IZAGA 26

₁Njengeliqhwa ehlobo namkha izulu nakuvunwako,

linjalo nedumo alifaneli isidlhadlha.

₂Njengomrwibili nawuphaphako namkha ikonjani ezulazulako,

sinjalo nesithuweleliso esinganasizathu, asenzeki.

₃Isibebhu ngesenjomani, itomu ngelakadumbana

neswazi ngelomhlana weendlhadlha!

₄Nawungaphenduli isidlhadlha ngobudlhadlha baso,

sithatha bona nawe ufana naso.

₅Nawuphendula isidlhadlha ngobudlhadlha baso,

sithatha bona sihlakaniphile.

₆Othumela umlayezo ngesidlhadlha

uzibandakanya enturhwini;

ufana noziqunta iinyawo.

₇Njengemilenze elembeleleko yorholopheleko,

sinjalo nesaga emlonyeni weendlhadlha!

₈Njengokubophelela ilitje esarwayini,

kunjalo nokuhlonipha isidlhadlha.

₉Njengeliva elihlabe isidakwa esandleni,

sinjalo nesaga emlonyeni weendlhadlha!

₁₀Njengomdumuzi womsebe olimaza angakhethi,

unjalo nomuntu oqatjha isidlhadlha namkha abadlulingendlela.

₁₁Njengenja ebuyela emahlanzwenayo,

sinjalo nesidlhadlha esibuyela ebudlhayeleni baso.

₁₂Ukhe wabona umuntu othatha bona uhlakaniphile na?

Kunethemba elikhulu ngesidlhadlha kunaye.

₁₃Ivila lithi: “Kunebhubezi ngaphandlapha,

iye, kunengwenyama eendledlaneni!”

₁₄Njengomnyango ojika ngeenkhonkwani zawo,

linjalo nevila lijikajika embhedenalo.

₁₅Ivila lifaka isandla ngesitjeni linghwathe,

kodwana livilaphe ukusisa emlonyeni!

₁₆Ivila lizitjela bona lihlakaniphile

kunabantu abalikhomba abaphendula ngokuhlolisisa.

₁₇Njengomuntu obamba inja ekhwabithako ngeendlebe,

unjalo nozifaka ekucabaneni okungakamfaneli.

₁₈Njengehlanya elidumuza imisubela evuthako,

iye, imisubela eyingozi,

₁₉unjalo nomuntu okhohlisa wekhabo

bese athi: “Awa bese ngizidlalela!”

₂₀Ngaphandle kweenkuni, umlilo uyacima;

ngaphandle kwehlebo, ukucabana kuyaphela.

₂₁Njengeensahlela ezivuthisa amalahle,

nanjengeenkuni emlilweni;

unjalo nomuntu othanda ukucabana,

uphemba ipikiswano.

₂₂Amezwi wokuhleba afana neenkhanakhana,

ehla ngesiphundu emuntwini.

₂₃Njengokutshidzwa komjeka okumanyako,

injalo nekulumo yokugugeka esithwe yihliziyo embi.

₂₄Isitha sizifihla ngekulumo,

khibe ngehliziywenaso sifukamele ikohliso.

₂₅Nanyana ikulumaso iyenga, ungasikholwa

ngombana ehliziywenaso kuzele ukuphelela kweenyenyiso.

₂₆Izondwaso singayembesa ngokuzenzisa,

kodwana ubukhohlakali baso buzakwembulwa ebandla.

₂₇Owemba umgodi, uzakurhohlomela ngakiwo;

nogeda ilitje, lizakuhlehlela phezu kwakhe.

₂₈Ilimu elinamanga lizonda elibalimazako,

nomlomo obutjhelelezi ubanga ihlekelele.