PESALEME YA 41

₁Ho lehlohonolo ya hlokomelang ya lesitsi! ₂Jehova o tla mo lwela! Ka letsatsi le lebe, Jehova o tla mo sireletsa, a mo phedise; e tla ba motho ya lehlohonolo lefatsheng. O ke ke wa mo neela thatong ya bao e leng dira ho yena. ₃Jehova o tla mo tshehetsa, ha a le diphateng tsa bolwetse; o lokisa malao a hae kaofela bohlokong ba hae.

₄Ke ne ke itse: Jehova, o nkutlwele bohloko, o fodise moya wa ka, hobane ke o sitetswe. ₅Bao e leng dira ho nna ba ntsheba ka dipolelo tsa bolotsana, ba re: O tla shwa neng, lebitso la hae le tla fela neng? ₆Leha e mong wa bona a ka tla mpona, puo ya hae ke leshano; pelo ya hae e ipokeletse tsa bolotsana; ha a se a tlohile, o ya bo hasa kantle.

₇Bohle bao e leng dira ho nna ba wewetsana hodima ka, ba mpea molato ka kotsi e ntlhahetseng, ba re: ₈Lefu le lebe le ho yena; jwale, o rapaletse, ha a sa tla hlola a tsoha. ₉Esita le monna ya kgotsitseng ho nna, eo ke neng ke mo tshepile, ya neng a eja bohobe ba ka, o nthahile ka serethe.

₁₀Empa wena, Jehova, o nkutlwele bohloko, o ntsose, ke tle ke tsebe ho ba buselletsa se ba lokelang. ₁₁Pontsho ho nna ya hobane o a nthata, ke hoba ha o lese eo e leng sera ho nna hore a ithoke ka nna. ₁₂O mpolokile tokeng ya ka, mme o tla mpea pela hao ka ho sa yeng kae.

₁₃Ho roriswe Jehova, Modimo wa Iseraele, ho tloha ho bo sa qaleng, ho isa ho bo sa feleng! Amen, e, amen!