JOBO 16

₁Jobo a fetola a re: ₂Taba tša mohuta woo ke di kwile gantši; bohle le bahomotši ba go tena motho. ₃Dipolelo tša lefela a ga di a fela bjale? Goba o pelofala ka lefe ge o mphetola? ₄Ge lena le ka be le dutše fa bakeng sa ka, le nna nka be ke bolela boka lena, nka be ke le dika ka merero, ka ba ka le kwera. ₅Nka be ke le tiiša ka molomo wa ka, ka le hleka ka mabobo a melomo ya ka. ₆Fela, le ge nka bolela, bohloko bja ka ga bo okobale; ge nka homola, ga go na se se kago ntloga. ₇Ka kgonthe, bjale o ntapišitše. Ba ga ka bohle o ba šwalalantše. ₈Ge o ntirile wa mašošo, ke bjona bohlatse. Ge bohloko bo ntsogela, ke gona ge bo mpega bo lebane le nna. ₉Bogale bjago bo nkgagotše, bo nthipagantše, bo nthathanyetša meno; naba la ka le ntomelela mahlo. ₁₀Ba nkahlamela, ba mphasola thama ka mahlapa, ba rapana ge ba nkwela. ₁₁Nna Modimo o nkgafetše bakgelogi, o ntahletše mo atleng tša babe. ₁₂Ke be ke dutše ke thabile, mme a nthobaganya; a ntshwara ka molala mme a mpšhatlaganya; o ntirile wa maelo a gagwe. ₁₃Dibetša tša gagwe di mpharafara gohle; o nthutše pshio, ga a ntlhomogele; sabohloko sa ka o se tšholletše fase. ₁₄O nkgobaditše mme a boeletša; o nkitimela wa mogale. ₁₅Ke tatetše mmele wa ka mankgeretla; lenaka la ka ke le bea fase leroleng. ₁₆Mahlo a ka a hubetše ka go lla; ke širwa mahlo ke thiti ya lehu. ₁₇Etšwa atla tša ka di se ne borumolane, mme thapelo ya ka e se ne bosodi. ₁₈Hee mobu, se khupetše madi a ka; mokgoši wa ka a o se hwetše makhutšo. ₁₉Tsebang e sa le bjale; hlatse ya ka e legodimong; Khumedi ya ka e gona kua tletlolo. ₂₀Bagwera ba ka ba a nkwera, mme mahlo a ka a llela Modimo megokgo, ₂₁gore a boelanye motho le Modimo, le ngwana motho le wa gabo. ₂₂Gobane nywaga e sa go tla ga e nene; ke mo ke tlogo wela tsela ke se hlwe ke boa.