IZAGA 9

₁Unokuhlakanipha uzakhele ikumba,

wazibazela iinsika ezilikhomba.

₂Uhlabe isitjhebo, wawumela iwayini,

wendlala itafula

₃bewathuma iincekukazi zakhe.

Ubiza asesiqongolweni sedorobho uthi:

₄“Wena onganalwazi jikela lapha!”

Abuye athi kabanganangqondo:

₅“Yizani nizogoma ukudla kwami,

nisele newayini lami engiliwumeleko.

₆Fulathelani ubudlhadlha,

khona nizakuphila

benikhambe endleleni yokuzwisisa.

₇Loyo osola isinyefuli,

uzibizela ihlamba.

Naloyo okhalimela isikhohlakali

ufumana ukurhubutjhwa.

₈Nawukhalimela isinyefuli sizakuzonda,

kodwana nawukhalimela ohlakaniphileko, uzakuthanda.

₉Nawunikela ilwazi kohlakaniphileko,

uzakwanda ngobuhlakani;

nawufundisa olungileko,

uzazengezela ingqondo.

₁₀“Ukwesaba uSomnini kukuthoma kokuhlakanipha

nokwazi oCwengileko kukuzwisisa.

₁₁Ngami amalangakho azakwanda,

kungezelelwe neminyaka yokuphila kwakho.

₁₂Nakube uhlakaniphile,

ukuhlakanipha kwakho kuzakuhlomulisa,

nakube usinyefuli,

uzazithwalela umthwalo wedwa.”

₁₃Unobudlhadlha unetjhada

akakhalimeki begodu akanalwazi.

₁₄Uhlala emnyango wekumbakhe,

esihlalweni esisesiqongolweni sedorobho,

₁₅urhuwelela abadlula ngendlela,

labo abakhamba ngendlela enqombileko, uthi:

₁₆“Wena onganalwazi jikela lapha!”

Abuye athi kabanganangqondo:

₁₇“Amanzi wokwetjiwa ehla esiphundu,

nokugoma kwangemsitheleni kuyanandipha!”

₁₈Kodwana abalemuki bonyana abafileko balapho

neenthekeli zobudlhayela obusamfazi

zisekuzikeni kweliba.