LEFITIKO 1

₁Morena o biditše Moshe a le mo Ngwakong wa Kgwerano, a re: ₂Bolela le Baisiraele o ba botše o re: Ge e mongwe wa lena a tlišetša Morena sebego, gona dibego tša lena le di ntšhe diruiweng, dikgomong le dinkung. ₃Ge sebego sa motho e le sehlabelo se se tšwago dikgomong, gona e be poo e se nago bosodi. A e tliše mojako wa Ngwako wa Kgwerano, e tle e kgahle Morena. ₄A bee seatla sa gagwe hlogong ya sehlabelo sa gagwe; ke mo se tlogo kgahla bakeng sa gagwe, sa mo direla poelanyo. ₅A e hlabe pele ga Morena; gomme barwa ba Arone, ba e lego baperisita ba tliše madi a yona, ba fokele aletare e lego mojako wa Ngwako wa Kgwerano ka ona. ₆A tsebo tswia sehlabelo sa gagwe, a se phakologanye. ₇Barwa ba Arone moperisita ba tlo gotša mollo; ba beše dikgong mo mollong. ₈Barwa ba Arone, ba e lego baperisita, ba beakanye ditho, le hlogo, le makhura godimo ga dikgong tše di lego mollong aletareng. ₉Mala le mehlahu a di hlatswe ka meetse, mme moperisita a di tšhume ka moka mo aletareng, e be sehlabelo sa mollo wa monko o bose wa Morena.

₁₀Ge sebego se etšwa dihuswaneng, e le kwana le ge e le putšane ya sehlabelo, gona a tliše ya pholwana e se nago bosodi. ₁₁A e hlabe hleng ga aletare ka thoko ya leboa pele ga Morena; mme barwa ba Arone, e lego baperisita, ba foke ka madi a yona ba dikologe le aletare. ₁₂A tsebo e phakologanya; hlogo ya yona, le makhura a yona, moperisita a di beakanye godimo ga dikgong mo mollong wa aletareng. ₁₃Mala le mehlahu, a di hlatswe ka meetse, mme moperisita a a di tliše ka moka, a di tšhume aletareng. Ke sehlabelo sa mollo wa monko o bose wa Morena.

₁₄Ge sebego sa gagwe e le sa nonyana ya sehlabelo sa Morena, gona a tliše mekurwanyana le ge e le maebana, e be sebego. ₁₅Moperisita a le tliše aletareng, a le kgaole hlogo, a e tšhume aletareng; madi a lona a a gamolele lehlakoreng la aletare. ₁₆A ntšhe tšelo ya lona, le tše di lego ka teng ga yona, a di lahlele sethobolong sa ka thoko ya bohlabela ya aletare. ₁₇A kgone go le fatola ka mo diphegong, a sa le ripaganye, mme yena moperisita a le tšhume mo aletareng godimo ga dikgong tše di lego mollong. Ke sehlabelo sa monko o bose wa Morena.