IZAGA 10

Umntwana ohlakaniphileko ujabulisa uyise,

kodwana osidlhadlha ulisizi kunina.

₂Umnono wobukhohlakali awunanzuzo,

kodwana ukulunga kusindisa ekufeni.

₃USomnini akavumi kobana olungileko alambe,

kodwana isifiso somumbi uyasiphaya.

₄Izandla ezidondako zichakisa umuntu,

kodwana zabakhutheleko ziyanothisa.

₅Obuthelela isivuno ehlobo uhlakaniphile,

kodwana otutumalako nakuvunwako usiphoqo.

₆Iimbusiso zisihlohlo ehloko yolungileko,

kodwana umlomo weenkhohlakali ufihle inturhu.

₇Ukukhunjulwa kolungileko kusibusiso,

kodwana amabizo weenkhohlakali asisikgha.

₈Ohlakaniphileko engqondweni wamukela imiyalo,

kodwana isidlhadlha esipepezako siyabhubha.

₉Ophila ngobuqotho uyalondeka,

kodwana oziphatha magwegwe usemtarini.

₁₀Oncinza ilihlo ngobukhohlakali ubanga isizi

nesidlhadlha esipepezako siyabhubha.

₁₁Umlomo wolungileko umthombo wokuphila,

kodwana weenkhohlakali ufihle inturhu.

₁₂Izondo ivusa ukucabana,

kodwana ithando lisibekela zoke iimphambeko.

₁₃Ukuhlakanipha kufunyanwa eembheneni zohlolisisako,

kodwana iswazi libekelwe umhlana wonganangqondo.

₁₄Abahlakaniphileko babulunga ilwazi,

kodwana umlomo wesidlhadlha uzibizela ukonakala.

₁₅Umnono wabanjingileko

ulidorobho labo elinemithangala,

kodwana abachakileko baqedwa buchaka babo.

₁₆Ikokhelo yolungileko ikuphila,

kodwana inzuzo yesikhohlakali sisono.

₁₇Ovuma ukusolwa usendleleni yokuphila,

kodwana ongafuni ukuyeleliswa uyadurhisa.

₁₈Ofihla izondo anayo uneembhena zamanga

norhatjha amahlebezi usidlhadlha.

₁₉Eenkulumeni ezinengi isiphambeko asitlhogeki,

kodwana ogoba ilimu lakhe uhlakaniphile.

₂₀Ilimu lolungileko lilisiliva elikhethekileko,

kodwana ingqondo yeenkhohlakali ayisililitho.

₂₁Iimbhena zolungileko zondla abanengi,

kodwana iindlhadlha ziyafa ngokungabi nengqondo.

₂₂Isibusiso sakaSomnini siletha umnono

nomtjhikatjhika awengezi litho kiwo.

₂₃Isidlhadlha sithokoziswa kuziphatha kumbi,

kodwana umuntu onehloko uthokoziswa kuhlakanipha.

₂₄Okhohlakeleko wehlelwa ngakusabako,

olungileko unikelwa akufisako.

₂₅Nasele isivunguvungu sidlulile

okhohlakeleko uyatjhabalala,

kodwana olungileko uyanzinziswa nini nanini.

₂₆Njengesibharha emazinyweni nentuthu emehlweni,

linjalo-ke nevila kilabo abalithumako.

₂₇Ukwesaba uSomnini kungezelela

amalanga wokuphila,

kodwana iminyaka yeenkhohlakali iyaphungulwa.

₂₈Abalungileko balindela itokozo,

kodwana ithemba leenkhohlakali liyanyelela.

₂₉Indlela kaSomnini isiphephelo koqotho,

kodwana ikubhubha kweengilamkhuba.

₃₀Olungileko angeze asikinywa,

kodwana iinkhohlakali angeze zahlala ephasini.

₃₁Umlomo wolungileko uyaphumelela ekuhlakanipheni,

kodwana ilimu labonakeleko liyaquntulwa.

₃₂Iimbhena zolungileko ziyakwazi okufaneleko,

kodwana umlomo weenkhohlakali wazi okuphambeneko.