1Yaba lentswe la Jehova wa makgotla le a tla, la re: 2Ho itswe ke Jehova wa makgotla: Ke boulela Sione ka poulelo e kgolo, ke bile ke o boulela ka kgalefo e kgolo.
3Ho itswe ke Jehova: Ke kgutletse Sione, mme ke ahile kahara Jerusalema; Jerusalema o bitswa motse wa nnete, thaba ya Jehova wa makgotla e bitswa thaba e kgethehileng!
4Ho itswe ke Jehova wa makgotla: Ho sa tla ba banna ba baholo le basadi ba baholo ba dulang mapatlelong a Jerusalema, ba tshwereng e mong le e mong lere la hae ka letsohong la hae, ka baka la bongata ba ditshiu tsa bona; 5mapatlelo a motse a tla tlala bashanyana le banana ba bapalang mapatlelong a wona.
6Ho itswe ke Jehova wa makgotla: Leha taba eo e ka ba thata mahlong a masala a setjhaba sena, matsatsing ao, na le mahlong a ka e ka ba thata, ho botsa Jehova wa makgotla?
7Ho itswe ke Jehova wa makgotla: Bonang, ke ya pholosa ba setjhaba sa ka lefatsheng la Botjhabela le lefatsheng la Bophirimela; 8ke tla ba tlisa, ba tle ba ahe kahara Jerusalema, mme e tla ba setjhaba sa ka, nna ke be Modimo wa bona ka nnete le ka ho loka.
9Ho itswe ke Jehova wa makgotla: Matsoho a lona a ke a tiye, lona ba utlwang mantswe ana a tswang melomong ya baporofeta tshiung tsena, e leng tseo ho theilweng ka tsona ntlo ya Jehova wa makgotla, e leng tempele, hore e hahuwe. 10Hobane pele ho tshiu tseo, moputso wa motho o ne o le siyo, le moputso wa phoofolo o ne o le siyo, mme ho ya yang le ho ya kgutlang ho ne ho se kgotso ka baka la sera; mme ke ne ke nehela batho bohle hore ba lwantshane. 11Empa jwale, ho masala a setjhaba sena, ha ke sa tla ba seo ke neng ke le sona tshiung tsa pele, ho bolela Jehova wa makgotla. 12Hobane peo ya kgotso e tla ba teng; morara o tla beha ditholwana tsa wona, lefatshe le behe dijo tsa lona, lehodimo le nee phoka ya lona, mme ntho tseo tsohle ke tla di nea masala a setjhaba sena, hore e be lefa la sona. 13Jwalokaha le kile la ba thohako hara ditjhaba, lona ntlo ya Juda, le lona ntlo ya Iseraele, ke tla le pholosa jwalo, mme le tla ba hlohonolofalo. Se tshoheng, matsoho a lona a ke a tiye!
14Hobane ho itswe ke Jehova wa makgotla: Jwalokaha ke ne ke hopole ho le etsa hampe, mohla bontata lona ba nkgalefisitseng, ho bolela Jehova wa makgotla, mme ke sa kang ka fetoha, 15ke boetse ke hopotse matsatsing ana ho etsa Jerusalema le ntlo ya Juda hantle. Se tshoheng! 16Empa tseo le tshwanetseng ho di etsa ke tsena: Bolelang nnete e mong le e mong ho wa habo; ahlolang ka nnete le ka kahlolo ya kgotso makgotleng a lona; 17le se ke la rerela banababo lona kotsi pelong tsa lona, le se ke la rata kano ya leshano; hobane tseo tsohle ke di hloile, ho bolela Jehova.
18Lentswe la Jehova wa makgotla la ntlela, la re: Ho itswe ke Jehova wa makgotla: 19Ho itima dijo ha kgwedi ya bone, le ho itima dijo ha ya bohlano, le ho itima dijo ha ya bosupa, le ho itima dijo ha ya leshome, ho tla fetohela ntlo ya Juda thabo le nyakallo le mekete e metle; feela, ithateleng nnete le kgotso.
20Ho itswe ke Jehova wa makgotla: Ho sa tla tla ditjhaba le baahi ba metse e mengata; 21baahi ba motse o mong ba tla ya ho ba o mong, ba ntse ba re: A re yeng! re yeng ho rapela sefahleho sa Jehova le ho batla Jehova wa makgotla! le rona, re tla ya! 22Ditjhaba tse ngata le merabe e matla e tla tla ho batla Jehova wa makgotla Jerusalema, le ho rapela sefahleho sa Jehova. 23Ho itswe ke Jehova wa makgotla: Tshiung tseo, banna ba leshome ba dipuo tsohle tsa ditjhaba ba tla itshwarella ka moseho wa kobo ya monna wa Mojuda, ba re: Re tla ya le lona, hobane re utlwile hoba Jehova o na le lona.
