Badiši ba go diša setšhaba, baporofeta
1Hee Libanoni, bula difata tšago, mollo o tšhume dihlare tša gago tša morokwana. 2Hee lena megobogobo, tsošang sello! Go wile bomorokwana, go rapaladitšwe mere ya matsaka. Lena merekure ya Basani, tsošang sello. Go senyegile sekgwa se se bego se sa tsenwe. 3Kwang dillo tša badiši; letago la bona le ile. Kwang mokgoši wa ditau tša madumaedi; go senyegile botse bja nokeng ya Jorodane.
4Morena Modimo wa ka o mpoditše a re: Diša dinku tšeo tša go hlabja, 5tše di bolawago ke ba ba di rekago, mme ba re ga ba ne molato. Barekiši ba tšona ba re: A go retwe Morena; na re humile! Mme badiši ba tšona ga ba di šetše.
6Le nna bjale beng ba naga ye nka se hlwe ke ba setša. O realo Morena. Batho ba, mang le mang, ke tlo ba gafela tsogong la wa gabo, tsogong la kgoši ya gagwe. Ba tlo thopa naga ye, nna ke se namolele motho.
7Nna ka diša dinku tšeo tša go hlabja, e le mohlape wa go setla pelo. Ka swara mapara a mabedi; le lengwe ka re ke “Boleta”, le lengwe ka re ke “Kwano”. 8Ka re e diša dinku tšeo, ka raka badiši bararo ka kgwedi e tee, ka ge di ntenne, le tšona di sa nthate. 9Ka re nka se hlwe ke di diša; se se hwago a se hwe; tše di senyegago a di senyege; tše di šalago a di jane. 10Ka tšea lepara la “Boleta” ka le roba; ya ba go fediša kgwerano, ye ke e dirilego le ditšhaba tšohle. 11Ge kgwerano e fedišwa, ka lona tšatši leo dinku tša goo setla pelo, tše di bego di lebeletše nna, tša tseba gobane ke tše di boletšwego ke Morena. 12Nna ka bolela nabo ka re: Ge le ka rata nneeng moputso wa ka; ge le sa rate le ka lesa. Mme ba mpha moputso wa ka wa disilifera tše masome a mararo.
13Morena a bolela le nna a re di lahlelwe polokelong ya matlotlo; ke yona theko ye ba rego ke rekwa ka yona. Nna ka tšea disilifera tšeo tše masome a mararo ka di lahlela polokelong ya Ntlo ya Morena. 14Ka roba lepara lela la bobedi la “Kwano”, ya ba go feditša tswalano ya moloko wa Juda le wa Isiraele.
15Morena a bolela le nna a re: Boela o sware mapara a modiši wa lešilo. 16Gobane o tsebe gore nageng yeno ke tsoša modiši e a sa šetšego tše di fokolago, e a sa tsomego tše di timelago, a sa alafego tše di gobetšego, e a sa lotego tše di thabilego; sa gagwe e tlo ba go ja dinama tša tše di nonnego, le go kokona le hlaku tša tšona. 17Joo, modiši wa lefela, mohlalamohlape! Tsogo lagwe le tlo hlabja ke lerumo, le leihlo lagwe la le letona. Tsogo lagwe le tlo golofala, lona ihlo leo lagwe le tlo hwa.
