LUKA 1

₁Erekaha ba bangata ba se ba lekile ho pheta ka hlomahanyo ditaba tse phethahetseng hara rona, ₂kamoo re di neilweng kateng, ke ba iponetseng tsona ka sebele esale ho qaleng ha tsona, bao e bileng e leng bahlanka ba lentswe, ₃le nna, eitse hobane ke botsisise ditaba tsohle ho tloha ho hlaheng ha tsona, ke re, ho a ntshwanela hore ke o ngolle tsona ka lenaneo la tsona, Theofile ya kgabane, ₄o tle o tsebe ho tiya ha ditaba tseo o di rutilweng.

₅Mehleng ya Heroda, morena wa Judea, ho ne ho le moprista ya bitswang Sakaria, wa sehlopha sa Abia; mosadi wa hae e ne e le wa baradi ba Aarone, lebitso la hae e le Elisabetha. ₆Ba ne ba lokile pela Modimo ba babedi, ba tsamaya melaong yohle le ditaelong tsohle tsa Morena, ho se kamoo ba ka nyatsuwang kateng. ₇Empa ba ne ba se na ngwana, kahobane Elisabetha e ne e le nyopa, hape ba ne ba se ba hodile ba babedi.

₈Yare Sakaria ha a sebetsa tsa boprista pela Modimo ka tsatsi la sehlopha sa hae, ₉kamoo e leng mokgwa wa boprista kateng, a abelwa ho kena tempeleng ya Morena ho tjhesa dibano. ₁₀Bongata bohle ba setjhaba bo ne bo eme kantle, bo rapela nakong eo ho tjheswang dibano ka yona. ₁₁Yaba lengeloi la Morena le ipontsha ho Sakaria, le eme lehlakoreng le letona la aletare ya dibano. ₁₂Sakaria ha a le bona, a tshoha, mme tshabo ya mo wela hodimo. ₁₃Empa lengeloi la re o yena: Se tshabe, Sakaria, hobane thapelo ya hao e utlwilwe, mme mosadi wa hao Elisabetha o tla o tswalla mora, mme o tla mo rea lebitso la Johanne. ₁₄E tla ba thabo le nyakallo ho wena, mme ba bangata ba tla thabela ho tswalwa ha hae. ₁₅Hobane o tla ba moholo pela Morena, ha a ka ke a nwa veine le seno se tahang; o tla tlala Moya o Halalelang a sa le popelong ya mmae. ₁₆O tla sokollela bana ba Iseraele ba bangata ho Morena, Modimo wa bona; ₁₇o tla mo etella pele ka moya le ka matla a Elia, a tle a busetse dipelo tsa bontate baneng ba bona, le bahanyetsi bohlaleng ba ba lokileng, a tle a lokisetse Morena setjhaba se hlekehileng hantle. ₁₈Sakaria a re ho lengeloi: Taba tseo ke tla di tseba kang? hobane ke se ke hodile, mosadi wa ka le yena o se a tsofetse. ₁₉Lengeloi la araba, la re ho yena: Nna ke Gabriele, ya emang pela Modimo; ke romilwe ho bua le wena, le ho o bolella ditaba tsena tse monate. ₂₀Mme bona, o tla ba semumu, o sitwe ho bua, ho be ho fihle matsatsi ao ditaba tseo di tla etsahala ka wona, kahobane o sa ka wa dumela dipolelo tsa ka, tse tla etsahala nakong ya tsona.

₂₁Batho bona ba ne ba ntse ba lebeletse Sakaria kantle, ba maketse ke ho dieha ha hae ka tempeleng. ₂₂Yare ha a etswa, a sitwa ho bua le bona, mme ba lemoha hobane o bone mohlolo tempeleng, le yena a ba lekanyetsa jwalo; mme a sala e le semumu.

₂₃Yare matsatsi a tshebetso ya hae ha a fedile, a tloha, a kgutlela tlung ya hae. ₂₄Kamora matsatsi ao, Elisabetha, mosadi wa hae, a emola, mme a ipata ka kgwedi tse hlano, a re: ₂₅Ke sona seo Morena a nketseditseng sona, mohla a ntekotseng ho tlosa sekgobo sa ka hara batho.

₂₆Ka kgwedi ya botshelela, lengeloi Gabriele la romelwa ke Modimo motseng o mong wa Galelea, o bitswang Nasaretha, ₂₇ho morwetsana ya lebeleditsweng ke monna ya bitswang Josefa, wa ntlo ya Davida. Lebitso la morwetsana e ne e le Maria. ₂₈Lengeloi la kena ho yena, la re: Dumela, mohauhelwa: Morena o na le wena! O lehlohonolo hara basadi! ₂₉Maria, eitse ha a le bona, a tshoha ke polelo ya lona, mme a nahana hore tumediso ya lona e reng? ₃₀Lengeloi la re ho yena: Maria, se tshohe, hobane o bone mohau ho Modimo. ₃₁Bona, o tla emola, mme o tla tswala mora, mme o tla mo rea lebitso la Jesu. ₃₂O tla ba moholo, mme o tla bitswa Mora wa Ya hodimodimo; Morena Modimo o tla mo nea terone ya Davida ntatae. ₃₃O tla busa ntlo ya Jakobo ka ho sa feleng, mme borena ba hae ha bo ka ke ba eba le bofelo. ₃₄Empa Maria a re ho lengeloi: Taba eo e tla etsahala jwang, athe ha ke tsebe monna? ₃₅Lengeloi la araba, la re ho yena: Moya o Halalelang o tla theohela hodima hao, mme matla a Ya hodimodimo a tla o kgurumetsa; ka baka leo, ho halalelang ho tla tswalwa ke wena ho tla bitswa Mora Modimo. ₃₆Mme bona, Elisabetha, motswalao, le yena o emere mora botsofading ba hae; kgwedi ena e se e le ya botshelela ya ya neng a bitswa nyopa. ₃₇Hobane ha ho letho le ke keng la etswa ke Modimo. ₃₈Maria a re: Bona, ke lekgabunyane la Morena, a nke ke etswe ka polelo ya hao! Yaba lengeloi le tloha ho yena.

₃₉Matsatsing wona ao, Maria a tloha, a phakisa a ya maloting, motseng o mong wa Juda. ₄₀A kena tlung ya Sakaria, a dumedisa Elisabetha. ₄₁Eitse Elisabetha ha a utlwa tumediso ya Maria, ngwana a hlasimoloha popelong ya hae. Yaba Elisabetha o tlala Moya o Halalelang, ₄₂a phahamisa lentswe, a re: Ho lehlohonolo wena hara basadi, ho lehlohonolo le yona tholwana ya popelo ya hao. ₄₃Mme ho ntlhahela kae ha ke etelwa ke mma Morena ka? ₄₄O ka bona, lentswe la tumediso ya hao etsware ha le kena ditsebeng tsa ka, ngwana a hlasimoloha ke thabo popelong ya me. ₄₅Ho lehlohonolo ya dumetseng; hobane ditaba tseo a di boleletsweng ke Morena di tla etsahala.

₄₆Yaba Maria o re: Moya wa ka o rorisa Morena; ₄₇moya wa ka o inyakalletse ho Modimo, Mmoloki wa me; ₄₈hobane o tadimile bofutsana ba lekgabunyane la hae; mme jwale, meloko yohle e tla re, ke lehlohonolo, ₄₉hobane Ya matla o nketseditse tse kgolo. Lebitso la hae le a halalela; ₅₀mohau wa hae o melokong ya meloko ya ba mo tshabang. ₅₁O sebeditse ka matla ka letsoho la hae; o qhalantse ba ikgohomositseng mehopolong ya dipelo tsa bona; ₅₂o dihile babusi diteroneng tsa bona, mme o phahamisitse ba ikokobeditseng; ₅₃ba lapileng o ba kgorisitse molemo, mme ba ruileng o ba kgutlisitse ba le feela; ₅₄o hlokometse Iseraele, mohlanka wa hae, a tle a hopole mohau, ₅₅oo a neng a o etsetse Abrahama le leloko la hae ka ho sa feleng, kamoo a neng a boleletse baholo ba rona kateng.

₅₆Maria a hlola le Elisabetha dikgwedi tse batlileng ho ba tharo, a ntoo boela tlung ya hae.

₅₇Elisabetha a hlahelwa ke nako ya hae ya ho beleha, mme a tswala mora. ₅₈Ba ahisaneng le yena le bahabo ba utlwa hoba Morena o tumisitse mohau wa hae ka yena, ba thaba le yena. ₅₉Ka tsatsi la boroba meno e le mmedi, ba tla ho bolotsa ngwana, mme ba mo rea Sakaria, lebitso la ntatae. ₆₀Mmae a araba, a re: Tjhe, empa o tla rewa la Johanne. ₆₁Ba re ho yena: Ha ho motho hara ba heno ya reilweng lebitso leo. ₆₂Yaba ba lekanyetsa ntatae hore a ba tsebise lebitso leo a ratang ba ka mo rea lona. ₆₃Sakaria, hobane a kope lematjana la ho ngola, a ngola, a re: Lebitso la hae ke Johanne. Mme ba makala kaofela. ₆₄Ka nako yona eo molomo wa hae wa buleha, le leleme la raroloha, mme a bua, a boka Modimo. ₆₅Ba ahisaneng le yena ba tshwarwa bohle ke tshabo; ditaba tseo tsa hasana kahohle maloting a Judea. ₆₆Mme bohle ba di utlwang ba di boloka dipelong tsa bona, ba re: Ha ho le jwalo, ngwana eo e tla ba eng? Hobane letsoho la Morena le ne le le ho yena.

₆₇Yaba Sakaria, ntatae, o tlala Moya o Halalelang, a porofeta, a re: ₆₈Ho bokwe Morena, Modimo wa Iseraele, hobane o etetse setjhaba sa hae, mme o se lopolotse. ₆₉O re tsoseditse lenaka la poloko tlung ya Davida, mohlanka wa hae; ₇₀jwalokaha a ne a boletse ka molomo wa baporofeta ba halalelang ba hae, ba bileng teng mehleng ya pele, ₇₁a re, o tla re lwela ho bao e leng dira ho rona, le matsohong a bohle ba re hloileng; ₇₂hore a hauhele bontata rona, mme a hopole selekane sa hae se halalelang, ₇₃e leng kano eo a neng a e anetse ntata rona Abrahama, ₇₄ya hore, ha re lwetswe matsohong a bao e leng dira ho rona, re mo sebeletse, re sa tshabe letho, ₇₅kgalalelong le ho lokeng, pontsheng ho yena, ka matsatsi wohle a ho phela ha rona. ₇₆Haele wena, lesea, o tla bitswa moporofeta wa Ya hodimodimo; hobane o tla etella sefahleho sa Morena pele, ho lokisa ditsela tsa hae, ₇₇o tle o nee setjhaba sa hae tsebo ya poloko, tshwarelong ya dibe tsa bona, ₇₈ka baka la pelo e mohau wa Modimo wa rona, eo mafube a meso a lehodimo a re etetseng ka yona, ₇₉hore a bonese ba dutseng lefifing le moriting wa lefu, mme a tsamaise maoto a rona tseleng ya kgotso.

₈₀Haele ngwana, a nna a hola, a ipha matla moyeng; a nna a dula mafeelleng, ha ba ha fihla letsatsi leo a hlahileng pela Iseraele ka lona.