LUKA 6

₁Ka tšatši le lengwe la Sabatha, ge a phatša ka mabeleng, barutiwa ba gagwe ba kga diako ba di fogohla ka diatla, ba di ja. ₂Ba bangwe ba bafarisei ba bolela le bona ba re: Le reng le dira tše di sa swanelago go dirwa ka Sabatha?

₃Gwa fetola Jesu a re: A ga lešo la bala se Dafida a kilego a se dira mohla wola a lapile le ba a bego a na nabo? ₄Ka mo a tsenego Ngwakong wa Modimo, a tšea dinkgwa tšela tša go bewa pele ga Modimo, a ja a nea le bao a bego a na nabo, tšona di bego di sa swanela go ka lewa ke motho, ge e se baperisita.

₅A ba botša a re: Morwamotho, le letšatši la Sabatha ke yena Mong wa lona.

₆Ka le lengwe la Sabatha a tsena phuthegong a ruta. Gwa ba go na le motho e a omeletšego seatla se setona. ₇Bamangwalo le bafarisei ba dula ba mo hlapetša, ba re ba bone ge a tlo mo fodiša ka Sabatha, gore ba kgone go mmea molato. ₈Jesu yena o be a tseba dikgopolo tša bona; a bolela le motho eo wa go oma seatla, a re: Tsoga, o eme fa gare! Monna eo a tsoga. ₉Jesu a re: Ke tlo le botšiša: Se se dumeletšwego go dirwa ka Sabatha ke eng? A ke go dira botse, goba bobe? A ke go phološa bophelo, goba ke go bo senya? ₁₀A ba dikološa mahlo ka moka ga bona, a tsebo bolela le motho eo, a re: Otlolla seatla sa gago! A se otlolla, sa boela sa fola sa etša sela se sengwe.

₁₁Mme bao ba dira tša bošiloruri, ba ya ba lakana tše ba tlo go dira Jesu.

₁₂Mehleng yeo Jesu o kile a tšwela thabeng a yo rapela, a itiša bošego ka moka a rapela Modimo. ₁₃Ge go sile, a bitša barutiwa ba gagwe, a hlaola ba lesome le metšo e mebedi, a ba rea leina a re ke Baapostola. ₁₄Ke Simone a mo rea la Petro, le Andre ngwanabo, le Jaokobo, le Johane, le Filipi, le Baratholomeo, ₁₅le Mateo, le Tomase, le Jakobo morwa wa Alifeo, le Simone wa go bitšwa ka la Tselote. ₁₆Le Juda wa Jakobo, le Judase Isikariothe wa go tlo ba moeki.

₁₇Ge a fologa moo thabeng a na le bona, a ema mo go bego go le molala, a na le lešaba la barutiwa ba gagwe le bontši bjo bogolo bja batho ba ba tšwilego nageng ka moka ya Juda le Jerusalema, le mešikong ya lewatle ya kua Tiro le Sidone. ₁₈E be e le ba ba tlilego go mo kwa, le go fodišwa malwetši a bona. Gwa fodišwa le ba ba lapisitšwego ke meoya ya ditšhila. ₁₉Lešaba la kganyoga go mo kgwatha, ka gobane mo go Yena go be go etšwa matla a go fodiša bohle.

₂₀Jesu a emiša mahlo, a bona barutiwa ba gagwe, a re: Ba lehlogonolo ke lena bahumanegi, gobane mmušo wa Modimo ke wa lena. ₂₁Ba lehlogonolo ke lena le kwago tlala bjale, gobane le tlo horišwa. Ba lehlogoholo ke lena ba le llago bjale, gobane le tlo sega.

₂₂Le ba lehlogonolo ge batho ba le hloya, ge ba le leleka, ge ba le roga, ge ba hlaswa leina la lena ba re ke le lebe, ba realo ka baka la yena Morwamotho. ₂₃Mohla wa tšona le thabe le hlalale, le tsebe gobane moputso wa lena e tlo ba o mogolo kwa magodimong; gobane ke tšona tše botatabo ba di dirilego baporofeta. ₂₄Ba madimabe ke lena bahumi, gobane le šetše le tšere tše di le beago pelo. ₂₅Ba madimabe ke lena ba hošego bjalo, gobane le tlo kwa tlala. Ba madimabe ke lena le segago bjalo, gobane le tlo golola. ₂₆Ba madimabe e tlo ba bolena ge batho bohle ba le reta, gobane ke tšona tše botatabo ba di dirilego baporofeta ba maaka.

₂₇Ge e le lena ba le kwago, ke le botša ke re: Ratang manaba a lena; ba ba le hloilego le ba setše; ₂₈Ba ba le rogago le ba šegofatše; ba ba le pharago le ba rapelele. ₂₉E a go phasolago thama, o mo sekegele le e ngwe; e a go amogago kobo, o se ke wa mo ganela le kobjana. ₃₀Mang le mang e a go kgopelago o mo fe; e a go hlakotšego o se ke wa mmela. ₃₁Batho le ba dire tše le ratago gore ba le dire tšona.

₃₂Gobane ge le rata ba ba le ratago, le sa lebogwang? Hleng le badiradibe ba rata ba ba ba ratago. ₃₃Ge le setša ba ba le setšago, le sa lebogwang? Gobane ke sona se le badiradibe ba se dirago. ₃₄Ge Le adima bao le holofelago go rua ka bona le sa lebogwang? Hleng le badiradibe ba a adimana, gore ba tšee se se lekanego. ₃₅Sa lena a e be go rata manaba a lena, le go setša le go adima mo le sa holofelego go boelwa. Ke mo moputso wa lena e tlo go ba o montši, la tlo ba bana ba Yogodimodimo, gobane yena le ba ba sa lebogego, le ba babe, o ba dira ka botho. ₃₆Bang bagaugedi boka Tataweno ge e le mogaugedi.

₃₇Le se ke la ahlola; ke mo le sa tlo go ahlolwa: le se ke la lahla motho; ke mo le sa tlo go lahlwa; lebaleleng gomme le tlo lebalelwa. ₃₈Fang, gomme le tlo fiwa; ke mo le tlo go adibetša la tšhelelwa ka seelo se se botse se se katetšwego, se se nago le mohlopa. Gobane seelo se le elago ka sona, ke sona se le tlo go elelwa ka sona.

₃₉A bolela le bona le ka seswantšho a re: A le re sefofu se ka kgona go hlahla sefufu? A di ka se wele moleteng ka dipedi? ₄₀Morutiwa ga a phale moruti wa gagwe; mang le mang o tlo rutega a etša moruti wa gagwe.

₄₁O reng o bona lehlokwana leihlong la ngwana weno, o sa lemoge kwata ya ihlong la gago? ₄₂O ka bolela bjang le ngwana weno; wa re: Ngwanešwana! A nke ke ntšhe lehlokwana leihlong la gago, mola kwata ya ihlong la gago o sa e bone? Moikaketši tena! Thoma o ntšhe kwata mo ihlong la gago, o kgone o boneša wa ntšha lehlokwana leihlong la ngwana weno.

₄₃Ga go sehlare se se botse se se enywago dipodiša; le gona ga go sehlare se sebe, se se enywago dienywa tše botse. ₄₄Sehlare sefe le sefe se tsebja ka dienywa tša sona. Gobane mago ga a fulwe monganeng, le dithara ga di fulwe mošwaneng. ₄₅Motho yo botse o tšweletša tše botse diets wa lehumong le le botse la pelo; mme motho yo mobe o tšweletša tše mpe di etšwa mo go befilego; gobane molomo wa gagwe o bolela tše pelo e di falatšago.

₄₆Gomme le reng le ntha Morena! Morena, mola le sa dire tše ke di bolelago? ₄₇Motho e a tlago go Nna a kwa tše ke di bolelago a di dira, ke tlo šupetša e a swanago nae'. ₄₈O swana le motho e a agago ngwako, a epa moralo a iša fase, a o thea godimo ga lefsika. Mohla wa mafuls a meetse, noka ge e tšhologela ntlo yeo, ya se o šišinye, ka ge e theilwe lefsikeng. ₄₉Gomme e a kwago a se dire, o swana le motho e a agilego ngwako mmung o se nago motheo. Ge noka e o tšhologela, o se diege go wa; mme go kgetloga ga ngwako woo ya ba mo gogolo.