PESALEME YA 106

₁Bokang Jehova! Rorisang Jehova, hobane o molemo; hobane mohau wa hae ke o sa feleng! ₂Ke mang ya ka tsebang ho bolela diketso tse phahameng tsa Jehova, le ho bina dithoko tsa hae kaofela?

₃Ho lehlohonolo ba bolokang melao, ba etsang ka ho loka kamehla! ₄Jehova, o nkgopole ka baka la lereko la hao ho setjhaba sa hao; o ntlele ka poloko ya hao, ₅ke tle ke bone lehlohonolo la bakgethwa ba hao, ke ithabise ka thabo ya setjhaba sa hao, ke ithorise hammoho le lefa la hao.

₆Re sitilwe jwaloka bontata rona, re entse bokgopo le bobe. ₇Bontata rona ha ba ka ba nahana mehlolo ya hao Egepeta, ha ba ka ba elellwa bongata ba mehauhelo ya hao, ba mpa ba ikgantsha pela lewatle, Lewatle le Lefubedu. ₈Leha ho le jwalo, o ba bolokile ka baka la lebitso la hae, a tle a bonahatse matla a hae. ₉A kgalemela Lewatle le Lefubedu, la epsha; a ba tsamaisa hara madiba jwaloka hoja ke nahathothe. ₁₀A ba namolela letsohong la ya ba hloileng, a ba lwela letsohong la sera; ₁₁metsi a kgurumetsa batubi ba bona, ha ho a ka ha sala le a mong. ₁₂Yaba ba dumela mantswe a hae, ba bina dithoko tsa hae.

₁₃Empa ba phakisa ba lebala diketso tsa hae, ha ba ka ba tshepa merero ya hae; ₁₄ba kenwa ke takatso nahathothe, ba leka Modimo feelleng. ₁₅A ba nea ka takatso ya bona, empa a ba romela lefu le bolayang. ₁₆Ba honohela Moshe diahelong, le Aarone, mokgethwa wa Jehova. ₁₇Yaba lefatshe le a ngamoha, mme la metsa Dathane, la hohlometsa letshwele la Abirame. ₁₈Mollo wa hotela hara phutheho ya bona, malakabe a timetsa ba babe.

₁₉Ba iketsetsa namane Horebe, ba kgumamela setshwantsho se tsholotsweng, ₂₀kganya ya bona ba e fetola setshwantsho sa kgomo e fulang jwang. ₂₁Ba lebala Modimo, Molopolli wa bona, o neng o entse ntho tse kgolo Egepeta, ₂₂le mehlolo naheng ya Kama, le meeka Lewatleng le Lefubedu. ₂₃Wa re, o a ba fedisa; empa Moshe, mokgethwa wa wona, a kena dipakeng tsa wona le bona ho faposa bohale ba wona, hore ba se ke ba fediswa.

₂₄Ba kgesa naha e lakatsehang; ha ba ka ba dumela dipallo tsa wona, ₂₅ba mpa ba dumaduma ditenteng tsa bona, mme ha ba ka ba ela lentswe la Jehova hloko. ₂₆Ka baka leo, a emisa letsoho la hae, a hlapanya, a re o tla ba diha feelleng, ₂₇le ho lahlela lesika la bona hara ditjhaba, le ho ba hasanyetsa dinaheng tsohle.

₂₈Ba kgomarela Baale-Peore, ba eja mahlabelo a hlabetsweng bafu; ₂₉ba halefisa Modimo ka diketso tse mpe tsa bona, ho fihlela lefu le befileng le kena hara bona. ₃₀Ke ha Finease a hlaha, a pheteletsa Modimo, mme lefu leo la kgutsa; ₃₁taba eo a e ballwa, ya eba ho loka ho yena kamehla le mehla, le ka ho sa feleng.

₃₂Ba o baka bohale metsing a Meriba, mme Moshe a hlahelwa ke kotsi ka baka la bona; ₃₃hobane ba halefisa moya wa hae, mme a bua ka molomo wa hae ka potlako.

₃₄Hape, ha ba ka ba fedisa ditjhaba, jwalokaha Jehova a ne a ba laetse, ₃₅ba mpa ba ikopanya le ditjhaba, ba ithuta mekgwa ya tsona; ₃₆ba sebeletsa ditshwantsho tsa tsona, ya eba leraba ho bona. ₃₇Ba hlabela medimo ya bohata bara le baradi ba bona, ₃₈ba tsholla madi a se nang molato, madi a bara ba bona le a baradi ba bona, bao ba ba hlabetseng ditshwantsho tsa Kanana; mme naha ya silafala ke madi. ₃₉Ba itshela ditshila ka mesebetsi ya bona le ka diketso tsa bootswa ba bona.

₄₀Yaba kgalefo ya Jehova e tukela setjhaba sa hae, mme lefa la hae ya eba ntho e manyala ho yena; ₄₁a ba neela matsohong a ditjhaba; ba ba hloileng ba ba busa; ₄₂ba tujwa ke dira tsa bona, ba kokobetswa tlasa matsoho a tsona. ₄₃Hangata Jehova a ba lopolla, empa ba nna ba ikgantsha mererong ya bona, ba itahla ka bokgopo ba bona. ₄₄Leha ho le jwalo, a nna a tadima matshwenyeho a bona, a utlwa medumaelo ya bona; ₄₅a nna a elellwa selekane sa hae bakeng sa bona, a ba hauhela ka baka la mohau wa hae o moholo, ₄₆mme a ba fumantsha mohau ho bohle ba neng ba ba isitse kgolehong.

₄₇Jehova, Modimo wa rona, o re lopolle, o re bokelle, o re ntshe hara ditjhaba, re tle re binele lebitso la hao le halalelang, re ithorise kganyeng ya hao.

₄₈Ho roriswe Jehova, Modimo wa Iseraele, ho nka ho sa simoloheng ho isa ho sa feleng! Mme setjhaba kaofela se ke se re: Amen! Bokang Jehova!