PSALME ya 89

₁Dikgaugelo tša Morena ke tlo fela ke di tlotla neng le neng. Potego ya gago ka molomo wa ka ke e anegela ditlogolo le ditlogolwana.

₂Ka gobane e theilwe ka go sa felego kua magodimong, Therešo ya gago e thekgilwe gona kua.

₃O itše: Ke dirile kgwerano le mokgethiwa wa ka, wa re: Ke enetše Dafida mohlanka wa ka ka re:

₄Peu ya gago ke tlo e tiiša ka go sa felego; gomme sedulo sa gago sa bogoši ke tlo se thekgela ditlogolo le ditlogolwana.

₅Magodimo a reta mehlolo ya gago, Morena, le yona therešo ya gago go phuthegile ba bakgethwa.

₆Gobane gona kua marung ke mang a kago lekanywa le yena Morena? Mo go barwa ba medimo ke mang a kago swana le yena Morena?

₇Modimo mmoifegi wa mabothobotho a bakgethwa, o boifša ke ba ba mo dikaneditšego bohle.

₈Morena Modimo wa mašaba, o kae yo maatla boka wena Mobagona? Therešo ya gago e go dikanetša thoko tšohle.

₉O buša boikgogomošo bja lewatle; ge le tsoga ka mafula o a le boetša;

₁₀Wa hlaba Rahaba a etša setopo, wa šwalalanya manaba a gago ka letsogo la gago le maatla.

₁₁Magodimo ke a gago, le lefase, le legohle, le botlalo bja lona; o di theile tšohle.

₁₂Leboa le borwa, mohlodi wa tšona ke wena; thaba ya Thabora le ya Herimone di tlotla leina la gago.

₁₃O yo letsogo le maatla, seatla sa gago se tiile, letsogo lago le letona le a akalala.

₁₄Toko le molao di thekgile sedulo sa gago sa bogoši; kgaugelo le therešo di go eta pele.

₁₅Setšhaba se tsebago megobelo ya tlhalalo ke sa lehlogonolo; ke sa bao ba ba sepelago seetšeng sa sefahlego sa gago Morena.

₁₆Ba tlo hlalalela leina la gago ka mehla; ba tlo fadiša go loka ga gago.

₁₇Gobane botšhephi bja maatla a bona ke wena, lenaka la rena le tlo phagama ge re go kgahla.

₁₈Gobane dikotse tša rena ke tša Morena; mme Mong wa kgoši ya rena ke yena Mokgethwa wa Isiraele.

₁₉Mohla wola wa pono o boletše le mokgethiwa wa gago, wa re: Ke bea monna wa go hlakodiša; ke godiša eo a hlaotšwego setšhabeng.

₂₀Yo ke mo hweditšego ke Dafida mohlanka wa ka; ke mo tloditše ka makhura a makgethwa a ka.

₂₁Seatla sa ka se maatla se tlo ba le yena, mme letsogo la ka le tlo mo tiiša.

₂₂Lenaba ga le mo dire selo; mme mothomobe a ka se mo kgone.

₂₃Ba ba mo tsogelago o tlo bona ke ba robaganya; ba ba mo hloyago ke tlo ba digela fase.

₂₄Mme therešo ya ka le kgaugelo ya ka di tlo ba le yena; lenaka la gagwe le tlo phagama ka leina la ka.

₂₅Seatla sa gagwe ke tlo se bea godimo ga lewatle; letsogo la gagwe ke tlo le bea godimo ga dinoka.

₂₆Nna o tlo nthe: O Tate! O Modimo wa ka, o lentswe la go mphološa.

₂₇Mme nna ke tlo mo dira morwa wa ka e mogolo, e mogolo go magoši a lefase.

₂₈Ke tlo mmolokela botho bja ka neng le neng; mme kgwerano ya ka e tlo mmotegela.

₂₉Peu yagwe ke tlo e lotolola neng le neng; sedulo sagwe se tlo dula se le gona boka mehla ya leratadima.

₃₀Ge bana ba gagwe ba hlala melao ya ka, mme ba se sware tsela ya ditaelo tša ka,

₃₁Ge ba senya mekgwa ya ka, mme malaeledi a ka ba se a ele hloko,

₃₂Gona ke tlo ba balela dikarogo ka dikgati, mme ka ba balela makgopo ka kotlo.

₃₃Fela, yena nka se mo hlokiše kgaugelo ya ka, nka se lese go mmotegela.

₃₄Kgwerano ya ka nka se e goboše, nka se phekgole se tšwilego ganong ga ka.

₃₅Ke enne ka bokgethwa bja ka gatee ya ba moka, mme Dafida nka se mo aketše,

₃₆Peu ya gagwe ke ya neng le neng; sedulo sa gagwe sa bogoši se pele ga ka bjalo ka letšatsi.

₃₇Go ba gona se tlo etša kgwedi, hlatse thereši marung.

₃₈Gomme bjale, o a lahla, o a nyatša, o galefela motlotšwa wa gago.

₃₉Kgwerano ya mohlanka wa gago o e fedišitše; pheta ya gagwe o e gobošitše, o e akgetše fase.

₄₀Merako ya gagwe o e phušotše; dibo tša gagwe tša šala e le matlotla.

₄₁O hlakolwa ke bohle bafeti ba tsela; baagišani bagwe ba mo dira selalogi.

₄₂O phagamiša letsogo la bahloi bagwe; O thabiša manaba a gagwe ohle.

₄₃O mo hlokišitše boelo bja tšhoša, wa mo tima phenyo tlhabanong.

₄₄Bonatla bja gagwe o bo fedišitše; sedulo sa gagwe sa bogoši o se tekoletše fase.

₄₅Matšatši a bosogana bjagwe o a kgaoditše wa mo apeša dihlong.

₄₆Morena, o tlo utologa neng? Kgalefo ya gago a e tlo fela e tuka boka mollo go ya go ile?

₄₇A nke o nkgopole, ge bophelwana bja ka bo sa iše felo; o gopole tšhego e kaakaa ye o bopetšego bana ba batho go yona.

₄₈Monna o kae e a kago phela a se bone lehu, e a kago iphološa, a se ye bodulabahu?

₄₉Mong wa rena! Dikgaugelo tšela tša gago tša kgale di kae, tše o di enetšego Dafida mohlanka wa gago o le e a botegago?

₅₀Mong wa rena, o ke o gopole go gobošwa ga bahlanka bago go nkimelago sehubeng, go gobošwa ke ditšhaba tše dikgolo tšohle.

₅₁Ke go gobošwa ke manaba a gago, Morena; a goboša ditsela tša motlotšwa wa gago.

₅₂Moretwa ke Morena ka go sa felogo. Amene, Amene.