LUKA 7

₁Ya re ge a feditše go bolela, botho ba kwile ditaba tša gagwe ka moka, a ya motseng wa Kaperenaume. ₂Gomme monna e mongwe wa tona ya ekgolo o be a na le mohlanka wa gagwe yo a bego a mo rata ka kudu. Mohlanka eo o be a babja a le makgatheng. ₃Tona yeo ge e ekwa tša Jesu, ya roma bagolo ba Bajuda, ba ye go Jesu ba mo kgopele ba re a tle a phološe mohlanka eo. ₄Ge ba fihla go Jesu, ba mo kgopela, ba mo phegelela ba re: Go mo swanetše ge o ka mo dira tše re di kgopelago, ₅Gobane o rata setšhaba sa gešo; le sekolo sa rena re agetšwe ke yena.

₆Jesu a ya le bona. A sa le kgojana le ngwako, tona ya roma bagwera ba yona, ba tla go Jesu ba re: Morena, se itapiše, gobane ga ke a swanela ge O ka tsena ka tlase ga hlaka ya ntlo yaka. ₇Le go tla go wena, ke be ke re ga go a ntshwanela. Fo bolela lentšu, mme mohlanka waka o tla fola. ₈Hleng le nna, ke le motho e a bušwago, ke na le le bahlabani ba ke ba bušago, ka roma yo ka re: Sepela, a sepela; ka bitša e mongwe ka re: Tlaa, a tla; ka laela mohlanka waka ka re: Dira se, a dira.

₉Jesu ge a ekwa tšeo, a mo kgotsa a retologela go lešaba le le bego le mo latela, a re: Ke a le botša, le go Isiraele ga kešo ka hwetša tumelo e kaakaa.

₁₀Gomme bao ba romilwego ge ba boela gae, ba hwetša mohlanka eo a fodile.

₁₁Ka la ka moswana a ya motseng wo ba rego ke Naini, a latelwa ke barutiwa ba bantši ba gagwe, le lešaba le lentši. ₁₂Ge a batamela kgoro ya motse, a hwetša ba etšwa ba rwele mohu, ngwana a nnoši wa mmagwe e bego e le mohlogogadi, a na le lesaba le lentši la ba motse woo. ₁₃Morena, ge a mmona, a mo kwela bohloko, a bolela nae' a re: Se lle! ₁₄A batamela a kgwatha laeko, barwadi ba lona ba ema. Jesu a re: Lesogana, ke ra wena ge ke re: Tsoga! ₁₅Mohu a tsoga a dula, a thoma go bolela. Yena a mo iša go mmagwe.

₁₆Bohle ba swarwa ke poifo, ba reta Modimo ba re: Go tsošitšwe moporofeta a mogolo mo go rena; Modimo o etetše setšhaba sa gagwe.

₁₇Gomme taba ye ya gagwe ya falalêla nageng ya Juda mo go fela le mathokong a yona ka moka.

₁₈Le Johane, ditaba tše ka moka, barutiwa ba gagwe ba mo tsebiša. ₁₉Johane a bitša ba babedi ba barutiwa ba gagwe, a ba roma a re ba yo botšiša Jesu ba re: A ke wena e a boletšwego a thwe: O etla; goba re sa letela e mongwe?

₂₀Banna bao ba tla go Jesu ba re: Johane Mokolobetši o re romile go wena; o re: A ke wena e a boletšwego a thwe: O etla; goba re sa letela e mongwe?

₂₁Ka lona lebaka leo Jesu o be a fodiša ba bantši ba malwetši le mahloko, le ba meoya e mebe, le ba bantši ba difofu a ba gaugela, ba buša ba bona. ₂₂A fetola a re: Sepelang le yo botša Johane tše le di bonego le tše le di kwilego, le re: Difofu di a bona, digole di a sepela, ba lephera ba a fola, difoa di a kwa, bahu ba a tsoga; mme bahumanegi ba begelwa taba tše monate. ₂₃Mme le mmotše le re: Wa lehlogonolo ke eo a sa kgopšego ka nna.

₂₄Ba ba romilwego ke Johane ge ba sepetše, Jesu a thoma go bolela le mašaba a batho a era Johane, a re: Le be le tšwetše šokeng go bonang? A le be le bona lehlaka le le tšokotšwago ke phefo? ₂₅Ke re: Le be le tšwetše go bonang? A le be le bona moaparatšeboleta? Bonang! Baapari ba dikobo tša botšhephi, ba go phela ba ipshina, ba kua metseng ya mošate. ₂₆Ke re: Le be le tšwetše go bonang? A le be le bona moporofeta? Ka kgonthe! Nna ke re, ke e a fetago le moporofeta. ₂₇Gobane ke yena e a ngwadilwego a thwe: Ke nna e! Ke roma motseta wa ka wa go go etapele a go thulela tsela. ₂₈Ke a le botša ke re: Mo go ba ba belegwego ke basadi, ga go na moporofeta e a kago feta Johane Mokolobetši. Fela, yo e lego e monyenyane mmušong wa Modimo, o a mo feta.

₂₉Gomme batho ka moka ba ba mo kwilego, le balekgetho ba dumetše morero wa Modimo, ba kolobetšwa ka kolobetšo ya Johane. ₃₀Ba ba nyaditšego morero wa Modimo ke bafarisei le baruti ba Molao, ba se kolobetšwe ke Johane.

₃₁Bjale batho ba mehla yeno ke tlo ba swantšha le bomang? ₃₂Ba swana le bana ba ba dutšego lepatlelong, ba biletšana ba re: Re le leleditše naka, la gana go bina; ra le hlabela sello, la gana go golola. ₃₃Gobane Johane o tlile a se je bogobe, a se nwe sedila; lena la re: O ne moya o mobe. ₃₄Gwa tla Morwamotho, a ja, a nwa; lena la re: Bonang motho wa sejato, wa monwi, mogwera wa balekgetho le badiradibe. ₃₅Gomme bohlale bo bonala ka bana ba bjona ka moka.

₃₆E mongwe wa bafarisei a mo laletša a re a je le yena. Jesu a tsena ngwakong wa mofarisei eo, a dula dijong. ₃₇Gwa rotoga mosadi e mongwe wa motse woo, yo e bego e le modiradibe. O be a kwile gore Jesu o dutše dijong ngwakong wa mofarisei; a tla a swere sebjana se se nago le setlolo. ₃₈A batamela dinaong tša Jesu a lla, a kolobiša dinao tša Jesu ka megokgo, a e phumola ka meriri ya hlogo ya gagwe; a atla maoto a Jesu, a a tlotša ka setlolo. ₃₉Mofarisei eo a mo laleditšego, ge a di bona, a eleletša re: Motho yo ge e ka be e le moporofeta, a ke be a tseba se mosadi eo a mo kgwathago a lego sona, gobane ke modiradibe.

₄₀Jesu a fetola a bolela a re: Simone, ke na le se ke ratago go go botša.

Simone a re: Bolela, Moruti!

₄₁Jesu a re: Batho ba babedi ba be ba tšere metšhokga go monna wa lehumagadi; wa e mongwe e be e le mašeleng a makgolo a mahlano; wa e mongwe e be e le wa masome a mahlano. ₄₂Ya re ge ba hloka sa go lefa, a ba gaugela a ba fa bohle bobedi bja bona. Bjale mpotše: Ke ofe e a tlo go mo rata gagolo?

₄₃Simone a fetola a re: Nka re ke eo a mo gaugetšego a na le molato o mogolo.

Jesu a re: O ahlotše ka go rereša. ₄₄A realo a retologela go mosadi eo, a sa bolela le Simone a re: A mosadi e o a mmona? Ke tlile fa ngwakong wa gago, wa se mphe meetse a go hlapa maoto; gomme yena a tla a kolobiša maoto a ka ka megokgo a a hlakola ka meriri ya hlogo ya gagwe. ₄₅Wena ga wa ka wa nkatla, mme yena, e sa le mola a tsena ga a ešo a kgaotša go nkatla maoto. ₄₆Ga wa ka wa ntlodiša hlogo ka makhura; mme yena o ntloditše maoto ka setlolo. ₄₇Lesa gee ke go botše: O lebaletšwe dibe tša gagwe tše e lego tše ntši; ke ka baka leo a ratilego ka gogolo. Go e a lebaletšwego mo gonyane, le lerato ke le lenyane.

₄₈A realo a tsebo bolela le mosadi eo a re: O lebaletšwe dibe tša gago.

₄₉Ke mo ba ba dutšego dijong le yena ba thomilego go eleletša dipelong tša bona ba re: Motho e ke mang, ge a lebalela batho dibe?

₅₀Jesu a bolela le mosadi eo a re: Tumelo ya gago e go phološitše; rola pelo o ikele.