LUKA 2

₁Mehleng eo, ha hlaha taelo ya Sesare Augusto, e reng, ho ngolwe palo ya baahi ba lefatshe lohle. ₂Palo eo ke ya pele, ya etswa Kuirine e le mmusisi wa Siria. ₃Yaba batho bohle ba ya ho ngolwa, e mong le e mong motseng wa habo.

₄Josefa le yena a tloha Galelea, motseng wa Nasaretha, a ya Judea, motseng wa Davida, o bitswang Bethlehema, etswe e ne e le motho wa ntlo ya Davida le wa leloko la hae; ₅ba ya ho ngolwa le Maria, mosadi eo a mo lebeleditseng, e neng e le moimana.

₆Ba sa le moo, matsatsi a ho beleha ha hae a phetheha; ₇a beleha mora wa hae wa letsibolo; a mo phuthela maseleng, mme a mo robatsa sejelong, kahobane ho ne ho se sebaka sa bona tlung ya baeti.

₈Ho ne ho le badisa naheng eo, ba phelang metebong, ba lebetse mehlape ya bona bosiu. ₉Jwale hang, lengeloi la Morena la ba hlahela, kganya ya Morena ya ba teela hare, mme ba tshaba ka tshabo e kgolo. ₁₀Lengeloi la re ho bona: Se tshabeng, hobane bonang, ke le bolella thabo e kgolo, e monate, eo e tla ba ya setjhaba kaofela; ₁₁ke ho re, kajeno, le tswaletswe Mmoloki, motseng wa Davida; ke Kreste, Morena. ₁₂Seo e tla ba pontsho ho lona, le tla fihlela lesea le phuthetsweng, le robaditsweng sejelong.

₁₃Yaba bongata ba makgotla a lehodimo bo phakisa bo eba le lengeloi leo, ba boka Modimo, ba re: ₁₄Kganya e be ho Modimo mahodimong a hodimo, kgotso e be lefatsheng ho batho bao o kgahlwang ke bona.

₁₅Eitse hobane mangeloi a ba tlohele ho kgutlela lehodimong, badisa ba buisana, ba re: A re hle re yeng Bethlehema, re tle re bone taba eo e hlahileng teng, eo Morena a re tsebisitseng yona. ₁₆Yaba ba phakisa ba eya, ba fihlela Maria, le Josefa, le lesea le robaditsweng sejelong. ₁₇Eitse hobane ba le bone, ba bolela kahohle taba tsa ngwana, tseo ba di boleletsweng. ₁₈Bohle ba utlwang, ba makala ke ditaba tseo ba di bolellwang ke badisa. ₁₉Haele Maria, a boloka ditaba tseo tsohle, a di nahana pelong ya hae. ₂₀Badisa bona ba kgutla, ba ntse ba rorisa Modimo, ba o boka ka baka la tsohle tseo ba di utlwileng, le tseo ba di boneng, kamoo ba di boleletsweng kateng.

₂₁Matsatsi a robileng meno e le mmedi a ho tla bolotsa ngwana ha a fetile, ba mo rea lebitso la Jesu, leo a neng a le reilwe ke lengeloi, a eso ho emolwe popelong. ₂₂Hobane ho fete matsatsi ao ba itlhatswang ka wona, ka molao wa Moshe, ba isa ngwana Jerusalema, ho mo hlahisa pela Morena; ₂₃jwalokaha ho ngodilwe molaong wa Morena, ho thwe: Ngwana e mong le e mong e motona wa letsibolo o tla bitswa mokgethwa wa Morena. ₂₄Ba ya le hore ba hlahise sehlabelo se laetsweng molaong wa Morena, sa maebanakgorwana a mabedi, leha e le sa madinyane a mabedi a maeba.

₂₅Ho ne ho na le monna Jerusalema, ya bitswang Simeone; monna eo o ne a lokile, a hlonepha Modimo, a lebeletse tshediso ya Iseraele; mme Moya o Halalelang o ne o le ho yena. ₂₆O ne a senoletswe pele ke Moya o Halalelang hoba a ke ke a bona lefu, a eso ho bone Kreste wa Morena. ₂₇A iswa tempeleng ke Moya o Halalelang; mme ngwana Jesu ha a tliswa ke baholo ba hae, ho tle ho etswe bakeng sa hae ka taelo ya molao, ₂₈a mo nkela matsohong a hae, a boka Modimo, a re: ₂₉Jwale, Monghadi, o lese mohlanka wa hao, a ye ka kgotso, ka polelo ya hao; ₃₀hobane mahlo a ka a bone poloko ya hao, ₃₁eo o e lokisitseng pontsheng ya ditjhaba kaofela, ₃₂hore e be lesedi le tla bonesa ditjhaba, le kganya ya Iseraele, setjhaba sa hao.

₃₃Josefa le mma ngwana ba ne ba makala ke ditaba tsohle tseo a bolelwang ka tsona. ₃₄Simeone a ba hlohonolofatsa, a re ho Maria, mma ngwana: Bona, ngwana enwa o beetswe ho wa le ho tsoha ha ba bangata Iseraeleng, le ho ba pontsho e hanyetswang; ₃₅le hona, lerumo le tla hlaba pelo ya hao, hore mehopolo ya dipelo tse ngata e tle e senolwe.

₃₆Hape, ho ne ho le Anna, moporofeta wa mosadi, moradi wa Fanuele, wa leloko la Asere; o ne a se a hodile haholo, a kile a ba le monna ka dilemo tse supileng ho tloha borwetsaneng ba hae; ₃₇mme jwale, e ne e se e le mohlolohadi wa dilemo tse batlileng ho ba mashome a robileng meno e le mmedi a metso e mene; o ne a sa tlohe tempeleng, empa o ne a sebeletsa Modimo ka ho itima dijo le ka ho rapela bosiu le motshehare. ₃₈Le yena a hlaha nakong yona eo, a boka Morena, mme a bolela tsa Jesu ho bohle ba lebeletseng topollo Jerusalema.

₃₉Eitse hobane ba phethe tsohle tse laetsweng molaong wa Morena, ba kgutlela Galelea, ba ya Nasaretha, motseng wa habo.

₄₀Haele ngwana a nna a hola, a ipha matla, a tlala bohlale; mme molemo wa Modimo wa nna wa dula ho yena.

₄₁Baholo ba hae ba ne ba eya Jerusalema ka dilemo tsohle, moketeng wa Paseka.

₄₂Eitse ha a le dilemo tse leshome le metso e mmedi, ba nyolohela Jerusalema ka mokgwa wa mokete. ₄₃Hobane ba qete matsatsi a mokete, ha ba se ba boela ha habo, ngwana Jesu a sala Jerusalema, Josefa le mmae ba sa tsebe. ₄₄Empa, ka ho re, ekaba o letshweleng, ba tsamaya letsatsi le le leng, ba ntoo mmatla hara metswalle ya bona le bao ba tsebanang le bona. ₄₅Ha ba sa mmone, ba boela Jerusalema, ba ntse ba mmatla. ₄₆Kamora matsatsi a mararo, ba mo fumana tempeleng, a dutse hara baruti, a ba mamela, a ba botsa. ₄₇Bohle ba mo utlwang ba ne ba tsota hlalefo ya hae le dikarabo tsa hae. ₄₈Ha ba mmona, ba makala haholo; mmae a re ho yena: Ngwana ka, o re etseditseng jwalo? O ka bona, ntatao le nna, re ne re o batla re tshohile haholo. ₄₉A re ho bona: Le ne le mpatlelang? Na le ne le sa tsebe hoba ke tshwanetse ho ba teng ditabeng tsa Ntate na? ₅₀Empa ha ba ka ba utlwisisa taba eo a ba bolellang yona. ₅₁Yaba o theoha le bona, a ya Nasaretha. O ne a ba utlwa; mme mmae a nna a boloka ditaba tseo kaofela pelong ya hae.

₅₂Mme Jesu a nna a hola hlalefong, le boemong, le molemong, pela Modimo le batho.