JOBO 18

₁Yaba Bildade wa Shua o fetola, a re: ₂Le tla qeta dipolelo tseo neneng? Mamelang, re ntoo bua. ₃Re etswa keng diphoofolo? Re mawatla keng mahlong a lona na? ₄Wena ya ikgarolang ka bohale ba hao, na lefatshe le tla fetoha lefeella ka baka la hao, mafika a suthiswe tulong tsa wona na?

₅Bona, lesedi la e mobe le tla tingwa, mollo wa leifo la hae ha o sa tla hlola o hotetswa. ₆Lesedi le tla fetoha lefifi tenteng ya hae, lebone la hae le hodima hae le tla tingwa. ₇Mehato ya hae e tiileng e tla honyetseha, o tla dihelwa ke mano a lohilweng ke yena; ₈hobane o hata letlowa ka maoto a hae, o tsamaya hodima mamena; ₉sefi se mo tshwasitse serethe; letlowa le mo tlamile; ₁₀sefi se patilwe mobung pela hae, leraba le mo lebeletse tseleng. ₁₁Matsoso a mo tshabisa ka nqa tsohle, a mo tshosa a mo phalletse. ₁₂Tlala e mo fedisa matla, tshenyeho e mo tshwere lehlakoreng. ₁₃E ja letlalo la mmele wa hae; letsibolo la lefu le ja ditho tsa hae. ₁₄O tshwarwa setshabelong sa tente ya hae, o hulelwa ho morena wa matshabeho. ₁₅Ha ho le a mong wa bahabo ya dulang tenteng ya hae; sebabole se tsholla jwaloka pula hodima moaho wa hae. ₁₆Tlase, metso ya hae e a oma; hodimo, makala a hae a rengwa. ₁₇Ha a sa hopolwa lefatsheng, lebitso la hae ha le sa bolelwa mapatlelong. ₁₈O lelekwa leseding, a ye lefifing; o tloswa lefatsheng. ₁₉Ha a siye mora leha e le setloholo hara setjhaba sa hae, meahong ya hae ho hlokahala mosiuwa ya tswang ho yena. ₂₀Meloko e tlang e tla tsota tshenyeho ya hae, mme meloko wa jwale o tla tshwarwa ke ho thothomela. ₂₁Meaho ya molotsana e jwalo feela, ho jwalo le bodulo ba ya sa tsebeng Modimo.