EKISODO 40

₁Morena o boditše Moshe a re: ₂Ngwako wa Kgwerano o o hlome ka la pele la kgwedi ya pele. ₃Go wona o bee polokelo ya melao, mme polokelo o e šire ka lešira la yona. ₄Le sethalana o se iše moo, gomme o lokiše tše di bewago mo go sona. Le sehlomapone o se iše, mme o se hlomele mabone a sona. ₅Aletare ya gauta ya diorelo o e bee pele ga polokelo ya melao. O kgone go fega lešira la mojako wa Ngwako. ₆Mo pele ga mojako wa Ngwako wa Kgwerano o bee aletare ya dihlabelo. ₇Legopo o le bee mo gare ga Ngwako wa Kgwerano le aletare, mme o tšhele meetse mo go lona. ₈O kgone o dira lapa ka thoko tšohle, o be o fege lešira la sefero sa lapa.

₉Ke mo o tlogo tšea makhura a setlolo wa tlotša Ngwako, le dilo tšohle tše di lego go wona, o o kgethe le dilo tšohle tša wona, gore e be o mokgethwa. ₁₀O tlotše le aletare ya dihlabelo le dibjana tša yona ka moka; o kgethe aletare yeo gore e be e kgethwakgethwa. ₁₁O tlotše le legopo le leoto la lona, o le kgethe.

₁₂O batametše Arone le barwa ba gagwe mo pele ga mojako wa Ngwako wa Kgwerano, o ba hlapiše ka meetse. ₁₃Arone o mo apeše diaparo tše kgethwa, o mo tlotše, o mo kgethe, gore e be moperisita wa go ntirela. ₁₄Le barwa ba gagwe o ba batametše, o ba apeše dikobo. ₁₅O ba tlotše bjalo ka ge o tloditše tatabo, gore e be baperisita ba go ntirela. Go tlotšwa ga bona go tlo ba dira baperisita ba neng le neng go iša ditlogolong tša bona.

₁₆Gomme Moshe a dira tšohle ka mo Morena a mo laetšego ka gona. ₁₇Ntlokgethwa ya hlomiwa ka la pele la kgwedi ya pele ya ngwaga wa bobedi. ₁₈Moshe a hlomile Ntlokgethwa, a bea maoto a yona, a tsema legwakgwa la yona la mamati, a nokela dipalelo, a emiša dikokwane tša yona. ₁₉A e rulela ka mašela a yona, le ka dikobo tšela tša hlaka, a dira ka mo Morena a mo laetšego. ₂₀A tšea melao a e bea polokelong, a nokela diphata mo mekgokong ya polokelo, a e khurumela ka sekhurumelo sa yona. ₂₁A iša polokelo mo Ntlongkgethwa, a fega lešira a šira polokelo ya melao, ka mo Morena a mo laetšego.

₂₂A iša sethalana mo Ngwakong wa Kgwerano, a se bea lehlakoreng la thoko ya leboa, ka mono pele ga lešira. ₂₃Mo go sona a bea dinkgwa a di hlatlaganya pele ga Morena ka mo Morena a mo laetšego. ₂₄Le sehlomapone a se emiša mo Ngwakong wa Kgwerano, sa lebana le sethalana, se le lehlakoreng la thoko ya borwa. ₂₅A hlomela dipone pele ga Morena, ka mo Morena a mo laetšego. ₂₆Aletare ya gauta a e bea mo Ngwakong wa Kgwerano ka mono pele ga lešira. ₂₇Mo go yona a thuntšha diorelo tša monko o bose, bjalo ka ge Morena a mo laetše. ₂₈A fega lešira la mojako wa Ntlokgethwa. ₂₉Aletare ya dihlabelo a e bea pele ga mojako wa Ntlokgethwa, wa Ngwako wa Kgwerano. Mo go yona a bea dihlabelo le dibego, ka mo Morena a mo laetšego. ₃₀Legopo a le bea mo gare ga Ngwako wa Kgwerano le aletare yeo, a tšhela meetse mo go lona a go hlapa. ₃₁Moshe le Arone le barwa ba gagwe ba be ba fela ba hlapa diatla le maoto go lona. ₃₂Ba be ba hlapa ge ba tsena Ngwakong wa Kgwerano, le ge ba batamela aletare, bjalo ka ge Morena a laetše Moshe. ₃₃A hloma le lapa la go dikologa le Ntlokgethwa le aletare, a fega lešira la sefero sa lapa. Ya ba gona go phetha modiro.

₃₄Gomme gwa tla leru la apeša Ngwako wa Kgwerano, letago la Morena la tlala Ntlokgethwa. ₃₅Le Mošhe a šitwa go tsena Ngwakong wa Kgwerano, ka ge leru le dutše mo go wona, ka ge letago la Morena le tletše Ntlokgethwa. ₃₆E be e re ge leru le hlatloga le tloga mo Ntlong e kgethwa, ya ba gona Baisiraele ba tsogilego maetong a bona ka moka. ₃₇Ge le sa hlatloge, ba be ba sa sepele, ba letela letšatši le hlatlogago ka lona. ₃₈Ka gobane e be e le leru la Morena le le bego le le Ntlong e kgethwa mosegare; mme bošego go be go le mollo mo go lona. Bohle ba leloko la Isiraele ba di bone maetong a bona ka moka.