NUMERI 9

₁Morena o boletše le Moshe lešokeng la Sinai ka ngwaga wa bobedi wa ge ba tšwile nageng ya Egipita, ka kgwedi ya pele a re: ₂Baisiraele a ba dire Paseka ka lebaka la yona le le beilwego. ₃Le e dire ka mantšiboa a tšatši la lesome la metšo e mene la kgwedi ye, ka lebaka le e beilwego ka lona. Le dire ka mokgwa wa yona le ka melao ya yona ka moka. ₄Moshe a botša Baisiraele gore ba dire Paseka. ₅Ba dira Paseka ka letšatši la lesome le metšo e mene la kgwedi ya pele ka mantšiboa, ba le lešokeng la Sinai. Ba direle tšohle ka mo Morena a laetšego Moshe ka gona.

₆Bjale go be go na le banna ba ba tšhilafetšego ka setoto sa motho. Ka baka leo ba šitwa go dira Paseka. ₇Banna bao ba botšiša Moshe ba re: Re tšhilafetše ka setoto sa mohu; re thibelwa ka baka lang go tliša sebego sa Morena ka lebaka la sona re na le Baisiraele.

₈Moshe a fetola a re: Emang ke thome go kwa se Morena a tlogo ntaela sona ka baka la lena.

₉Gomme Morena a botša Moshe a re: ₁₀Botša Baisiraele o re: Ge e mongwe wa lena le wa bana ba lena a tšhilafetše ka setoto, goba a etile kgole, a ka direla Morena Paseka. ₁₁Ba e dire ka letšatši la lesome la metšo e mene la kgwedi ya bobedi ka mantšiboa; ba e je le dinkgwa tše di sa omelwago le merogo e babago. ₁₂Ba se ke ba šadiša molatša; ba se ke ba e roba lešapo; ba e dire ka go hlokomela melao ya Paseka. ₁₃Fela, ge motho a se na ditšhila, goba a se leetong, gomme a lesa go dira Paseka, motho e mobjalo a ripiwe setšhabeng sa gabo, ka gobane a sa ka a tliša sebego sa Morena ka lebaka la sona; motho e mobjalo o obile molato.

₁₄Ge motho a diiletše go lena mme a re ke direla Morena Paseka, gona a e dire ka mokgwa wa yona le ka molao wa yona. Le be le molao o tee, e ka ba modiiledi, e ka ba wa gae.

₁₅Ka tšatši la go hlongwa ga Ntlokgethwa go tlile leru la a apeša wona Ngwako wa Molao; ka mantšiboa la na la etša mollo go fihla ka moswana. ₁₆Gwa ba bjalo ka mehla; Ntlokgethwa ya khurumetšwa ke leru, mme bošego la etša mollo. ₁₇Mohla leru leo le hlatloga mo Ntlongkgethwa, ke gona Baisiraele ba khudugilego; gomme mo leru le emago ntshe, ke mo Baisiraele ba hlomilego mešaša gona. ₁₈Ya ba go khuduga ka go laiwa ke Morena; ya ba go hloma mešaša ka go laiwa ke Morena; gomme ba dula mešašeng mehla ka moka ge leru le aparetše Ntlokgethwa. ₁₉Ge leru le fetša matšatši a mantši le le godimo ga Ntlokgethwa Baisiraele ba be ba sa khuduge, ba be ba lebelela taelo ya Morena. ₂₀Mo gongwe leru le dutše godimo ga Ntlokgethwa matšatšinyana a se makae fela. Ba be ba fela ba dula ba laetšwe ke Morena, mme ba khuduga ba laetšwe ke Morena. ₂₁Mo gongwe leru la dula ka mantšiboa, ka moswana la hlatloga, mme ba khuduga. Ba be ba khuduga ge leru le hlatloga, le ge e le mosegare, le ge e le bošego. ₂₂Mo gongwe la dula matšatši a mabedi, goba kgwedi ya fela le dutše; ba se ke ba khuduga ka ge leru le sa dutše godimo ga Ntlokgethwa; ba khuduga ge le hlatloga. ₂₃Ba be ba dula ka taelo ya Morena. Ba be ba khuduga ka taelo ya Morena. Ba realo ba hlokometše madišo a Morena, ka mo Morena a bego a ba laya ka Moshe.