Umfanekiso ngeensebenzi zesidiribe
1“Umbuso wezulu ufana nomnininarha owaphuma ekuseni wayokuqatjha abantu bona basebenze esidiribeni sakhe. 2Wavuma ukubakhokhela udenariyu ngelanga, wabese ubathumela esidiribeni sakhe. 3Ngesimbi yethoba waphuma godu wabona abanye abantu bajame endaweni ekuthengiselwa kiyo, bangenzi ilitho. 4Yeke wathi kibo, ‘Nani khambani niyokusebenza esidiribeni sami, ngizanikhokhela nanyana yini efaneleko.’ 5Yeke bakhamba. Kwathi ngesimbi yetjhumi nambili godu nangesimbi yesithathu wenza godu okufanako. 6Godu ngesimbi yesihlanu, waphuma wafunyana abanye nabo bajame khonapho. Wathi kibo, ‘Kubayini nilokhu nijame lapha imini yoke ningenzi ilitho na?’ 7Bamphendula bathi, ‘Kungombana akunamuntu osiqatjhako.’ Wathi kibo, ‘Yeke nani khambani niyokusebenza ngesidiribeni sami.’
8“Kwathi bona ukuhlwa kufike, umninisidiribe watjela indunakhe wathi, ‘Biza iinsebenzi uzinikele umrholwazo, uthome ngeziqatjhwe muva, ugcine ngezithome ntange.’ 9Abantu abathome ukusebenza ngesimbi yesihlanu bafika, barholelwa udenariyu ngamunye. 10Kwathi abantu abaqatjhwe ntange nabafikako, badlumbana bona bazakufumana ngaphezudlwana. Kodwana nabo banikelwa udenariyu ngamunye. 11Sele bamukele ikokhelwabo bathoma ukunghonghoyila kumnininarha, 12bathi, ‘Abantwaba abaqatjhwe muva basebenze nje i-awara linye kwaphela, khonapho ubalinganisa nathi thina ababhesele iduladula yomsebenzi nomtjhiso welanga!’
13“Kodwana waphendula omunye wabo wathi, ‘Mnganami, angikakugalaji. Angithi uvumile bona uzakusebenzela udenariyu na? 14Yeke thatha ikokhelwakho uye ekhaya. Ngifuna ukukhokhela umuntu oqatjhwe muva lo ngokulingana nalokho engikukhokhele khona. 15Anginalungelo lokwenza engikuthandako ngemalami na? Unomona ngombana nginomusa na?’ ”
16“Ngaleyondlela bokugcina bazakuba ngebokuthoma nebokuthoma babe ngebokugcina.”
UJesu ukhuluma lesithathu ngokufa kwakhe
(Mk 10:32-34; Lk 18:31-34)
17Kwathi uJesu nakhuphukela eJerusalema, wabizela abafundi abalitjhumi nambili ngeqadi, 18wathi kibo: “Sikhuphukela eJerusalema lapha iNdodana yoMuntu izokukhatjhelwa khona kubaphristi abakhulu nakubafundisi bomthetho. Bazoyigwebela ukufa, 19bayinikele ezandleni zabatjhili kobana bahlekise ngayo, bayirithe bebayibethele esiphambanweni. Kodwana elangeni lesithathu izakuvuka kabafileko.”
Isibawo somkaZebediya
(Mk 10:35-45)
20Yeke umkaZebediya namadodanakhe amabili baya kuJesu, bafese baguqa phambi kwakhe bakhombela isisa kuye.
21UJesu wambuza wathi: “Ufunani na?”
Wamphendula wathi: “Vuma bona amadodanami amabili la akuphahle embuswenakho, enye ibe ngesigomeni sakho, enye ibe ngesinceleni sakho.”
22UJesu waphendula, wathi: “Anikwazi enikubawako. Ningakghona ukusela ikapho engizoyisela le na?” Baphendula bathi: “Singakghona.”
23UJesu wathi kibo: “Kwamambala nizakusela ikapho engiyiselako, kodwana nayikuhlala ngesigomeni namkha ngesinceleni sami, awa akusingokwami ukutjho lokho. Iindawezi ngezalabo uBaba azilungisele bona.”
24Kwathi bona abalitjhumi bezwe ngalokho, banyenya ngamadodana amabili layo. 25Yeke uJesu wababizela ndawonye boke wathi: “Niyazi bona ababusi babatjhili banamandla phezu kwabo neenkhulu zabo eziphezulu zinegunya phezu kwabo. 26Yeke, akusinjalo kini! Nanyana ngubani phakathi kwenu ofuna ukuba mkhulu, kufanele abe yincekwenu. 27Nofuna ukuba ngewokuthoma akabe likhoboka lenu; 28kube njengombana kunjalo ngeNdodana yoMuntu engakezeli ukuzokwenzelwa, kodwana izele ukwenzela nokunikela ipilwayo njengesihlengo sabanengi.”
UJesu uphophulula amadoda amabili
(Mk 10:46-52; Lk 18:35-43)
29Kwathi uJesu nabafundi bakhe nabasuka eJerikho, isiqubuthu esikhulu sabalandela. 30Bekuneemphofu ezimbili ebezihlezi eqadi kwendlela, zathi zingezwa bona uJesu uzokudlula lapho, zarhuwelela zathi: “Kosi, Ndodana kaDavida, sirhawukela!”
31Isiqubuthu sazithethisa sathi azithule. Kodwana zarhuwelela khulu kwanjesi zathi: “Kosi, Ndodana kaDavida, sirhawukela!”
32UJesu wajama, wazibiza, wathi kizo: “Nifuna bona nginenzeleni na?” 33Zathi: “Kosi, sifuna ukubona!”
34UJesu wazirhawukela, wakghwatha amehlwazo. Khonokho zabona, zamlandela.
