hase tse phethahatsang morero oa Molimo o tsejoang ka tumelo. ₅Sepheo sa taelo ena ke ho ba isa leratong le tsoang pelong e hloekileng, le letsoalong le khutsitseng, le tumelong e se nang boikaketsi. ₆Ka ho fapoha tsena, ba bang ba khelohetse lipolelong tsa bosaoana. ₇Ba batla ho ba baruti ba Molao, empa ba hloka kutloisiso ea tseo ba li bolelang, leha e le ea tseo ba li buang ba sa thekesele.

₈Rea tseba hore molao o lokile, haeba motho a o sebelisa ka nepo. ₉Feela ho ke ho tsejoe hore molao ha oa etsetsoa ba lokileng, empa o etselitsoe ba sa lokang le litlōkōtsebe, ba khopo le baetsalibe, ba sa halaleleng le ba sebeletsang lefatše, ba bolaeang bo-ntat'a bona le bo-'m'a bona, ba bolaeang batho, ₁₀lihlola, ba janang maotoana, ba rekisang makhoba, ba leshano, ba ikanang ka leshano, le bohle ba etsang eng kapa eng e fapaneng le thuto ea 'nete. ₁₁Thuto ena ke e lumellanang le molaetsa o molemo oo ke o tšepetsoeng, o tsoang ho Molimo ea tlōtlehang, ea lehlohonolo.

₁₂Ke leboha ea 'matlafalitseng, e leng Kreste Jesu Morena oa rōna, hobane o nkukile ke le ea tšepahalang, a ba a nkhethela ho ba mosebeletsi oa hae, ₁₃leha pele ke ne ke le monyefoli, le mohlorisi, le moikakasi. Empa ke ile ka hauheloa, kaha tsena ke li entse ke sa tsebe, ke e-s'o be le tumelo. ₁₄Morena oa rōna a ntšitsa ka mohau o mongata oa hae, le ka tumelo le lerato leo re nang le lona ho Kreste Jesu.

₁₅Ke lentsoe la 'nete, le lokelang ho amoheloa ke bohle ka ho tlala, le reng Kreste Jesu o tlile lefatšeng ho pholosa baetsalibe, bao 'na ke leng e mobehali har'a bona. ₁₆Empa ha e le mona ke hauhetsoe, e ne e le hore Kreste Jesu a bonahatse ka 'na mamello e tletseng ea hae, ke tle ke be mohlala ho bohle ba tlang ho lumela ho eena, e le hore ba fumane bophelo bo sa feleng. ₁₇Ho Khosi ea mehla eohle, ho Molimo ea sa shoeng, ea sa bonoeng, ea inotši, e be hlompho le tlōtla kamehla le mehla. A ho be joalo!

₁₈Timothea, ngoan'aka, ke ena taelo eo ke u fang eona, ho ea ka lipolelo tsa boporofeta bo boletsoeng ka uena. Ka tsona loanela Molimo senna, ₁₉u be le tumelo le letsoalo le khutsitseng. Ba bang ha baa ka ba mamela matsoalo a bona, 'me ba ile ba senyeheloa ke tumelo ea bona. ₂₀Har'a bona ho na le Hemenaiose le Alekesandere, bao ke ba neetseng Satane, ba tle ba ithute ho se nyefole.