LUKA 3

₁Ka ngwaga wa lesome le metšo e fetšago seatla wa bogoši bja Kesara Tiberio, mehleng ya ge Pontio Pilato a buša naga ya Juda, Herode Teterareka a buša Galilea, Filipi Teterareka ngwanabo a buša Iturea le Teragoniti, Lisania Teterareka a buša Abilene, ₂Mehleng ya ge Hanna le Kayafa e le baperisita ba bagolo, ke mo Lentšu la Modimo le tletšego Johane morwa wa Tsakaria a le lešokeng. ₃A tla dinageng ka moka tše di bataganego le noka ya Jorodane, a bolela kolobetšo ya tshokologo ya gore batho ba lebalelwe dibe. ₄Gwa phethega tše di ngwadilwego pukung ya thuto tša Jesaya tša re: Go lentšu la segoeledi lešokeng; le re: Lekelelanyang tsela ya Morena, le lokiše mebila ya gagwe. ₅Dikoti ka moka di tlatšwe; dithaba tšohle le meboto a di kokobetšwe; go kgopamilego a go loke; mo go lego makukuno a go latšwe; ₆ke mo nama ka moka e tlo go bona phološo ya Modimo.

₇Johane a bolela le mašaba a a tšwetšego go kolobetšwa ke yena, a re: Lena matswinyana a dinoga, ke mang a le rutilego go tlo phonyokga bogale bjo bo tlago? ₈Napang le enywe dienywa tše di amanago le tshokologo. Le se ke la thoma go eleletša la re: Re na le tata wešo Aborahama, gobane ke a le botša, Modimo o kgona go tsošetša Aborahama bana le mabjeng a. ₉Le gona selepe se šetše se beilwe medung ya dihlare: mme sehlare sefe le sefe se se sa enyego dienywa tše botse, se tlo rengwe sa lahlelwa mollong.

₁₀Mašaba a mmotšiša a re: Bjalo re tlo dirang?

₁₁Johane a fetola a re: E a nago le dikobo tše pedi, a nee eo a hlokago; e a nago le dijo, le yena a dire bjalo.

₁₂Le ba lekgetho ba tla go kolobetšwa, ba mmotšiša ba re: Moruti, rena re tlo dirang?

₁₃Yena a re: Le se ke la ntšhiša batho se se fetišago se le beetšwego ke molao.

₁₄Le bahlabani ba mmotšiša ba re le rena re tlo dirang?

Yena a re: Le se ke la tlaletša batho; le se ke la hlakola; le kgolwe ke moputso wa lena.

₁₅Gomme ka gobane setšhaba se be se dutše se holofetše, mo dipelong bohle ba šetše ba re mohlomong Johane ke yena Kriste, ₁₆a šupa tšona tšeo, bohle ba mo kwa ge a re: Ge e le nna ke le kolobetša ka meetse. Go setla eo a mphetago ka matla, yo ke sa swanelago go hunolla leralana la dieta tša gagwe. Yena eo o tlo le kolobetša ka Moyamokgethwa le ka mollo. ₁₇Ke yena a swerego leselo ka seatla; mme seboa sa gagwe o tlo se fsielela ruri, a kgobela mabele sešegong sa gagwe; moko wona o tlo o fiša ka mollo wo o sa timego.

₁₈A ruta batho Ebangedi ka go ba kgothatša le ka tše dingwe tše ntši. ₁₉Gomme Herode Teterareka mohla a sotšwe ke Johane ka baka la Herodia mosadi wa Filipi ngwanabo, le ka baka la tše mpe ka moka tše yena Herode a bego a di dira, ₂₀A buša a senya a tlatša tše a di dirilego tšohle ka go tswalelela Johane kgolegong.

₂₁Mehla yela ge batho ka moka ba kolobetšwa, le Jesu a kolobetšwa; ya re ge a rapela, legodimo la bulega. ₂₂Mme Moya o mokgethwa wa fologela mo go Yena o bonala e ke ke leeba; gwa kwala lentšu le etšwa legodimong la re: O Morwa moratwa waka; ke kgahlwa ke Wene!

₂₃Jesu mola a thoma modiro, o be a na le nywaga e masome a mararo. Batho ba be ba re ke morwa wa Josefa wa Eli, ₂₄wa Mathate, wa Lefi, wa Meleki, wa Jannai, wa Josefa, ₂₅wa Mathatia, wa Amosi, wa Nahume, wa Esile, wa Nangai, ₂₆wa Maathe, wa Mathatia, wa Simei, wa Joseka, wa Juda. ₂₇Wa Joanane, wa Resa, wa Serubabele, wa Sealathiele, wa Neri, ₂₈wa Meleki, wa Adi, wa Khosame, wa Elemodani, wa Here, ₂₉wa Jose, wa Elisere, wa Jorima, wa Mathate, wa Lefi, ₃₀wa Simeone, wa Juda, wa Josefa, wa Johama, wa Eliakima, ₃₁wa Melea, wa Mainane, wa Mathata, wa Nathane, wa Dafida, ₃₂wa Isai, wa Obede, wa Boase, wa Salamone, wa Naasone, ₃₃wa Aminadaba, wa Arama, wa Esiromo, wa Pheretse, wa Juda, ₃₄wa Jakobo, wa Isaka, wa Aborahama, wa Thara, wa Nahoro, ₃₅wa Saruge, wa Regu, wa Phelege, wa Ebere, wa Sala, ₃₆wa Kenane, wa Arapagasadi, wa Seme, wa Noage, wa Lamege, ₃₇wa Methusala, wa Henoge, wa Jarede, wa Mahlalalele, wa Kenane, ₃₈wa Enose, wa Sethe, wa Adama, wa Modimo.