LEFITIKO 7

₁Molao wo o lebanego selefa šo: Ke sekgethwakgethwa. ₂Selefa se hlabiwe mo go hlabelwago sehlabelo; madi a sona a gašwe lehlakoreng la aletare thoko tšohle. ₃Makhura a sona ka moka, a mosela, a lebipi, a tlišwe, ₄le dipshio ka dipedi, le makhura a tšona, le a moseko, le sebetšana, -- a tlošwe mo go dipshio. ₅Moperisita a a tšhume mo aletareng, e be tša mollo wa Morena. Ke sona selefa. ₆Banna ka moka ba baperisita ba ka se ja; se jelwe felo gokgethwa; ke sekgethwakgethwa.

₇Selefa se dirwa ka mokgwa wa seloba, di ya ka molao o tee; ke sa moperisita e a dirago poelanyo ka sona. ₈Moperisita e a dirago sehlabelo sa motho e mongwe, o tšea letlalo la sehlabelo seo, ke la gagwe. ₉Dibego ka moka tša dijo tše di apeilwego sebešong, le tšohle tše di apewago pitšeng goba tša gadikwa lebeaneng, ke tša moperisita e a di tlišago. ₁₀Dibego ka moka tša dijo tše di tšhetšwego makhura, le tše di omilego, ka moka e be tša barwa ba Arone, ofe le ofe.

₁₁Molao o lebanego dileboga tše di tlišetšwago Morena, šo: ₁₂Ge sedimo se tlišwa e le sa theto, ba se tliše le dinkgwa tše di sa omelwago, tše di tšhetšwego makhura, le dinkgwa tša dimatla tše di tloditšwego makhura, le bupi bjo bo dubilwego ka makhura. ₁₃A di tliše le dinkgwa tše di ometšwego, e be sebego sa gagwe sa go tlatša sedimo sa theto le sa seleboga. ₁₄Mo go dibego tše ka moka a taboletabole tša go neela Morena; tšona ke tša moperisita eo e a gašitšego madi a sedimo sa seleboga. ₁₅Ge e le nama ya sedimo sa theto, e lewe ka tšatši lona leo la sebego, go se ke gwa šala molatša wa yona.

₁₆Ge e ka ba sedimo sa keno, le ge e le sa boithatelo, se lewe ka tšatši le a se tlišago ka lona; gomme molatša wa sona o ka lewa ka la ka moswana. ₁₇Dinama tša sehlabelo tše di šalago, tšona di fišwa ka mollo ka letšatši la boraro. ₁₈Ge nama ya sedimo e ka lewa ka letšatši la boraro, go ka se ke gwa kgahliša, gomme se motho a se tlišitšego se tlo nyatšega, e tlo ba makgapha; gomme e a se jago o oba molato. ₁₉Nama ye e kgwathilwego ke tšhila e se ke ya lewa; e fišwe ka mollo. Nama ye e se nago taba, e ka lewa ke mang le mang e a se nago ditšhila.

₂₀Ge motho wa tšhila a ka ja nama ya sedimo sa seleboga, e lego sa Morena, mola tšhila e le mo go yena, motho e mobjalo o tlo ripiwa setšhabeng sa gabo. ₂₁Motho e a kgwathago tšhila, e ka ba ya motho, goba ya kgomo, goba se sengwe se se nago le tšhila, mme a tla a ja nama ya sedimo sa seleboga, e lego sa Morena, motho e mobjalo o tlo ripiwa setšhabang sa gabo.

₂₂Morena o boletše le Moshe a re: ₂₃Botša Baisiraele o re: Le se ke la ja makhura a kgomo le a pudi le a nku. ₂₄Makhura a se se hwilego ka noši, le a se se bolailwego ke sebata, ona a ka dira modiro ofe le ofe; fela, le se ke la a ja. ₂₅Gobane e a jago makhura a kgomo ya tše di išitšwego mellong ya Morena, o tlo ripiwa setšhabeng sa gabo. ₂₆Mo maagong a lena go se ke gwa lewa madi, e ka ba a nonyana goba a seruiwa. ₂₇E a jago madi afe le afe, o tlo ripiwa setšhabeng sa gabo.

₂₈Morena o boletše le Moshe a re: ₂₉Botša Baisiraele o re: E a tlišetšago Morena sedimo sa gagwe sa seleboga, a a tliše neo ya gagwe, e ntšhwe go sedimo sa gagwe sa seleboga. ₃₀Tša mello ya Morena a di tliše ka diatla tša gagwe, a tliše makhura le leumo. Leumo e be seekaro pele ga Morena. ₃₁Moperisita a tšhume makhura aletareng; leumo e be la Arone le la barwa ba gagwe. ₃₂Leoto la le letona le le nee moperisita, e be kabelo ya gagwe ya sedimo sa seleboga. ₃₃Yena yoo wa barwa ba Arone, e a fihlišitšego madi a sedimo sa seleboga, le makhura a sona, ke yena a newago leoto la le letona. ₃₄Ka gobane nna ke tšea leumo la seekaro le leoto la kabelo go Baisiraele; mme nna ke di neile Arone moperisita le barwa ba gagwe, e be molao wa ka mehla. ₃₅Ke yona kabelo ya Arone, le kabelo ya barwa ba gagwe mo mellong ya Morena, kabelo ye ba e fiwago mohla Morena a ba batametša gore e be baperisita ba gagwe. ₃₆Ke tšona tše Morena a laetšego tšona ka tša mohla ba tlotšwa, a re ba newe tšona di etšwa go Baisiraele. Ke molao wa ka mehla go iša ditlogolong tša bona.

₃₇Ke wona molao wa sehlabelo, le wa sebego, le wa seloba, le wa go bewa ga baperisita, le wa sedimo sa seleboga. ₃₈Ke tšona tše Morena a di laetšego Moshe thabeng ya Sinai mohla a laetšego Baisiraele go tlišetša Morena dibego tša bona lešokeng la Sinai.