JOBO 17

₁Moya wa ka o a fela; matšatši a ka a a tima; se se ntšhaletšego ke lebitla. ₂Ba ka be ba lesa go nkwera, gore mahlo a ka a se hlwe a bona tša go nkgalakela. ₃A ko mpeele montefedi wa go ntefela go wene; gobane ke mang wa go tlo fana diatla le nna? ₄Dipelo tša bao o di utetše tsebo; ke mo o ka se kego wa ba reta. ₅Monyakadithebola ka go eka wa gabo, mahlo a bana ba gagwe a tlo rotola. ₆Nna o ntirile seema sa batho; ke šetše ke le wa go tshwelwa sefahlogo mare. ₇Mahlo a ka a fifala ka masetlapelo; ditho tša ka tšohle di swana le moriti. ₈Ke tšona di tlabago ba go loka, di lohlanya yo bolo le mokgelogi. ₉Wa sethakga o tlo swara tsela; wa diatla tša go ila tšhila o tlo tielela. ₁₀Gomme lena bohle le ka no boa la tla. Ge e le yo bohlale mo go lena se mo hwetše. ₁₁A ka matšatši a fetile; ke senyegetšwe ke lehutšo, lona lehumo la pelo ya ka. ₁₂Bošego ba bo dira mosegare; ba re: Seetša se kgauswi, mola go sa le leswiswi. ₁₃Ge ke šetše ke bota lebitla ka re ke legae, ka re ke yo ikalela leswiswing, ₁₄ka rera lebitla ka re ke tate, ka rera diboko ka re ke bomme le bokgaetšedi, ₁₅ke sa botile eng? Se se ntšhaletšego se bonwa ke mang? ₁₆Boyo ke kua magorong a bodulabahu, ge go robetšwe mmogo leroleng.