JOBO 19

₁Jobo a fetola, a re: ₂Le tla nne le hlokofatse moya wa ka, le ho nthuhakanya ka dipolelo tsa lona ho isa kae? ₃Le se le nkentse motho e mobe ha leshome; ha le na dihlong tsa ho nnyefola! ₄Ha ekaba ke nnete ha ke kgelohile, molato oo ke taba ya ka. ₅Ha le fela le ikgodisa ka nna, mme le dihela ho nna molato wa dihlong tseo ke dutseng ho tsona, ₆le utlwisise hoba ke Modimo o mphallelang, o ntiketse sefing sa wona.

₇Bonang, le dumaduma hodima bothata boo ke bo etswang, empa ha ke bone karabo; ke howa ka matla, empa ha ho ya nkahlolelang. ₈O thibile mmila wa ka hore ke se ke ka feta, mme tseleng ya ka o beile lefifi. ₉O ntlhobodisitse kganya ya ka, o rotse moqhaka hloohong ya ka. ₁₀O ntshentse ka nqa tsohle, mme ke fedile; o epolotse tshepo ya ka jwaloka sefate. ₁₁Kgalefo ya wona e tukile hodima ka, o ntadimile jwaloka sera sa wona. ₁₂Makgotla a wona a futuhetse nna, a iphunyeditse tsela ho tla ntshwara, a hlomile a teetse tente ya ka hare. ₁₃O suthiseditse banabeso hole le nna, bao ke tsebanang le bona ba ikentse basele ho nna. ₁₄Baheso ba itulela thoko, bao e neng e le metswalle ya ka ba ntebetse. ₁₅Bahlanka ba ka le makgabunyane a ka ba ntadima jwaloka hoja ke osele; ho bona ke ya sa tsejweng. ₁₆Ke bitsa mohlanka wa ka, ha a arabe, leha ke mo rapela ka molomo wa ka. ₁₇Phefumoloho ya ka e nkga ho mosadi wa ka, le monko wa ka o mobe ho bara ba mme. ₁₈Esita le bana ba nnyedisa le bona; ha ke re ke a tsoha, ba bua hodima ka. ₁₉Ke tshabeha ho bao ke kunutang le bona, bao ke neng ke ba rata ba fetohile dira ho nna. ₂₀Masapo a ka a kgomaretse letlalo la ka le dinama tsa ka, ke phonyohile ka thata ka letlalo la meno a ka.

₂₁Nkgauheleng, nkgauheleng, lona metswalle ya ka, hobane letsoho la Modimo ke lona le nkotlileng. ₂₂Na le ntlhorisetsang jwaloka Modimo? Ha le kgolwe keng ka nama ya ka?

₂₃Hola mantswe a ka a ka ngolwa jwale! Hola a ka ngolwa bukeng! ₂₄A ke a ngolwe ka tshepe e betlang le ka loto lefikeng ka ho sa feleng. ₂₅Empa ke a tseba hobane Molopolli wa ka o a phela, le hobane qetellong o tla ema lefatsheng. ₂₆Mme leha letlalo la ka le senyehile, ke tla bona Modimo ke se ke se nameng. ₂₇Ke tla o bona e le moemedi wa ka; ke tla o bona ka mahlo a ka, e seng ka a e mong. Pelo ya ka e hlolohetswe hoo fubeng sa ka.

₂₈Mohlang oo, le tla be le re: Na re ne re mo hlorisetsang? athe le tla bona nyewe ya ka ha e emelwa. ₂₉Itshabiseng lerumo ke hona, hobane bolotsana ke sebe se loketseng lerumo, mme le tsebe hoba kahlolo e teng.