PESALEME YA 105

₁Rorisang Jehova, le rapele lebitso la hae; tsebisang diketso tsa hae hara ditjhaba. ₂Mo roriseng ka dipina tsa lona, le nahane mehlolo ya hae kaofela! ₃Ithoriseng ka lebitso la hae le halalelang; pelo tsa ba batlang Jehova a di ke di thabe! ₄Batlang Jehova le matla a hae, le batle sefahleho sa hae kamehla! ₅Hopolang mehlolo ya hae eo a e entseng, le meeka ya hae, le dikahlolo tse tswileng molomong wa hae, ₆lona, lesika la Abrahama, mohlanka wa hae; lona, bana ba Jakobo, bakgethwa ba hae!

₇Jehova ke yena Modimo wa rona; dikahlolo tsa hae di aparela lefatshe lohle. ₈O hopola selekane sa hae ka ho sa yeng kae, le lentswe leo a le laoletseng meloko e sekete: ₉e leng selekane seo a neng a se hlabe le Abrahama, le kano eo a neng a e ane ho Isaaka, ₁₀eo a kileng a e etsa komelo e tiileng ho Jakobo, le selekane se sa feleng ho Iseraele, ₁₁a re: Ke tla o nea lefatshe la Kanana, e be kabelo ya lefa la lona. ₁₂Enere ba eso ho be bakae, ba sa fokotse, e sa le basele, ho lona, ₁₃ba ntse ba sepela le ditjhaba le mebuso le merabe, ₁₄ha a ka a lesa motho ho ba tuba, a laela marena ka baka la bona, a re: ₁₅Se ameng batlotsuwa ba ka, le se ke la etsa baporofeta ba ka hampe.

₁₆Yaba o biletsa naha eo tlala, a honyetsa kotlo yohle ya bohobe. ₁₇A romela motho ho ba etella pele; Josefa a rekelwa ho ba mofo ya ruwang. ₁₈Ba tshwasa maoto a hae ka difate, a phela jwalo ditshepeng, ₁₉ho fihlela mohla taba tseo a neng a di boletse di hlahang, mme lentswe la Jehova la mo leka. ₂₀Morena wa Egepeta a romela ho mo lokolla, mmusi wa ditjhaba a mo bulela monyako wa teronko, ₂₁a mmea morena wa ntlo ya hae, le mmusi wa maruo wohle a hae, ₂₂hore a tle a tlame mahosana a hae kamoo a ratang kateng, a rute matona a hae bohlale. ₂₃Ebile moo Iseraele a fihlang Egepeta, mme Jakobo a ba mojaki naheng ya Kama. ₂₄Jehova a atisa setjhaba sa hae haholo, sa eba matla ho fetisa dira tsa sona. ₂₅A fetola pelo tsa bona, ba ba ba hloya setjhaba sa hae, ba rera timelo ya bahlanka ba hae.

₂₆A roma Moshe, mohlanka wa hae, le Aarone, eo a neng a mo kgethile; ₂₇ba etsa meeka hara bona, le mehlolo naheng ya Kama. ₂₈A romela lefifi, a hlahisa botsho, ba se ke ba hana lentswe la hae. ₂₉A fetola metsi a bona madi, a fedisa dihlapi tsa bona. ₃₀Fatshe la bona la tlala dihohwana, tsa kena le ka matlung a marena a bona. ₃₁A bolela, mme ha tla dintsintsi le dinta dinaheng tsohle tsa bona. ₃₂A etsa dipula tsa bona sefako, a romela le malakabe a mollo naheng ya bona. ₃₃A otla merara ya bona le difeiye tsa bona, a robakanya difate tsa naha ya bona. ₃₄A bolela, mme ha tla tsie, tsie e sa balweng, ₃₅e kileng ya qeta jwang kaofela ba naha, ya bo qeta le tse bewang ke masimo a bona. ₃₆A otla le matsibolo kaofela naheng ya bona, e leng sehlooho sa bonna ba bona.

₃₇A ba ntsha ba nkile disilefera le dikgauta, ho se motho ya kgathalang melokong ya bona. ₃₈Baegepeta ba thabela ho tloha ha bona, hobane ba ne ba tshwerwe ke letsoso la bona. ₃₉A phutholla leru ho ba sireletsa, le mollo ho ba bonesetsa bosiu. ₄₀Yare ha ba kopa, a romela dikwekwe, a ba kgorisa ka bohobe ba lehodimo. ₄₁A patsola lefika, mme metsi a kolla ho lona, a matha feelleng ka diphororo. ₄₂Hobane o ne a hopotse lentswe la hae le kgethehileng, a hopotse le Abrahama, mohlanka wa hae. ₄₃A etsa hore setjhaba sa hae se tlohe ka thabo, le bakgethwa ba hae ka nyakallo. ₄₄A ba fa mafatshe a dijhaba, ba inkela mesebetsi ya merabe; ₄₅ba tle ba boloke ditaelo tsa hae, mme ba ye ka melao ya hae. Bokang Jehova!