UMATEWU 21

₁Kwathi bona batjhidele eJerusalema, sele baseBhethifage entabeni ye-Oliva, uJesu wathumela abafundi bakhe ₂wathi kibo: “Yeniye emzini ongaphambi kwenu, khonapho nizakufumana udumbana abotjhiwe, udumbanyanakhe aseqadi kwakhe. Mtjhaphululeni nibalethapha. ₃Nakukhona otjho okuthileko kini nimtjele bona iKosi iyabadinga, yeke izababuyisa msinyana.”

₄Lokhu kwenzeka ukuze kuzaliseke okwakhulunywa mphorofidi, nasithi:

₅“Yenithi endodakazini yeZiyoni:

₆Yeke abafundi bakhamba bayokwenza njengombana uJesu abayalile. ₇Baletha udumbana nodumbanyanakhe, babeka izambatho zabo phezu kwabo, yeke uJesu wahlala phezu kwazo. ₈Isiqubuthu esikhulu saqhisa izambatho zaso endleleni, abanye basika namatjhwaba wemithi bawaqhisa endleleni. ₉Isiqubuthu esakhamba phambi kwakhe nebesikhamba ngemva kwakhe sarhuwelela sathi:

₁₀Kuthe bona uJesu angene ngeJerusalema, idorobho loke lavungazela. Abantu babuza bathi: “Ungubani lo na?”

₁₁Isiqubuthu saphendula sathi: “Lo nguJesu omphorofidi obuya eNazaretha eseGalile.”

₁₂UJesu wangena ngethempelini, waqotjha boke ebebathenga bathengisa lapho. Waphekghula iintafula zabatjintji bemali neenhlalo zabathengisa amazuba, ₁₃wathi kibo: “Kutloliwe kwathiwa, ‘Ikumbami izakubizwa bona yikumba yokuthandaza’ kodwana nina niyenze irharha labahlanguli!”

₁₄Iimphofu neenrhole zeza kuye ngethempelini, wazipholisa. ₁₅Kodwana kwathi lokha abaphristi abakhulu nabafundisi bomthetho nababona izinto ezikarisako ebegade azenza, nabantwana barhuwelela ngethempelinapho basithi “Hosana kiyo iNdodana kaDavida”, banyenya khulu. ₁₆Yeke babuza uJesu bathi: “Uthi uyayizwa nje itlabelwana le bona ithini na?”

UJesu wabaphendula wathi: “Iye ngiyabezwa! Kghani azange khenifunde imitlolo ethi, ‘Emilonyeni yabantwana neyamasana wabeka indumiso’ na?”

₁₇UJesu wabatjhiya, waphuma ngedorobheni waya eBhethaniya, walala khona.

₁₈Kuthe nasele asendleleni abuyela eJerusalema ekuseni, walamba. ₁₉Wabona umuthi wamakhiwani eqadi kwendlela, waya kiwo, kodwana azange afumane ilitho ngaphandle kwamakari. Yeke wathi emthini lowo: “Inga ungahlala ungasatheli!” Khonokho umuthi wamakhiwani woma.

₂₀Abafundi nababona lokho barareka. Babuza bathi: “Umuthi wamakhiwani wome njani msinyana kangaka na?”

₂₁UJesu waphendula wathi: “Ngiqinisile ngiyanitjela bona naninokukholwa ningazazi, anizukwenza kwaphela okwenziwe emthini wamakhiwani lo, kodwana ningatjho nentabenapha nithi, ‘Suka, uziphosele ngelwandle,’ yeke kuzakwenzeka lokho. ₂₂Nanikholwako, nizakwamukela nanyana yini eniyikhombelako ngomthandazo.”

₂₃UJesu wangena ngesirhodlweni sethempeli; kwathi asafundisa, abaphristi abakhulu nabaphathi babantu beza kuye bambuza bathi: “Izintwezi uzenza ngegunya lakabani na? Ngubani okuphe amandla la na?”

₂₄UJesu wabaphendula wathi: “Nami yithi nginibuze umbuzo owodwa kwaphela. Nange ningangiphendula, ngizanitjela bona ngizenza ngegunya lakabani izintwezi. ₂₅Umbhabhadiso kaJwanisi ubuyaphi na? Ubuya ezulwini namkha ebantwini na?”

Bacocisana babodwa ngendaba le, bathi: “Nasithi ubuya kuZimu, uzasibuza bonyana alo kubayini singakholwa. ₂₆Godu nasithi ubuya ebantwini, sesaba abantu ngombana bayakholwa bonyana uJwanisi gade amphorofidi.” ₂₇Yeke bamphendula bathi: “Awa, asazi.”

Yeke wathi kibo: “Nami-ke angekhe nganitjela bona ligunyabani engenza ngalo izintwezi.”

₂₈“Nithini ngalokhu na? Bekukhona umuntu onamadodana amabili. Waya kekulu wathi kiyo, ‘Ndodana, khamba uyokusebenza esidiribeni namhlanje.’ ₂₉Yaphendula yathi, ‘Angifuni,’ kodwana emva kwesikhathi yazisola, yaya. ₃₀Yeke umuntu loyo waya endodanenakhe enye, wafike watjho amezwi afanako, yaphendula yathi, ‘Iye, baba,’ kodwana azange iye. ₃₁Ngiyiphi-ke phakathi kwamabili la eyenze ekufunwa nguyise na?” Bamphendula bathi: “Yokuthoma.”

Yeke uJesu wathi kibo: “Ngiqinisile ngiyanitjela bona abathelisi neengwadla zingena embusweni kaZimu phambi kwenu. ₃₂UJwanisi weza kini wanitjengisa indlela yokulunga, azange benimkholwe, kodwana abathelisi neengwadla zamkholwa. Kubhale ngitjho nanyana sele nikubonile lokhu, azange beniphenduke nimkholwe.”

₃₃UJesu wathi kibo: “Lalelani omunye umfanekiso naku: Kwakhe kwaba khona umnininarha owatjala isidiribe, wakha umthangala magegana naso. Wemba ubutlhodlhelo kiso bewakha nesithala sokulinda. Yeke waqatjhisela abalimi abathileko isidiribeso, yena wathatha ikhambo. ₃₄Kwathi nakutjhidela isikhathi sokuvuna, wathumela iinsebenzi zakhe ebaqatjhini kobana bayokukha iinthelo zakhe. ₃₅Abaqatjhi babamba iinsebenzi zakhe, esinye basibetha, esinye basibulala, sesithathu basikhanda ngamatje. ₃₆Godu wathumela ezinye iinsebenzi kibo, zaba zinengi ukudlula zokuthoma, abaqatjhi baziphatha njengezekuthomeni. ₃₇Ekugcineni wathumela indodanakhe kibo adlumbana asithi, ‘Nakuyindodanami bazayihlonipha.’ ₃₈Kodwana kwathi abaqatjhabo nababona indodana, bakhuluma bodwa bathi, ‘Angithi le yindlalifa! Asiyibulaleni siyithathele ilifa layo.’ ₃₉Yeke bayibamba bayiphosa ngaphandle kwesidiribe, bayibulala. ₄₀Alo-ke umninisidiribe nafikako uzabenzani abaqatjhaba na?”

₄₁Bamphendula bathi: “Iinkhohlakalezo uzozibhubhisa nya, athathe isidiribe sakhe asiqatjhisele abanye abazamnikela isabelo sakhe sesivuno ngesikhathi esifaneleko.”

₄₂UJesu wathi kibo: “Kghani anizange khenifunde emitlolweni na?

₄₃UJesu wathi kibo godu: “Ngalokho ngiyanitjela bonyana umbuso wezulu uzokususwa kini unikelwe abantu abazokuthela iinthelo. ₄₄Owela phezu kwelitjeli uzakuphuka abe ziinquqwana; kodwana loyo elizakuwela phezu kwakhe yena uzakutshidlheka.”

₄₅Kwathi lokha abaphristi abakhulu nabaFarisi nabezwa umfanekiso kaJesu lo, kwabakhanyela bona ukhuluma ngabo. ₄₆Yeke balinga ukufumana indlela yokumbamba. Kodwana bebesaba isiqubuthu ngombana abantu bebathatha uJesu njengomphorofidi.