LUKA 2

₁Mehleng yeo gwa na gwa tšwa molao go Kesara Augusto, wa gore dilete ka moka di ngwalwe. ₂Lengwalo leo la dirwa e le la pele; ke ge Kirenio a buša Siria. ₃Batho ka moka ba ya go ngwalwa; e mongwe le e mongwe a ya motseng wa gabo.

₄Josefa le yena a tloga Galilea motseng wa Natsaretha, a ya nageng ya Juda motseng wa Dafida o bitšwago Betlehema, gobane e be e le motho wa moloko wa Dafida, wa lešika leo. ₅A ya go ngwalwa le Maria mosadi e a beeleditšwego ke yena, yo e bego e le moima. ₆Ya re ge ba le moo, gwa fihla lebaka la gagwe le go belega. ₇A belega morwa wa gagwe eo a itšibutšego ka yena, a mo phuthela ka mašela, a mo latša legopong, ka gobane ba sa ka ba hwetša sebaka ngwakong wa baeti.

₈Gomme go be go na le badiši nageng yeo marakeng, ba letše ba letile mehlape ya bona. ₉Ba bona Morongwa wa Morena a tlile go bona a ema, mme letago la Morena la ba phadimela ka mešo e go fela; bona ba boifa, poifo ya ba e kgolo. ₁₀Morongwa wa Morena a bolela le bona a re: Se boifeng! Bonang, ke le botša taba e botse ya thabo e kgolo, e tlo go ba ya setšaba ka moka. ₁₁Gobane lehono le tswaletšwe Mophološi, e lego Kriste Morena, mo motseng wa Dafida. ₁₂Taetšo ya go le iša gona še: Le tlo hwetša lesea le le phuthetšwego ka mašela le letše legopong.

₁₃A sa realo ke ge lešaba la dira tša legodimo le eme le yena Morongwa, le reta Modimo le re: ₁₄Tumišo a e ye go Modimo magodimodimong; lefaseng go be le khutšo, kgahlišo bathong.

₁₅Ya re ge Barongwa ba tlogile, ba boetše legodimong, badiši ba šala ba botšana ba re: A re yeng kwa Betlehema re yo bona taba ye e diregilego, ye Morena a re tsebišitšego yona.

₁₆Ba hlaganela ba ya, ba hwetša Maria le Josefa, le lona lesea le letše legopong. ₁₇Ya re ge ba bone, ba bolela tše bona ba di boditšwego di ela yena ngwane e. ₁₈Ka moka ba ba di kwago ba tlabega ka tše badiši ba ba botšago tšona. ₁₉Maria yena a boloka ditaba tše ka moka, a di akanya pelong ya gagwe. ₂₀Badiši ba goma ba reta Modimo ba Mo tumiša ka tšohle tše ba di kwilego le tše ba di bonego, e le tšona tšela tše ba di boditšwego.

₂₁Ge go fetile matšatši a seswai ngwana a bolotšwa, a rewa leina la Jesu, lonalela le a le reetšwego ke Morongwa a sešo a amogelwa mmeleng wa mmagwe.

₂₂Ge go fetile lebaka la go tagafatšwa ga bona ka molao wa Moše ba mo iša Jerusalema, gore ba mmee pele ga Morena. ₂₃E le go ya ka mo go ngwadilwego molaong wa Morena, wo o rego: Se setona se mmaso a kago itšibula ka sona, se tlo thwe ke sekgethwa sa Morena. ₂₄Gore ka mo go laetšwego molaong wa Morena ba iše sedimo sa maebana a mabedi, le ge e le mekurwanyana e mebedi.

₂₅Bjale mo motseng wa Jerusalema go be go na le motho e mongwe, leina la gagwe e be e le Simeone. Motho eo e be e le moloki, e le yo bolo, a letetše khomotšo ya Isiraele; mme Moya o mokgethwa o be o le go yena. ₂₆O be a utolletšwe ke Moya o mokgethwa, gore a ka se ke a hwa a sešo a bona Motlotšwa wa Morena. ₂₇Motho eo a tla Ntlongkgethwa a išwa ke Moya; a hwetša batswadi ba Jesu ba tliša ngwana wa bona, ba tlile go mo dira ka mokgwa wa Molao. ₂₈Simeone a mo kuka ka matsogo, a leboga Modimo a re: ₂₉Mong a ka! Ke gona ge o hunolla mohlanka wa gago, gore a ikele a wile pelo bjalo ka ge o boletše. ₃₀Gobane mahlo a ka a bone phološo ya gago, ₃₁Ye o e beilego ya tlo bonwa ke ditšhaba tšohle. ₃₂E le seetša se-iša-kutollo-go-bantle, sa go retiša setšhaba sa gago sa Isiraele.

₃₃Tatagwe le mmagwe ba tlabja ke tse a bolelwago ka tšona. ₃₄Simeone a ba šegofatša, a bolela le Maria mmago ngwana a re: Tseba gore yo o beetšwe go ba seuši le setsoši sa ba bantši ba Isiraele, le go ba seka se tlo go ganetšwa. ₃₅Le wena pelo ya gago e tlo phuloletšwa ke lerumo; gore go tle go utollwe megopolo ya dipelo tše di ntši.

₃₆Le moporofeta wa mosadi o be a le gona moo, Anna morwedi wa Fanuele wa moloko wa Asere. E be e le wa kgale; a sa le kgarebe a tšewa a fetša nywaga e šupilego a na le monna wa gagwe; ₃₇bjale e be e le mohlologadi wa nywaga e masome a seswai a metšo e mene; a sa tloge Ntlongkgethwa, a direla Modimo ka go ikona le ka go rapela Modimo bošego le mosegare. ₃₈Le yena a batamela ka lona lebaka leo, a ema, a reta Morena, a bolela yena ngwana eo go bohle ba Jerusalema ba bego ba letetše khunologo.

₃₉Ya re ge ba phetile tšohle tše di laetšwego molaong wa Morena, ba boela Galilea, ba ya motseng wa gabo wa Natsaretha. ₄₀Ngwana yena a gola, a tia moyeng, a tlala bohlale a okametšwe ke botho bja Modimo.

₄₁Batswadi ba gagwe, e be e le ba go ya Jerusalema monyanyeng wa Paseka ka nywaga. ₄₂Ge e šetše a na le nywaga e lesome la metšo e mebedi ba rotogela Jerusalema ka mokgwa wa monyanya. ₄₃Ya re ge be feditše matšatši a wona, ba boa; ngwana Jesu a šala, batswadi ba gagwe ba sa tsebe. ₄₄Ge ba nagana ba re o na le ba ba sepedišanago nabo; ba sepela leeto la letšatši ba mo nyaka go metswalo le go ba ba tsebanago nabo. ₄₅Ba mo hloka; ba buša ba boela Jerusalema ba fela ba mo nyaka. ₄₆Gwa feta matšatši a mararo, ya ba gona ba mo hwetšago Ntlongkgethwa, a dutše gare ga baruti, a ba theetša, a ba botšiša; ₄₇ba ba mo kwago bohle ba kgotsa tlhaologanyo ya gagwe le diphetolo tša gagwe. ₄₈Ge ba mmona moo, ba tlabega; mmagwe a re: Ngwanaka! O reng o re dira tše? O ko bone, tatago le nna re go nyakile ka bohloko.

₄₉Yena a fetola a re: Le be le reng le nnyaka? A le be le sa tsebe ge ke swanetše go ba mo go tše tša Tate? ₅₀Lentšu leo a le boletšego ba se ke ba le kweša.

₅₁Gomme a fologa le bona a ya Natsaretha, a dula e le e a ba kwago. Mmagwe ditaba tše ka moka a dula a di bolokile pelong ya gagwe. ₅₂Jesu a tšwelela pele a hlalefa, a eya le nywaga, a kgahla Modimo le batho.