PESALEME YA 40

₁Ka na ka lebella Jehova ka ho tiya, a itshekamisetsa ho nna, a utlwa ho dumaela ha ka, ₂a nnyolla sekoting sa tshenyeho le tebetebeng ya diretse, a bea leoto la ka lefikeng, a tiisa mehato ya ka. ₃Molomong wa ka a bea sefela se setjha, dithoko tsa Modimo wa rona. Ba bangata ba tla bona hoo, ba tshabe, mme ba tshepe Jehova.

₄Ho lehlohonolo motho ya beang tshepo ya hae ho Jehova, ya sa tlwaeleng baikgantshi le ba ineetseng leshano. ₅Jehova, Modimo wa ka, e kgolo hakakang palo ya mehlolo le ya merero eo o re etseditseng yona! Ha ho ya ka e lokodisang pela hao; leha ke rata ho e bolela le ho e bala, e be e fete palo. ₆Ha o rate mahlabelo, leha e le dinyehelo; ke moo o ntokisitseng ditsebe; ha o kgahliswe ke ditjheso le mahlabelo a sebe. ₇Ke moo ke itseng: Bona, ke a tla, kamoo ho ngodilweng taba tsa ka kateng, mmenong wa buka. ₈Ho etsa ho ratwang ke wena, Modimo wa ka, ke sona seo ke se ratang, molao wa hao o ngodilwe pelong ya ka. ₉Ke bolela ho loka phuthehong e kgolo; ha ke a thiba melomo ya ka, Jehova; o a tseba. ₁₀Ha ke pate ho loka ha hao hara pelo ya ka, ke bolela botshepehi ba hao le poloko ya hao; ha ke a ka ka lobela phutheho e kgolo mohau wa hao le nnete ya hao.

₁₁Le wena, Jehova, o se ke wa nkganela le mehauhelo ya hao! Mohau wa hao le nnete ya hao a di ke di mpoloke kamehla! ₁₂Hobane ke teetswe hare ke dimpe tse sa balweng; ditlolo tsa ka di ntshwere, ke tshaba ho di bona; di ngata ho feta diqoba tsa moriri wa hlooho ya ka, ke fellwa ke pelo. ₁₃Oho Jehova, o ke o mpoloke; Jehova, phakisa ho tla nthusa. ₁₄A ba ke ba apeswe hammoho ke dihlong le ke maswabi, bona ba batlang bophelo ba ka, ho nkamoha bona! A ba suthe kasanthao ba tsielehile, bona bohle ba ratang tshenyeho ya ka! ₁₅A ba ke ba makale ke dihlong tsa bona, bona ba reng bakeng sa ka: Ha! Ha! ₁₆Bohle ba o batlang a ba ke ba thabe, ba nyakallele ho wena; ba lakatsang poloko ya hao ba ke ba re kamehla: Jehova a ke a hodiswe! ₁₇Haele nna, ke mofumanehi le mosenyehi; empa Morena o a nkgopola! O thuso ya ka le mopholosi wa ka; Modimo wa ka, o se ke wa dieha.