LEFITIKO 6

₁Morena o boletše le Moshe a re: ₂Laela Arone le barwa ba gagwe, o re: Molao wa sehlabelo šo: Sehlabelo se se swanetše go tuka ifo bošego ka moka aletareng go fihla ge go esa, mollo o fele o bešeletšwa gona moo. ₃Moperisita a apare kobo ya gagwe ya leokodi, a tšware sethema sa leokodi, a ole molora wa mollo wa sehlabelo, a o tšhele hleng ga aletare. ₄A tsebo apola diaparo tša gagwe, a apare tše dingwe, a ntšhetše molora ntle ga mešaša felo go sekilego. ₅Mollo wa aletareng o tuke mo go yona, o se ke wa tima. E sa le bosasa moperisita a fele a beše dikgong tše dingwe go yona, a lokiše sehlabelo mo go yona, a tšhume makhura a dihlabelo mo go yona. ₆Mollo o tuke mo aletareng ka mehla le mehla, o se ke wa tima.

₇Molao wa sebego sa dijo šo: Barwa ba Arone ba se fiše aletareng pele ga Morena. ₈E mongwe wa bona a ntšhe bupi bjo bo tokilwego bja sebego sa dijo, a fo tabola, le makhura a sona a a tsapare, a tšee diorelo ka moka tša sebego, a di tšhume mo aletareng, e be sa monko o bose le sa kgopotšo sa Morena. ₉Se se šalago, Arone le barwa ba gagwe ba se tšee ba se je; se lewe se se na komelo, se lewe felo gokgethwa. Ba se jele Ngwakong wa Kgwerano. ₁₀Se se ke sa apewa le komelo; ke ba neile gore e be kabelo ya bona ya tša mello ya ka; ke tše kgethwakgethwa bjalo ka seloba le selefa. ₁₁Di lewe ke banna ka moka ba leloko la Arone. Ke taelo ya lena ya ka mehla melokong ya lena, taelo ya tša mello ya Morena. E a di swarago e be e mokgethwa.

₁₂Morena o boletše le Moshe a re: ₁₃Sebego sa Arone le sa barwa ba gagwe sa mohla go tlotšwago e mongwe wa bona sese: Ke ntlatlana ya bupi bjo bo tokilwego bja sebego sa ka mehla; karolo e nngwe e tlišwe bosasa, e nngwe e tlišwe ka mantšiboa. ₁₄Di gadikwe ka makhura ka lebeana; o di tliše di gadikilwe; ke sebego se se kumagantšwego, ke sa monko o bose wa Morena. ₁₅Tšona tše di dirwe ke morwa wa gagwe e a tlotšwago bakeng sa gagwe. E be molao wa ka mehla. Di tšhumelwe Morena ka moka ga tšona. ₁₆Sebego sa moperisita se tšhumiwe ka moka ga sona; se se ke sa lewa.

₁₇Morena o boletše le Moshe a re: ₁₈Botša Arone le barwa ba gagwe o re: Molao o lebanego seloba šo: Se hlabiwe felo mo go hlabelwago dihlabelo, gona moo pele ga Morena; ke se sekgethwakgethwa. ₁₉Moperisita yena eo e a tlišitšego seloba, a se je; a se jele felo gokgethwa, lapeng la Ngwako wa Kgwerano. ₂₀Motho e a swarago nama ya sona, e be o mokgethwa; gomme e a kago gašetšwa ke madi a sona seaparong, a hlatswe fa go gašitšwego; mme a go hlatswe felo gokgethwa. ₂₁Pitša ye e se apeilego e bolawe; ge se ka ba se apeilwe ka pitša ya tshipi, yona e falwe, e tsebo hlatswiwa ka meetse. ₂₂Se lewe ke banna ka moka ba baperisita; ke sekgethwakgethwa. ₂₃Ge e le seloba seo madi a sona a tsenego Ngwakong wa Kgwerano a dira poelanyo sekgethweng, seo se se ke sa lewa, se fišwe ka mollo.