IZAGA 27

₁Ungazikhakhazisi ngengomuso

ngombana awukwazi kwamhlokho.

₂Akube ngomunye okudumisako,

ungazidumisi wena;

iye, kube ngotjhili, kungabi mlomakho.

₃Ilitje libudisi netjhwabatjhwaba imuthwalo,

kodwana ukukholwa sidlhadlha

kubudisi ukudlula kokubili.

₄Ilaka lililunya nokusilingeka kusikhukhula,

kodwana ngubani ongajamelana nesikhwele?

₅Kungcono ukusola okusemtarini

kunethando langemsitheleni.

₆Amanceba owavezwa mngani ayamukeleka,

kodwana ukumangwa sisitha akuthembisi.

₇Osuthiko unyelisa isihlaka seliju,

kodwana kolambileko nokumunyu kuyanandipha.

₈Njengenyoni etjhiya indlwanayo,

unjalo umuntu ohlamuka ikhaya lakhe.

₉Amakha netjhwalo kuletha ithabo ehliziyweni,

kunjalo nokuthandeka komngani;

kungokwezeluleko zehliziyo.

₁₀Ungamlahli umnganakho nomngani kayihlo,

ungabalekeli kwamfowenu nawehlelwa yihlekelele,

kungcono umakhelwana oseduze kunomfo okhatjhana.

₁₁Hlakanipha mntwanami, ulethele ihliziywami ukwenama;

ngizakwazi ukuphendula woke umuntu onginyazako.

₁₂Ovuthiweko nabona ingozi uyabhaca,

kodwana abanganalwazi bayaragalala, bahlupheke.

₁₃Thatha ingubo yowenzela umqhamuka isibambiso,

iye, ithathe ngombana ujamele unondindwa.

₁₄Obingelela umakhelwanakhe ngamasa arhuwelela,

kuzakuthathwa bonyana sithuweleliso.

₁₅Umfazi obalabalako,

ufana nephahla elinethosi nakuna izulu;

₁₆ukumvala sekufana nokuvala ummoya

namkha ukubamba amafutha we-oliva ngesidla.

₁₇Njengesimbi nayilola enye,

nomuntu ulola omunye.

₁₈Onakekela umuthi wamakhiwani, ugoma iinthelo zawo

notjheja umphathakhe uzakudunyiswa.

₁₉Njengamanzi nabonisa ubuso,

injalo nehliziyo, ibonisa ubunjalo bomuntu.

₂₀Indawo yabafileko neyokubhujiswa ayaneliseki,

anjalo namehlo womuntu.

₂₁Isincibilikiseli senzelwa isiliva,

ikehla yomlilo ingeyegolide

nomuntu uhlolwa ngedumo elimfaneleko.

₂₂Nanyana isidlhadlha ungasigiga ngesigigweni,

iye, ngesigigo hlangana namakariya,

angeze wabususa ubudlhadlha baso kiso.

₂₃Qinisekisa bonyana wazi ubujamo bezimvu zakho,

ubeke ihliziywakho emhlambinakho

₂₄ngombana umnono awubambeleli,

nesihlohlo angeze saphepha iinzukulwana ngeenzukulwana.

₂₅Nakususwa utjani bese kuvela obutjha,

kubuthwe nefuru eentabeni,

₂₆amaqamana azakupha kokwembatha,

neembuzi zikuphe inani lenarha.

₂₇Ube nebisi elaneleko leembuzi,

ukuzondla wena nomndenakho

kanye neencekukazi zakho.