NUMERI 8

₁Morena o boletše le Moshe a re: ₂Botša Arone o re: ge a hlomela dipone, ka moka tše di šupago di bonegele mono pele ga sehlomapone. ₃Arone a dira ka mokgwa woo, a hlomela dipone tša leba mono pele ga sehlomapone bjalo ka ge Morena a laetše Moshe. ₄Sehlomapone se be se direlwe ka gauta e rutšwego; thito ya sona, le matšoba a sona e be e le gauta e rutšwego. Gomme Moshe o be a dirile sehlomapone seo ka go swantšha se Morena a mmontšhitšego sona.

₅Morena o boletše le Moshe a re: ₆Hlaola Balefi mo go Baisiraele mme o ba thakgafatše. ₇Ge o ba thakgafatša o dire ka mokgwa wo: Ba fokele ka meetse a thakgafatšo; bona ba ipoole mmele ka moka ka legare, ba hlatswe diaparo tša bona; e be gona go ithakgafatša. ₈Ba tsebo tliša powana e nago le sebego sa yona sa dijo, sa bupi bjo bo tšhetšwego makhura; mme o tšee powana e nngwe ya seloba. ₉O kgone go iša Balefi pele ga Ngwako wa Kgwerano, mme o kgobele phuthego ka moka ya Baisiraele. ₁₀Balefi o ba batametše pele ga Morena, gomme Baisiraele ba bee diatla tša bona godimo ga Balefi. ₁₁Arone a ba ekare pele ga Morena ba etše seekaro sa Baisiraele, gore e be ba go direla Morena. ₁₂Bjale Balefi ba bee diatla tša bona godimo ga dihlogo tša dipowana tšeo, e nngwe ya tšona e dirwe seloba sa Morena, e nngwe e be sehlabelo sa go direla Balefi poelanyo.

₁₃Gomme o emiše Balefi pele ga Arone le barwa ba gagwe, o ba ekare gore ba be seekaro sa Morena. ₁₄Ka mokgwa o bjalo o hlaole Balefi mo go Baisiraele gore e be ba ka. ₁₅E be gona Balefi ba tlogo kgona go tsena modirong wa Ngwakong wa Kgwerano; o ba thakgafatše gore ba be seekaro. ₁₆Ka gobane ba neetšwa nna sa ruri ba etšwa go Baisiraele; ke ba tšere bakeng sa bohle bao bommabo ba itšibulago ka bona, bakeng sa maitšibulo a Baisiraele ka moka; ke ba ka. ₁₇Ka gobane maitšibulo ka moka a Baisiraele ke a ka a batho le a dikgomo; ke ikgethetše ona mohla wola ke bolaya maitšibulo ka moka nageng ya Egipita. ₁₈Gomme Balefi ka ba tšea bakeng sa maitšibulo ka moka a Baisiraele. ₁₉Bjale Balefi ke ba neela Arone le barwa ba gagwe; ke ba hlaola go Baisiraele gore ba sware modiro bakeng sa Baisiraele mo Ngwakong wa Kgwerano, gore e be ba go direla Baisiraele poelanyo, gore Baisiraele ba se ke ba welwa ke kotlo ge ba batamela sekgethwa.

₂₀Moshe le Arone le phuthego ka moka ya Baisiraele ba dirile Balefi ka mokgwa woo; ba ba direle ka mokgwa wo Morena a o laetšego Moshe ka baka la Balefi. ₂₁Balefi ba ithakgafaditše, ba hlatswa diaparo tša bona, mme Arone a ba dira seekaro pele ga Morena, a ba direla poelanyo gore ba thakgafale. ₂₂Ya ba gona Balefi ba tlilego ba swara mediro ya bona mo Ngwakong wa Kgwerano ba lebeletšwe ke Arone le barwa ba gagwe, ka mokgwa wo Morena a o laetšego Moshe ka baka la bona.

₂₃Morena o boletše le Moshe a re: ₂₄Taba še e lebanego Balefi. Mo sehlopheng sa bona sa go dira Ngwakong wa Kgwerano go tsena e a feditšego nywaga e masome a mabedi le metšo e mehlano le e fetago eo. ₂₅Ge ba feditše nywaga e masome a mahlano ba tšwe modirong woo, ba se ke ba hlwa ba o dira. ₂₆A e be ba go thuša bana babo go hlokomela madišo a bona; fela ga se ba modiro. Balefi o ba dire bjalo madišong a bona.